Banɔkpɛkpɛ Axɔ̃ɛ 22
22
1“Mɛadzya alɛ nɛ̀ mɛada alɛ mɔ, nɔtaatɔ̃ olũ mɛishu ulũ tibubuɔ.” 2Gɛ belũ yɛaɖɔaɖɔ ɔkɔ alɛ nɛ Aramaik buluhũɔ mɛ soɔ, badɔ kananá.
Kɛlɛ Paulo aɖɔ asɛ, 3“Yudaeyi mɛinu, bamɔ́ mɛ nɛ Tarso nɛ Kilikia, pɔ Yerusalem ɔmalɛ mɛ banyɔnɔ mɛ. Gamaliel yɛadɔkpasɛnɛ mɛidzì pɛ ɛkpasɛ bɔlɔ akaalɛ ɔshaa piapii kɛlɛ ɛzɛwlɔakɛ ɔkɔ Owusoso Akaa asɛ kana gɛ wɔnɔ ɔmayɛmɛ aka nyia aka abhɛtɛ ɛlɛ obuɔ ana. 4Ɛtɔnɔ bagɛ bazã Kidzo ɛlɛ nabha ɛkpã niede, kɛlɛ ɛkɔ beyí alɛ, gɛ kɛkɔ mɛivũ banyɛ nɛ̀ badzɛ ɔdɛkpɛ ɔɖavũ mɛ, 5asɛ kana gɛ banɔlũazazã gbagbla nɛ̀ yɛ besheshèɛ petee abalà aɖɔ kaɖɔ nɛ kɛlɛishu ana. Ɛvɛ tsyɛ dɛyɛkɛ buplukpa odenɔ banɔlũazazã gbagbla ɔkɔ ɔsɛsɛ balɛ adzya alɛ nɛ Damasko, kɛlɛ ɛvɛ ɛkɛlɛ dɛgbana banɔ alɛ asɛ ɔɖavũmɛ azazã ana amana Yerusalem asɛ bapɔ̃ batɔ̃ akɔ alɛ.
6“Nɛ kemuze ebe ana gɛ iku Damaskoɔ ebekeɛ, nɛ mɛ matìmatì mɛɛ, kifú tili tsé odenɔ kititíɛ bakana mɛishuɔ. 7Ɛwɔlɛ dɔ kesiakpa, kɛlɛ ilũ kaɖɔ tieli gɛetseɖe mɛ asɛ, ‘Saulo! Saulo! Kiɖeso pɛ ɔtɔnɔ miede ana?’
8Ibisi sɛ, “ ‘Apalete, wɔonu afana?’
Ebuiliulũ akɔ mɛ asɛ, “ ‘Mɛinu Apalete Yesu Nazaretieyiɛ gɛ yiede wɔtɔnɔɔ.’ 9Mɛɔhayɛ amɔ kifúɔ giboeleɛ, pɔ begitì anunɔ gɛ yɛoliɛ mɛ ɔlɔ ɖɔaɖɔ tseɖe mɛ.
10Ibisi sɛ, “ ‘Apalete, kiɖe kɛlɛ ɔsɛ mɛbhɛtɛ?’
Apaleteɛ etseɖe mɛasɛ, “ ‘Lɔɛtití tɛ̀ ɔvɛ Damasko ɔmamɛ. Nɛ ɛkɛlɛ bebètseɖe wɔ ebuiɛ gɛ bakpɛ wɔahɔɛ ɔsɛ ɔbhɛtɛɛ.’ 11Mɛɔbhia alɛ anyanã mɛ ahɔɛ pɛ bagbana mɛ avɛnɔ Damasko ɔmamɛ, ɔmɔsɛ kana gɛ kifúɔ tséɛ akɔ mɛawuhũɔ epú.
12“Anyɛ teli gɛ bekulu asɛ Anania yɛaba ebeɖi mɛ. Edzi anɔ gɛ ezeshù ɔsha, kɛlɛ Yudanɛ petee gɛazã kɛma ɛlɛ mɛ adɛmɛ yɛibui. 13Anyɛ alɛ yɛaba lɔɛtití nɛ mɛɔbha pɛ etseɖe mɛasɛ, ‘Adzya Saulo, tsodzi ɔmɔ!’ Kɛlɛ nɛ kibè ɛlɛ koɔ, kɛlɛ mɛlà mɔyɛ.
14“Kɛlɛ etseɖe mɛ asɛ, ‘Bɔlɔ akaalɛ Owusoso Akaa yɛebú wɔ ɔsɛ tɛ otì kɛgɛ yɛapɛ nɔ, ɔsɛ tɛ̀ ɔmɔ Anɔ Dadalɛ, nɛ̀ tɛ olũ ebui edenɔ yɛolugbũ mɛ̀. 15Wɔbodzì anɔ gɛ ɔbɔɖɔaɖɔ ɔdalɛ yɛishu ɔkɔ banunɔ petee nɛ kɛgɛ ɔmɔ pɛ olũɔ shu. 16Kɛlɛ otsiɛ nɔpɔ, kiɖe woko opoɔ dza? Lɔ, kɔ bakpɛ bulĩ akɔwɔ nɛ kɛtakpu tɛ̀ beplu wɔ ebui kpa atɛ́ɛ gana yɛinyeɛ tikukulu mɛ.’
17“Gɛ itsodzi ba Yerusalem pɛ izikulu Owusoso Akaa nɛ Akaavũɔ mɛ, ɛbaku taɖa mɛ 18kɛlɛ ɛmɔ Apaleteɛ yɛaɖɔaɖɔ etseɖe mɛ. Aɖɔ asɛ ‘Hɔa! Shɛ nɛ Yerusalem otsiɛ tsiɔ, ɔmɔsɛ batɛ bayɛkɛ wɔɛbuiɛ gɛ ɔbɔɖɔ nɛ mɛishuɔ.’
19“Ibuiliulũ sɛ, ‘Apalete, banɔ alɛ enyi asɛ ɛɛlɔ̀de ɔtsyɔakɔ ɔlɛ ɔvɛnɔ ɔbhlatɔ, pɛ idi huisi bagɛ ayɛkɛ wɔabha aŋã pɛ ɛɛkpɛ alɛ nɛ ɔɖavũ mɛ. 20Kɛlɛ kibeɛ gɛ bazabalɛ̀ Stefano gɛetsi nɛ wɔɛtakpu dzyosu nɔ, ɛzã ɛkɛlɛ pɛ ɛzɛkpɛ balɛ kemi pɛ izipo bagɛ eyi yɛ akpɛkpɛ nɔ.’
21“Kɛlɛ Apaleteɛ etseɖe mɛasɛ, ‘Gavɛ, ɛbakpɛ wɔ sɛsɛ fãa nɛ bagɛ etinu Yudanɛ ɔkɔ.’ ”
Paulo Gɛebedzì Romaeyiɛ
22Banɔɛza zɛtaatɔ̃ nɛ̀ Paulo odiyinɔ kibeɛ gɛ azaɖɔ kibui ɛlɛ ɔsɛ ‘Gavɛ, ɛbakpɛ wɔ sɛsɛ fãa nɛ bagɛ etinu Yudanɛ ɔkɔ.’ ” Kɛlɛ bakpɛ ozĩ asɛ, “Nɔgbã yɛɔkpɛ nɛ kesiakpa nabha mɔ! Agɛ shɔnɔ asɛ azã nɛ̀ ɛkpã!”
23Kibeɛ gɛ bakpɛ ozĩɛ pɛ batɛ balɛ akpɛkpɛ elú, pɛ batɛ osubhududu nɔ kpɛ kɛlɛ́ɛ nɔ mɛɛ, 24keyuiza anɔ gbagbla akɔ ɔsha asɛ bagbanà Paulo avɛnɔ buyuadɛdɛ ɔzãkɔɔ. Akasɛ alɛ asɛ behuisi yɛ tɛ̀ bebisi yɛ, tɛ betì kibui nɔnɔ shu sopɛ banunɔ akpɛ ozĩ ɔlɛ nɛ yɛabha ana. 25Kibèɛ gɛ banyã yɛ ɔsɛ tɛ behuisi yɛɛ, Paulo etseɖe keyuiza anɔ gbagbla gɛ eli ititì nɛ ɛkɛlɛ asɛ, “Ɔsha kɔ kidzo ɔsɛ behuisì Romaeyi gɛ begibu yɛpɔɔ dza?”
26Kibeɛ gɛ keyuiza anɔ gbagbla elũ kibui ɛlɛ, avɛ keyuiza otugbànɔ ɔkɔ adɛ kɔyɛ tititì. Ebisi asɛ, “Kiɖuwoe wɔbɔ ɔbhɛtɛ? Anyɛ alɛ enu Romaeyi.”
27Keyuiza anɔ gbagbla avɛ Paulo ɔbhà pɛ edibisi yɛasɛ, “Tseɖe mɛ, Romaeyi wɔonu dza?”
Ebuiliulũ asɛ, “Ee, yɛ mɛinu.”
28Kɛlɛ keyuiza anɔ gbagbla aɖɔ asɛ, “Kɛbhɛ hohoe mɛxɔnɔ buia flogo pɛ ɛbadzì Romaeyi.”
Paulo ebuiliulũ asɛ, “Mɛxɔnɔ Romaeyi bamɔ mɛ.”
29Bagɛ apɛ asɛ ebisi yɛ ebuiɛ, beyidè odunu ɔlɛ. Kifù bayí keyuiza anɔ gbagbla tsyɛ gɛ ebetì asɛ anyã Paulo gɛenu Romaeyiɛ akpɛ ɛɖahuiɛ mɛ.
Paulo Nɛ Ɔhamɛ Besheshèɛ Namɛ
30Gɛ keliɛ azaa, gɛ keyuiza anɔ gbagbla apɛ asɛ tɛ̀ etì kibui nɔnɔ shu sopɛ Yudanɛ alɔkɔ kibui nɛ Paulo shu soɔ, akɔ bebui nɛ ɔɖavũɔ mɛ kɛlɛ akɔ ɔsha asɛ banɔlũazazã gbagbla nɛ̀ ɔhamɛ besheshèɛ petee ebeshogò. Kɛlɛ agbana Paulo amana pɛ akɔ yɛalɔɛtití nɛ balɛ amɛ.
Attualmente Selezionati:
Banɔkpɛkpɛ Axɔ̃ɛ 22: nyb
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© (Active), Ghana Institute of Linguistics, Literacy and Bible Translation. All rights reserved.