PANDARIADDI 4
4
I Kain wuṛṛu i Habel
1Wua'udde i Adam natatambaten i Hawa, awingnge, ne wawine udde piate illoṛṛo. I tou nanungkangken sangkatou ana'a wuṛṛu nabbisara. “Ringannu aakannu Mawu i ya'u naasombate sangkatou ana'a esakka.” Ne ana'a udde nissagote i Kain. 2Ana see i Hawa nangunsiweten sangkatou ana'a esakka apia, aranne i Habel. I Habel naola'a mallal᷊u'adda domba, arawe i Kain nabbal᷊i mabbawailla. 3Manga pira tempo wua'udde i Kain nanganu sangkawageanganna wuassu inasaharanne ana see nionggolla su Mawu. 4Ana see i Habel nanganu ana'u domba pahul᷊une sambau wuassu manga dombane, niṛṛata, ana see nangonggollu wageangnge apiane su Mawu. Mawu mal᷊uassa si Habel wuṛṛu aonggolle, 5arawe nanol᷊a'i Kain wuṛṛu aonggolle. I Kain mangke nasa'u atonna, wuṛṛu hatine naṛṛamutta. 6Ne Mawu nabbisarate si Kain, “Anio i'o massa'u? Anio hatinu tumanite nasa'u? 7Amungkangngu i'o ma'ola'a apapia, i'o umamminna; o arawe amungkangngu i'o ma'ola'a al᷊al᷊eo, ne rosa uaṛṛadote sumutta sulal᷊ummu naungngu. Rosa sarun uataṛṛino wadangngu arawe i'o ṛinone mangindaun tou.”
8Ana see unni i Kain si Habel, tuarine, “Wette iaddua inai su wailla.” Su tempo itarua na'omate isudde, i Kain namangalo wuṛṛu namate si Habel tuarine.
9 Mawu naiwal᷊o si Kain, “Suapa i Habel, tuarinu?”
Kain sinumimbakka, “I Ya'u wagga. Apa ṛinone i ya'u ual᷊u'adda tuari'u?”
10Ana see Mawu nabbisara, “Anio i'o ma'ola'a inolaanna apan maata'utta udde? Daṛṛan tuarinu uui si ya'u wuassu leta'a, naal᷊ihidda tingikka sussal᷊ande madorongnga wawal᷊inne. 11Niawontohante i'o ma'oman sara mattinsahadda su leta'a. Leta'a udde luatte nangiṛṛuppa daṛṛan tuarinu, ere ola'u niwu'a moṛṛongnge ipanengkamma daṛṛan tuarinu udde sutempo i'o namate si tou. 12Amungkangngu i'o massuanna, leta'a sarun tawe mangonggollu hessine; i'o sarun maola'a mamamal᷊intadda apan tawe tampa atatanaanna su runia.”
13Ne wisaran Kain su Mawu, “Ṛuumanna udde tumaniten mawakkatta, i Ya'u tawe maapasanna. 14I'o nallimbuakka si Ya'u wuassu leta'a indi, marau wua dingan-Nu. I Ya'u sarun maola'a mamamal᷊intadda apan tawe tampa atatanaanna su runia, wuṛṛu i Ya'u sarun pateannu al᷊awo'u taumata apan massomba'u.”
15Arawe Mawu nabbisara, “Tawe. Amungkangngu i'o pateanna, ne maola'a wawal᷊inne, siri pitu nasutta lai iapa namate si'o udde sarun pateanna lai.” Wua'udde Mawu naniala si Kain tadea'u isai-sai apan massombane tawe mamate si tou. 16Ana see i Kain nassal᷊iute wuassu saruannu Mawu Ruata wuṛṛu natana'e su leta'a aranne “Pamamal᷊intaanna” su samba'an da'in Eden.
Papapulunni Kain
17I Kain wuṛṛu awingnge naasomba ana'a esakka, apan nionggol᷊annu aranne i Henokh. Wua'udde i Kain napararisikku sambau soa wuṛṛu soa udde nissago tumuṛṛuttu arannu anangnge udde. 18I Henokh iamangngi Irad. I Irad iamangngi Mehuyael, i Mehuyael iamangngi Metusael, wuṛṛu i Metusael udde iamangngi Lamekh. 19I Lamekh ruan katou awingnge, i Ada wuṛṛu i Zila. 20I Ada nanungkangngi Yabal wuṛṛu papapulunni Yabal eteudde walahanna apan uapaddul᷊i winatangnga wuṛṛu uatana'a su rasanna. 21Tuarine aranne i Yubal, wuṛṛu papapulunni Yubal eteudde mananalangnga kecapi wuṛṛu wansi. 22I Zila nanungkangngi Tubal-Kain, wuṛṛu papapulunne ma'ola'a al᷊awo'u hatin saranapa wuassu witu'a wuṛṛu atta'a. Tuarin Tubal-Kain wawine aranne i Naama.
23Nabbisarate i Lamekh su awingnge darua,
“Ada wuṛṛu Zila, paddaringikka!
Sangkatou umbasanna ta'u pateanna ana waugu buatte nango'a si ya'u.
24Amungkangngu pitung katou ana waugu ipabbal᷊issa papaten i Kain,
ne pitun pul᷊o pitu su atoune sarun pateanna amungkangngu i ya'u pateanna.”
I Set wuṛṛu i Enos
25I Adam wuṛṛu awingnge naasomba sangkatou ana'a esakka apia. Unni Hawa, “Ruata buatte nangonggollu ana'a esakka si ya'u maola'a hahantin Habel, apan buatte nipaten Kain.” Ana waugu udde i Hawa nanagon ana'a udde i Set. 26I Set pia ana'a esakka aranne i Enos. Ete su tempo udde taumata nanattakka mannagon arannu Mawu napawe massubba.
Attualmente Selezionati:
PANDARIADDI 4: LAITLD
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi