A’NPHUTNA 14
14
Abraham in Lot Ahûksōt
1Rn 4 hei, Babylona Amra-phel, Ellasara Arioch, Elama Chedorlaomer, leh Goiima Tidal, hiseng hei hin, 2reng 5 hei chunga re anleitlo khahei khachu: Sodoma Kabera, Gomorrah a Birsha, Adma a Shinab, Zeboiima Shemeber khana Bela (a-emak leh Zoar) renghei hi kae. 3Hiva reng 5 hei hi inchun heia Siddim Phaicham, tûnchu Tuipui Kathi inti joa hin anremi anmanchun et a leika-om hei. 4Anmani hi Chedorlaomer ensuina thōia kum 12 leika-om hei, tâk kum 13 atluk pha chu ama anleidōi jo. 5Khana kum 14 atluk kum a hin Chedorlaomer leh a’nṭangpui hei seng remihei leh re kakōn heia Ashteroth Karnaima Rephaim, Hem a Zuzim, Kiriathaim phaia Emim, 6khana Edom tlânga Hor hei hi nêrdiram a ramri Elparan inti ram katlunga anleihnong heia kae. 7Khava sōa anmani ho’nle heia Kadesh (Enmishpat tia khava lai khan inhret) hmun a kahong jo hei. Anmani’n Amalek ram seng leh Hazazon Tamar ram a ka-om Amorhei anleitor heia kae.
8Khana Sodom Gomorrah, Adma, Zeboiim khana Bela reng 5 hei hin Siddim Phaichama anremihei anleimantûp heia, 9Elam, Goiim Babylonhei leh Ellasar hei chunga re tlona sik a le’ntluk hei. Reng 5 he’n reng 4 dōina kha kae. 10Khava phaicham kha khe anchona khur kōk katamtak leika-om, rehmun a inphut Sodom reng leh Gomorrah reng tlânsōt sik a anrei pha khur kōk a katla inhlut jo hei; tâk alak reng 3 hei chu tlâng ting katlânsōt heia kae. 11Rn 4 hei khan Sodom leh Gomorrah khōa heirakip, sâk sik inveina anchoma kase jo hei. 12Abram naipa sapa Lot khava lai khan Sodom khōa aleika-om kha anei rakip leh inṭhōia ansura ankeisôn jo.
13Rehmun a ahei katlânsōt mi inkhat in Amor mi Mamre intipa thingkung intheng hnenga aleika-om Hebrew mi Abram hnenga ṭong rakip kha avahri pek jo. Khava lai khan Mamre leh asōpuipa Eshkol leh Aner hei kha Abram leh alei inthōsap hei kae.
14Abram in asapa Lot ansura ankei jo ti ṭong athei pha, arabuk shunga amihei re katlo thei seng abek manchun heia, mi 318 katluk hei. Anmani’n reng 4 hei kha ankahnung anthlûr heia Dan katlung anleijui hei. 15Abram in amihei arup-rup a aṭhen heia, jân pha shunga re ansō heia antor jo hei. Ama’n Damascus sak tinga Hobath katlung anhnong heia kae. 16Khana anta leichom neinâk-hei seng kha ahei kasut heia kae. Asapa Lot leh aneinâk seng, nuhmeihei leh rehringa antakei hei seng aheiṭhōi male jo hei.
Melchizedek in Abram Vâng Apek
17Abram in, Chedorlaomer leh a’nṭangpui renghei avator sōa ahe’nle pha, Sodom rengpa’n Shave Phai-chama (Rengphai um inti) a aleiratō. 18Khana Salem reng Melchizedek, Chunghnung Pathen thempu khan buhlom leh ju achoia Abram ava-ratō.#He 7.1-10 19Vâng apek a, “Marvân leh ralei kasyem Chunghnung Pathen in Abram kha vâng pek rasoh! 20Khana na’nrepui chunga torna anikapek Chunghnung Pathen kha manpâk a om rasoh,” ati. Khana Abram in Melchizedek hneng are neinâk anta heichom male seng sôma inkhat apek a kae.
21Sodom rengpa’n Abram hneng, “Neinâk-hei seng chu chen ina, kamihei seng chu apek roh,” ati.
22Abram in amasôn, “Marvân leh ralei kasyem Chunghnung Pathen hmaikunga a’ntep eng kae. 23Khachu, nanneinâk pat razang khat a-emak leh kekōk hrui kapha inda mak ning. Kha achang inchu nang in, ‘Abram kha kei tamanhao kae’ titor mak jo tin che. 24Heite inkhatbek kei bing sik a lomak ning. Kamihei tahmang rōk hei khachu kalo sik jo. Tâk-kha ka’nṭangpui hei, Aner, Eshkol leh Mamre he’nchu anchen inlo hei rasoh.”
Attualmente Selezionati:
A’NPHUTNA 14: KOMRBSI
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.