GÉNESIS 15
15
Taita Diosca Abramman shuj churita cunata ari nishcami
1Tucui chaicuna tucushca q'uipami Mandaj Diosca muscuipi shina ricurishpa Abramtaca:
–Abram, ama manchaichu. Cambaj escudoca ñucami cani. Can japina cashcaca tucuita yalli jatunmari– nirca.
2Shina nijpi Abramca:
–Mandaj Jatun Dioslla ñucaman huahuata mana cushca jahuaca ¿imapajtaj imata cugringui? Ñuca imalla charishcacunataca damasceno Eliezer ñuca huasita ricuj mayordomollami japinga– nirca.
3Abramca cashnapishmi nirca:
–Quiquin, ñucaman mana huahuata cushcamantaca ñuca imalla charishcacunataca, ñuca huasipi huacharishca ñucapajta rurajllamari japinga– nircami.
4Chai q'uipaca Mandaj Diospaj rimashca paipajman shamushpami:
–Can imalla charishcacunataca mana chai runachu japinga. Ashtahuanpish cambaj quiquin churimi japinga– nirca.
5Mandaj Diosca, Abramtaca canllaman llujshichishpami:
–Jahua pachata ricui. Yupai tucushpaca, chai luzerocunata yupai– nirca.
Mandaj Diosca:
–Cambaj huahua huahuacunaca chashnamari canga– nircami.
6Abramca Mandaj Dios chashna nishcataca crircami. Chaimantami cashcata rurajta shina chasquirca. 7Mandaj Diosca:
–Ñucaca caldeocuna causacun Ur pueblomanta canta llujshichimuj Mandaj Diosmi cani. Cai llajtata canman cungapajmi llujshichimurcani– nircami.
8Chaimi Abramca:
–Mandaj Jatun Dioslla, cai llajtata ñuca japinataj cashcataca ¿ima shinataj yachashari?– nirca.
9Shina nijpimi Mandaj Diosca:
–Quimsa huatayuj huarmi bizita, quimsa huatayuj chivata, quimsa huatayuj carnerota, shuj urpita, shuj palomata apamui– nirca.
10Abramca tucui chai animalcunata japishpa chaupishpaca, shuj chaupitaca shuj ladoman, caishuj chaupitaca caishuj ladomanmi ch'imbapura churarca. Ashtahuanpish urpita, palomataca mana chaupircachu. 11Chai siricuj aichacunaman ullahuangacuna uriyamujpimi, Abramca chaicunataca manchachishpa cachacurca. 12Ña inti huashicucuitami Abramtaca yallitaj dorminai japirca. Paipaj jahuamanca yallitaj amsa shamujpimi achcata mancharirca.
13Chaipimi Mandaj Diosca Abramtaca:
–Cambaj huahua huahuacunaca shujtaj llajtapimi causagringa. Chai llajtapi causajcunapajta rurajmi canga. Paicunaca 400 huatacunatami yallitaj llaquichishca causangacuna. Chaica chashnatajmi canga nirca. 14Ashtahuanpish cambaj huahua huahuacunata paicunapajta rurachij llajtataca ñucami llaquichisha. Chai q'uipaca yallitaj achca charinacunayujmi llujshimungacuna. 15Canca yuyajyangacama sumajta causashpa ima llaqui illajllami huañungui. Chashnami canca cambaj ñaupa yayacunahuan tandanacugringui. 16Amorreocunaca manaraj yallitaj millaita rurancunachu. Chashna cashcamanta cambaj huahua huahuacunaca chuscu yayacunapaj q'uipami tigramungacuna– nircami.
17Ña tutayashpa ashtahuan amsayajpica, Abramca shuj hornomanta cushni llujshicujta, aichacunata chaupishpa ishqui ladoman churashca chaupitaca, nina sindi pasarijtami ricurca. 18Chai punllallatajmi Mandaj Diosca, Abramman cunata ari nishpa cashna nirca:
–Cambaj huahua huahuacunamanca cai llajtatami cusha. Egipto jatun yacumanta callarishpaca, Éufrates jatun yacuta catishpa, 19ceneocunapaj, cenezeocunapaj, cadmoneocunapaj, 20heteocunapaj, ferezeocunapaj, refaitacunapaj, 21amorreocunapaj, cananeocunapaj, gergeseocunapaj, jebuseocunapaj llajtacunatami cusha– nircami.
Attualmente Selezionati:
GÉNESIS 15: QCHI04
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Quichua Chimborazo Bible Revision 2010 © United Bible Societies, 2010.