2 โมเซ 6
6
1เญือม เซ พะจาว อัฮ เฮี ละ ไอ โมเซ, “ปเลี่ย เฮี ซ ยุ เปอะ ป ซ ยุฮ อาึ ละ ฟาโร. อาึ ซ คนัป เยอะ เกือฮ พลวย ปุย ไน อาึ เฮี โอก ฮา เมือง อื. ซ คนัป นึง อัมนัต ระ ยุฮ แตะ เกือฮ โครฮ อื โอก เอิน,” อัฮ เซ พะจาว.
พะจาว รโฮงะ กัน ซ ยุฮ แตะ
2 พะจาว ลปุง แม ไม่ ไอ โมเซ. อัฮ เฮี, “อาึ มัฮ เยโฮวา. 3อาึ เอีจ เปลีฮ ติ แตะ ละ อัปราฮัม ไม่ ยิซฮัก ไม่ ยาโคป. เอีจ รโฮงะ ละ อื มัฮ แตะ พะจาว อาวต ไม่ อัมนัต ตึก นึง ระ แตะ. อาึ ปังเมอ โอ รโฮงะ ติ แตะ ละ ตัม มอยฮ แตะ เยโฮวา. 4โนก ฮา เซ อาึ เอีจ เกือฮ ลปุง ซันญา ยุฮ แตะ ละ. อาึ เอีจ ซันญา อาึง ซ เกือฮ แตะ เมือง คะนาอัน ละ อื แปน คอง อื. ญันได่ เญือม อาวต ลั่ง อื เมือง เซ โฆะ โอ มัฮ ตอก อื ปุย โอ ไก เญือะ อาวต คราว โซม โฮ. 5ปเลี่ย เฮี อาึ เอีจ ฮมอง เงอะ แงงัฮ โม อิซราเอน นึง เกือฮ โม อียิป อื แปน ครา เซีญ แตะ. อาึ ไตม เมอะ ลปุง ซันญา แตะ อาึง ไม่ อื เซ.
6“ไมจ เปอะ รโฮงะ ละ โม อิซราเอน ตอก เฮี, อาึ มัฮ เยโฮวา. อาึ ซ เกือฮ โม เปะ โปน ฮา แปน เปอะ ครา เซีญ โม อียิป. อาึ ซ เปลีฮ อัมนัต ระ ยุฮ แตะ, ละ ซ เกือฮ แตะ โม เปะ โปน ฮา อื. อาึ ซ รเตีฮ โม อียิป เซ เกือฮ ลอก ตุต แตะ. 7อาึ ซ ตาว โม เปะ โอก นึง มัฮ เปอะ ปุย ไน อาึ. อาึ ซ แปน ลอป พะจาว ยุฮ เปอะ. เญือม เกือฮ อาึ โม เปะ โปน ฮา แปน เปอะ ครา เซีญ โม อียิป เปอ, เญือม เซ โม เปะ ซ ยุง เปอะ มัฮ อาึ เยโฮวา พะจาว ยุฮ เปอะ. 8อาึ ซ ตาว โม เปะ ฮอยจ นึง เมือง ป เอีจ ซันญา ซโตฮ แตะ อาึง ละ อัปราฮัม ไม่ ยิซฮัก ไม่ ยาโคป, ละ ซ เกือฮ ฮะ แปน คอง โม เปะ. อาึ มัฮ พะจาว,” อัฮ เซ.
9รซอม เซ ไอ โมเซ ซึป อื ละ โม อิซราเอน. โม เซ ปังเมอ โอ ง่อต ป อัฮ อื, นึง ไลจ ลอน รพาวม อื ฆาื โซะ ป อาวม แตะ นึง แปน อื ครา เซีญ ปุย.
10เญือม เซ พะจาว อัฮ อื ละ ไอ โมเซ ตอก เฮี, 11“ไมจ เปอะ โฮว ซตอก ฟาโร กซัต เมือง อียิป, เกือฮ พลวย โม อิซราเอน ละ ซ โฮลฮ อื โอก ฮา บั่นเมือง ยุฮ อื เซ,” อัฮ เซ ละ อื. 12ไอ โมเซ โลยฮ อื, “ปัง มัฮ โม อิซราเอน ง่อต โตว ลั่ง ป อัฮ ฮะ. ฟาโร ซ ญอม ง่อต ป อัฮ อาึ ตอก เมอ? อาึ มัฮ โตว ปุย เกียฮ อัฮ เกียฮ มวยญ,” อัฮ เซ. 13พะจาว ดวน ไอ โมเซ ไม่ อาโรน โฮว รโฮงะ อื ละ โม อิซราเอน ไม่ ละ ฟาโร, ละ ซ เกือฮ อื ยุง ซ เกือฮ พะจาว แตะ ตาว ปุย โฮวน เซ โอก ฮา เมือง อียิป.
14ไลลวง เฮี มัฮ ไลลวง จัตเจือ ไพรม ไอ โมเซ ไม่ อาโรน. มอยฮ กวน รเมะ รูเบ่น (ป มัฮ กวน โรง อิซราเอน) มัฮ ฮาโนก, ปันลู, เฮซโรน, ไม่ คารมี. โม เซ มัฮ ไกญ เจอ รูเบ่น.
15มอยฮ กวน รเมะ ซิเมโอน มัฮ เยมูเอน, ยามิน, โอฮาต, ยาคิน, โซฮา ไม่ ชาอุน. ชาอุน เซ มัฮ กวน ปรโปวน ปุย เมือง คะนาอัน. โม เซ มัฮ ไกญ เจอ ซิเมโอน.
16มอยฮ กวน รเมะ เลวี มัฮ เกอโชน, โคฮัต, ไม่ เมรารี. เลวี ไก อาญุ ติ รอย ไม่ ง่วย อาแลฮ เนอึม เดอึม ยุม.
17มอยฮ กวน เกอโชน เซ มัฮ ลิปนี ไม่ ชิเมอี. มัฮ ไกญ ซฆลาวม โม เลวี เตือง ลอา แตะ.
18มอยฮ กวน โคฮัต เซ มัฮ อัมรัม, อิซฮา, เฮปโรน, ไม่ อุตซีเอน. โคฮัต เซ ไก อาญุ ติ รอย ไม่ ง่วย ลอวย เนอึม เดอึม ยุม.
19มอยฮ กวน เมรารี เซ มัฮ มาลี ไม่ มูชี.
ไก เมาะ เซ ป มัฮ เจอ เลวี ไม่ ป มัฮ ไกญ ซฆลาวม ปุย นึง อื เตือง โอยจ อื.
20อัมรัม เซ ไอฮ โยเคเบ่ต ป มัฮ รนัน เปือะ แตะ แปน ปุย เญือะ แตะ, ไก กวน ไม่ ปุ แตะ. มอยฮ กวน รเมะ อื มัฮ อาโรน ไม่ ไอ โมเซ. อัมรัม เซ ไก อาญุ ติ รอย ไม่ ง่วย อาแลฮ เนอึม เดอึม ยุม.
21มอยฮ กวน อิซฮา เซ มัฮ โครา, เนเฟก, ไม่ ซิกรี.
22มอยฮ กวน อุตซีเอน เซ มัฮ มิชาเอน, เอนซาฟัน ไม่ ซิตรี.
23อาโรน เซ ไอฮ เอลีเชบ่า แปน ปุย เญือะ แตะ. ปรโปวน เซ มัฮ กวน อัมมีนาดั่ป, มัฮ รนัน นาโชน. เอลีเชบ่า เซ ไก กวน รเมะ ปาวน. มอยฮ อื มัฮ นาดั่ป, อาบี่ฮู, เอเลอาซา, ไม่ อิทามา.
24มอยฮ กวน โครา เซ มัฮ อัตซี, เอนคานา ไม่ อาบี่ยาซัป. โม เซ มัฮ ไกญ เจอ โม โครา นึง อื.
25เอเลอาซา ป มัฮ กวน อาโรน เซ ไอฮ กวน รโปวน ปูทิเอน ติ ปุย แปน ปุย เญือะ แตะ. ปรโปวน เซ ไก กวน รเมะ ติ, มอยฮ อื มัฮ ฟีเนฮัต. ปุย โม เซ เตือง โอยจ อื มัฮ ตื ป มัฮ ไกญ ปุย นึง เจอ เลวี เซ.
26เอีจ มัฮ อาโรน เซ ไม่ ไอ โมเซ เซ ป ฮมอง เซียง พะจาว เญือม อัฮ อื เฮี ละ อื โฮ, “ไมจ เปอะ นัม โม อิซราเอน เกือฮ โอก ฮา เมือง อียิป เกือฮ โอก โฮว แปน มู แปน มู แตะ,” ฮมอง อัฮ อื เซ. 27เอีจ มัฮ ปุย ลอา เซ ป ปัว กซัต เมือง อียิป พลวย โม อิซราเอน โอก โฮว ฮา ก อาวต แตะ. เอีจ มัฮ ไอ โมเซ เซ ไม่ อาโรน เซ ป ยุฮ เนอึม โอเอีฮ ตอก เซ.
ลปุง ซตอก พะจาว ละ ไอ โมเซ ไม่ อาโรน
28เญือม ลปุง พะจาว ไม่ ไอ โมเซ นึง เมือง อียิป เปอ มัฮ อัฮ อื ตอก เฮี, 29“อาึ มัฮ พะจาว. ไมจ เปอะ ซึป ลปุง อาึ ละ ฟาโร ป มัฮ กซัต เมือง อียิป เซ โครยญ มวยญ,” อัฮ เซ ละ อื.
30ไอ โมเซ อัฮ เฮี ละ พะจาว, “อาึ มัฮ ปุย โอ เกียฮ อัฮ เกียฮ มวยญ, ฟาโร แจง โอ อื ซ ง่อต ป อัฮ อาึ อื,” อัฮ เซ.
Valið núna:
2 โมเซ 6: lcp
Áherslumerki
Afrita
Bera saman
Deildu
Want to have your highlights saved across all your devices? Sign up or sign in
© (Active), Thai Bible Society