Matayo 17
17
Yesu kaperuka shufa
Marko 9:2-13; Luka 9:28-36
1Ḅaad̯a ya nsiku ntandahu, Yesu kamuhwaa Pet̯ero, Yakobo na Yohana ndugujwe Yakobo na kanuka nao wao heket̯u kapfaa nao murimani dzuu. 2Hali wakwakumuyowani, Yesu kaperuka shufa. Hu usowe uḍabva kuyangaa dza hiḍi dzuwa na haya mavwaziye yahenda meupe pee! 3Iyo saa kut̯upuka *nabii Musa na Eliya na waḍabva kunena nae. 4D̯ubva Pet̯ero kamwamba Yesu, “Ḅwana, ni urembo kwamba swiswi hupfo hapfa. Ikiwa kwamba kuona vyema nambaka mapaa mahahu. Modza ḍyako, modza ḍya Musa na modza ḍya Eliya.”
5Ela asidzakwisa kunena, kudza wingu dzeupe ḍiwafinikiziyeḍyo. Makisa kuyawa idzwi na humu winguni ḍikyamba, “Huyu ni Mwanangu mutsakwa, nitsakizijwee nae muno. Musikiiyeni jeje.” 6Wepfosikia hiḍi idzwi, hawa wanafund̯i washooga muno hat̯a wagwa mutsangani funama. 7Yesu kawendea kawahora kawamba, “Nukani, namutseshooga.” 8Na wepfokwira wamuona Yesu jeje heket̯u.
9Makisa wepfowakisuka na hapfaḍe murimani, Yesu kawaamuru kawamba, “Haya muoneyeo ntamuruhusa ya kuyamusumwiiya yuḍejwonse hat̯a saa yangu mimi *Mwana jwa Ad̯amu nidzeyofufujwa kuyawa kwa wafu.”
10Hawa wanafund̯i wamuuza wamwamba, “Ḅwana, mani kut̯i awa waalimu wa *Sharia wanakaa na kwamba ni had̯i nabii Eliya adze d̯ura?” 11Yesu kawambukuya kawamba, “Gula ni ḍugha kwamba ni had̯i Eliya adze d̯ura ili ayaelekanye mambo yonse. 12Ela nyakumwambiani kwamba Eliya kamakudza hangu iiḍe, ela wantu ntawakumuhambuya kwamba ndiye. Na wamuhendea kula aina ya dzambo zuka dza watsakiyevyo. Dza vivyo, si hat̯a kae hat̯a nami Mwana jwa Ad̯amu wajwakunikuntisa d̯ina.”
13Ndookomu hawa wanafund̯i waimuka kwamba ekinena dzuu ya Yohana Mut̯opya.
Yesu kapfonya muurani eyekuwa na mpepfo nzuka
Marko 9:14-29; Luka 9:37-43
14D̯ubva wepfosuka hukuḍe nsi kwe t̯ut̯a ya wantu iyoikiwainda, kunuka muntu mumodza na humuḍe wantuni kenda kamuvunzia nkuhi Yesu na kamwamba, 15“Ḅwana, mufwiye t̯ei huyu muurani wangu. Ana kifofo na chakumusumbuwani muno. Saa zonse anakaa na kugwa mohoni ambu madzini. 16Nimuyeha kwa hawa wanafund̯iwo ela ntawakuweza kumupfoza.”
17Yesu kawambukuya kawamba, “E nywinywi mu wantu munangikiyeo na musio faro t̯i! Amevihivi nagija kukaa nanywi na kumuit̯isia hat̯a ari?” Kisa kawamba, “Haya muyeheni huyu muurani hapfa.” 18D̯ubva huyuḍe muurani epfopfiikwa, Yesu kaibusa hi mpepfo nzuka iyoikimusumbuwa na imuyawa. Na hangu hihiiḍe saa huyuḍe muurani kawa nka untu.
19Ḅaad̯aye hawa wanafund̯i wamuuza Yesu geri wamwamba, “Ḅwana, kut̯i swiswi ntahukuweza kuiyavya hiḍe mpepfo nzuka?” 20Yesu kawambukuya kawamba, “Ni kwa dzambo ḍya kwamba ntamwiiwa na faro ya kut̯osa. Koro hachi nyakumwambiani, hat̯a t̯ambere mundeewa na faro iyo ndoḍo sawa sawa na mbeju ya tsare,#17:20 Haya matsoro ya Kiyunani yahadza mbeju ya harid̯ale. Hii iwa ni mbeju ndoḍo sawa sawa na mbeju ya tsare. mundeweza kuwambia hu murima huu muwambe, ‘Kuka na hapfa wende hapfaḍe!’ Nao undeekuka. Koro ntakundeewa na ḍiḍeḍyonse ḍya kumushinda.”#17:20 Matsoro yangine yana kiḍinku cha 21 chambiyecho: Ela hi hii aina ya mpepfo nzuka ntaiwezi kuyawa lamud̯a kwa kufunga na kuyomba t̯u.
Yesu kanena kawii dzuu ya kufwa kwakwe
Marko 9:30-32; Luka 9:43-45
22Wepfokuwa Galilaya amaale, nsiku modza Yesu kawamba wanafund̯iwe, “Mimi Mwana jwa Ad̯amu nidzangizwa mikononi mwa wantu 23wadzeoniyaga. Ela nsiku ya hahu nafufuka kuyawa kwa wafu.” Epfowambia hivi, hawa wanafund̯i wanjijwa ni ngiru muno.
Yesu na Pet̯ero waipfa kuwa ḍya Hekalu
24Yesu na wanafund̯iwe wepfofika mudzi wa Kaperinaumi, hawa wantu weonahwaa kuwa kwa dzambo ḍye *Hekalu wamwendea Pet̯ero wamuuza wamwamba, “Ayu mwaalimu jwenu nkakae na kuipfa kuwa ḍya Hekalu hat̯a?” 25Pet̯ero kawambukuya kawamba, “Anakaa na kuipfa.” Makisa kanjia humuḍe nyumbani ili ende akavimwambie Yesu. Ela asidzapata kuvimwambia, Yesu kamuuza kamwamba, “Nimpa mat̯aro Simioni: Dze, mahaju wanakaa na kuwaipfisa kuwa wanansi wao, ambu wanakaa na kuipfisa wageni weo kukaani humu nsini mwao?” 26Pet̯ero kambukuya kamba, “Wanakaa na kuwaipfisa wageni.” Yesu kamba, “Ndookomu ni kunena kwamba hawa wanansi waa huru kutsaipfa! 27Ela kwa kwamba ntahu haḍya ya kuwaudhi, enda hukuḍe ziwani ukagise loo. Nswi ya d̯ura udzeyogiza iḅaze kanwa na unaona kuruḅembe#17:27 Haya matsoro ya Kiyunani yahadza shekeli. Hi iwa inat̯osa kuipfa kuwa ḍya wantu wawii ḍa. Hiḍi hiḍi kuwa ḍikiipfigwa kwa dzambo ḍya kuit̯unza hi Hekalu na vit̯akat̯akavye. modza. Ḍihwae wende ukaipfe kuwa ḍyako na ḍyangu.”
Attualmente Selezionati:
Matayo 17: pkb
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2004, Bible Translation and Literacy