Yohaana 17
17
Yesu okushabira abeegi be
1Yesu ku yaaherize kugamba ebigambo ebyo, yainamura amaisho, yaareeba ahaiguru, yaagira ati: Taata, obunaku bwahika; himbisa Omwana waawe, n'Omwana abone kukuhimbisa, 2nk'oku waamuhaire obushoboorozi aha bantu boona, ngu abone kuha abu waamuhaire boona amagara agatahwaho. 3#1 Yoh 5:20. Aga nigo magara agatahwaho, okumanya iwe Ruhanga omwe ow'amazima, n'Ogwo ou waatumire, Yesu Kristo. 4#Yoh 4:34. Nkuhaisize ekitiinisa omu nsi, ahabw'okuba omurimo ogu wampaire kukora nguhikiriize. 5#Fil 2:6. Mbwenu, Tata, mpimbisa omu maisho gaawe n'ekitiinisa ekyo eki naabaire nyine naiwe, ensi etakahangirwe.
6Abashaija, abu wampaire omu nsi, nkabooreka eiziina ryawe; bakaba bari abaawe, waabampa, kandi barinzire ekigambo kyawe. 7Hati bamanyire ngu byona ebi wampaire biruga ah'ori; 8ahakuba ebigambo ebi wampaire mbibahaire, baabiikiriza, baamanya omu mazima ku naarugire ah'ori, kandi baikiriza ngu niiwe wantumire. 9#Yoh 6:44. Abo nibo ndikushabira; tindikushabira b'ensi, kureka abo abu wampaire, ahakuba n'abaawe; 10abangye boona n'abaawe, n'abaawe n'abangye, kandi nimpimbisibwa omuribo. 11Mbwenu hati tinkiri mu nsi, kwonka bo bari omu nsi, kandi niinyija ah'ori. Taata orikwera, obarindire omu iziina ryawe eri wampaire, babe bamwe nkaitwe oku turi bamwe. 12#Yoh 6:39; Zab 41:9. Obu naabaire nkibaine, nkabarindira omu iziina ryawe eri wampaire; nkabarinda, tihaine n'omwe owaabuzire, kureka omwana ow'okuhwerekyerera, ngu Ebyahandiikirwe bihikiirizibwe. 13#Yoh 15:11. Mbwenu niinyija ah'ori; ebi nimbigamba nkiri omu nsi, ngu okushemererwa kwangye kuhikiirizibwa omuribo. 14#Yoh 15:19. Mbahaire ekigambo kyawe; ensi yaabanga, ahabw'okuba ti b'ensi, nk'oku naanye ntari w'ensi. 15#Luk 22:32. Tindikukushaba ngu obaihe omu nsi, kureka ngu obarinde Omubi. 16Ti b'ensi, nk'oku naanye ntari w'ensi. 17Obeeze omu mazima; ekigambo kyawe nigo mazima. 18#Yoh 20:21. Nk'oku wantumire omu nsi, naanye nikwo mbatumire omu nsi. 19#Heb 10:10. Nyowe niinyeyeza ahabwabo, ngu nabo beezibwe omu mazima.
Yesu okushabira abandi abarimwikiriza
20Tindikushabira abo bonka, kureka n'abandi abariinyikiriza ahabw'ekigambo kyabo, 21#Gal 3:28. ngu boona babe bamwe, nkaiwe Taata, oku ori omuriinye, naanye omuriiwe, nabo babe omuriitwe, ab'ensi babone kwikiriza ku niiwe wantumire. 22Ekitiinisa eki wampaire nkibahaire, ngu babe bamwe nkaitwe oku turi bamwe, 23nyowe omuribo, naiwe omuriinye, babeere kimwe bamwe, ab'ensi bamanye ku niiwe wantumire, okabakunda nk'oku wankunzire. 24#Efe 1:4. Taata, niinyenda ngu abu wampaire nabo bagume naanye ahi ndi, babone kureeba ekitiinisa kyangye eki wampaire; ahakuba okankunda, ensi etakahangirwe. 25Taata ohikiriire, ensi terakumanyire; kwonka nyowe nkakumanya; kandi n'aba nibamanya ku niiwe wantumire. 26Nkabamanyisa eiziina ryawe, kandi ndyarimanyisa, ngu okukunda, oku wankunzire, kube omuribo, naanye mbe omuribo.
Attualmente Selezionati:
Yohaana 17: RR64
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
The Bible in Runyankore-Rukiga © United Bible Societies, 1964