JOHON 18
18
Jisuno rommani
(Mat 26.47-56; Mar 14.43-50; Luk 22.47-53)
1Suri san baiwi Jisu bini sagrirok bai aroni kutulwi Kidron twisa ayang naro tháng kha. Aro bari khungsa tongo, hakhe Jisu sagrirok bai aro habwi tháng kha. 2Rom rwnai Judas a barino saui mano, tamni hwn khe bini sagrirok bai Jisu aro kwbángma’-no kuthum lai kha. 3Hakhe Judas sengkrakrokno phiya ochai okrarok tei Pharisairok bai rohorjaknai noktharni sebukrokno tlangwi a bari-o tháng kha. Bórok da-seng tẃi laijak, chati-holarok tẃi laijak. 4Bini tamo wngna naiwi tong kha Jisu abono saui man kha. Aboni bagwino bo jabirwi bórokno hai hwnwi sẃng kha, “Norok sabono naituk lai?”
5“Nasaretni Jisuno,” hwnwi bórok sa kha.
“Ang’-no Bo,” hwnwi Jisu sa kha.
A rom rwnai Judas bórok bai baksa aro bacha laijak. 6Jisu “Angno bo” hwnwi sa phuru bórok uklok uslu-ui ha-o pwtap pwtip klai lai kha. 7Hakhe Jisu tei uáisa hai hwnwi sẃng kha, “Norok sabono naituk lai?”
“Nasaretni Jisuno,” hwnwi bórok sa phi kha.
8Jisu hai hwnwi sa kha, “Ang’-no bo hwnwi ang ba norokno sa kha bla. Norok ano naitugwi tong khe o bororokno rohor di.” 9(“Nwng ano rwmani bororokni bere khoroksa phano kwma li ya,” hwnwi bo samani a kók nang phaina hwnwi se bo amo hai sa-o.)
10Simon Pitorni thani seng kongsa tongo. Bo abono thorotsa sotroui ochai bokhorokni selengno tanwi bini yagra khunju rakhlai rw kha. A selengni bumung wng kha Malko. 11Hakhe Jisu Pitorno hai hwnwi sa kha, “Seng da phi di! Apha ano nung di hwnwi rwmano ang nung glak da hwn?”#Mat 26.39; Mar 14.36; Luk 22.42.
Hannani bwskango Jisu
12A sengkrakrok bórokni bokhorok bai tei Judai sebukrok bai baksa Jisuno romwi kha lai kha. 13Hakhe puila bono Hannani aro tlang kha. Bo wng kha a bisini ochai bokhorok, Kaiaphani bwkra. 14O Kaiaphano aswk borokni bagwi khoroksa thwima se ham kugo hwnwi Judairokno sanai a borok.#Joh 11.49-50.
Pitor Jisuno gosi ya wngmani
(Mat 26.69-70; Mar 14.66-68; Luk 22.55-57)
15Simon Pitor bai tei khoroksa sagri Jisuno rwktharwi tháng kha. A sagri ochai bokhorok bai sini laijak. Aboni bagwi bo ochai bokhorokni nokhla-o Jisu bai habwi tháng kha, 16Pitor khe phataro duglam gana bachaui tong rwk kha. Ochai bokhorok bai sini laijak a sagri kiphilwi thángwi duglam mwrwknaijwkno saui Pitorbo bisingo tubu kha. 17Duglam mwrwknaijwk Pitorno hai hwnwi sẃng kha, “Nwngbo a borokni sagri ya da?”
“I’nhi, ang ya,” hwnwi Pitor sa kha.
18Aphuru kwchangma bagwi selengrok bai sebukrok aro hangar bai hór mwchẃngwi bacha laiwi hór tongwi tong lai-o. Pitorbo bórok bai baksa bachaui hór tongwi kha.
Ochai bokhorok Jisuno kók sẃng phenekmani
(Mat 26.59-66; Mar 14.55-64; Luk 22.66-71)
19Ochai bokhorok Jisuno bini sagrirokni kók bai bini phrwngmani kókno sẃng kha. 20Jisu hai hwnwi sa kha, “Ang ba lukuno pháng pháng kheno sa bla. Judairok kuthummani thumnokrok bai noktharo’-no ang phrwng bla. Ang kók tháisa phano khogwi sa ya kho. 21Hakhe tamo wngwi nwng ano sẃng? Ani kók khnanairokno se sẃng di. Ang bórokno tamo sa bórokno sẃng di; bórokno ang samanino saui mano.”
22Jisu o kók sa khe sebuk khoroksa bono thapra phungsa chatsa khe nangwi hai hwnwi hwn kha, “Ochai bokhorokno bahai khe nwng o kók sa rak kha de!”
23Jisu bono hai hwnwi sa kha, “Ang tháisa swk cha ya kók saui tong khe abono jotonono sa di. Ang samani omo kubui khe tamo wngwi nwng ano bu sla?”
24Hakhe Hanna bono khajak khe’-no ochai bokhorok Kaiaphani aro rohor kha.
Pitor Jisuno tei uáisa gosi ya wngmani
(Mat 26.71-75; Mar 14.69-72; Luk 22.58-62)
25Pitor aro bachaui hór tongwino tong kho. Aphuru aro tongnairok bono hai hwnwi sẃng kha, “Nwngbo a borokni sagri ya da?”
Hakhe Pitor abono gosi li ya, “I’nhi, ang ya,” hwnwi bo sa kha.
26Pitor bai khunju tankhlaijaknaini sandai ochai bokhorokni seleng khoroksa hai hwnwi sacha kha, “Ang nono bari-o bo bai nuk ya da?”
27Hakhe Pitor hai’-no hai abono gosi li ya. Hai kheno aphuru tokla kokchigwi rw kha.
Pilatni bwskango Jisu
(Mat 27.1-2,11-14; Mar 15.1-5; Luk 23.1-5)
28Bórok Jisuno Kaiaphani nokni gobornorni noyungo tlang kha. Aphuru phung aisirisiri. Yókma Tero cháui manna tẃi khe Judairok sakno kwthar narwkna bagwi noyungo hap lai li ya. 29Aboni bagwino Pilat phataro ongkhorwi bórokno hai hwnwi saui kha, “Norok o borokno tamni majra ber lai?”
30“Bini majra kwrwi khe chwng bono nini thani tubu ya,” hwnwi bórok sa kha.
31Pilat hai hwnwi sa kha, “Norokni borokno norokno tlang di. Norokni Kerongo tongma hai’-no bini buj thumwi lai di.”
Judairok hai hwnwi sa kha, “Chini muchung tẃi chwng khoroksano phano butharwi man ya.” 32(Jisu bo bubo tẃi khe thwi no abo phunuguibo samani nang phaina bagwi se omo wngo.)
33Pilat noyungo kiphilwi thángwi Jisuno ringwi hai hwnwi sẃng kha, “Nwng Judairokni bugra da?”
34Jisu hai hwnwi sa kha, “Omo nwng sẃngma da, eba khe ani mungwi bui nono sama da?”
35Pilat hai hwnwi sa kha, “Ang le Judai diba? Nini bororok bai ochai okrarok bórok se nono ani yago yaphar phai bla. Nwng tamo khlai kha?”
36Jisu hai hwnwi sa kha, “Ani ha-o swngcharni ya. Ani ha-o swngcharni wngma te ani logisongrok Judairokni yakni ano narwkna bagwi choba khlai kha mun. I’nhi, ani ha oroni ya.”
37Hakhe Pilat bono hai hwnwi sẃng kha, “Hakhe nwng bugra da?”
Jisu hai hwnwi sa kha, “Ang bugra hwnwi nwng’-no saui tong kha bla. Kók kubuino sana bagwi se ang achai-o, aboni bagwi se ang o swngcharo phai-o. Kubuini bwkhak tongnai joto borok ani kók khna-o.”
38“Tamono kubui hwn?” hwnwi Pilat sẃng kha.
Jisuno butharna dagimani
(Mat 27.15-31; Mar 15.6-20; Luk 23.13-25)
Aphuru Pilat hai’-no hai phataro ongkhorwi Judairokno hai hwnwi sa kha, “Bono majra bernani ang mungsa phano nuk ya. 39Norokni bisingo wngwi tongma hai Yókma Ter brúm brúm ang khoroksano alongni phiyók phiyógwi rohoro. Hakhe Judairokni bugrano norok ano phiyók di da hwn?”
40Bórok chirikhógwi hai hwnwi sa kha, “I’nhi, bono ya! Barabano se phiyók di!” (Baraba wng kha dagait se.)
Attualmente Selezionati:
JOHON 18: KOKBSI
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.