MATAYO 16
16
Yesu esua kuronga luvengo
(Mrk. 8:11-13; Luk. 12:54-56; 11:29)
1Vafarisayo na Vasadukayo vakaza kumghesha; vakamsemba avavonyeshe luvengo lwefuma uko wanga. 2Akagharusha, akati, [Hekiswa muti, “Yavo heneangaa, ambu majumbi erotome,” 3na chaheyavo muti, “Yoo heneketa kiryanzoni, ambu wanga herotome kangi hejiririte.” Unywi valung’ong’o, muidima kutwarija fwanyanyi ya isanga, hama maluvengo a igheri ili temuidima kuamanya?] 4Lukolo luvivi lweshinda, luenda luvengo; telukainkwe luvengo neri, esire lula lwakwe Yona. Akavashigha akatonga.
Yesu ebohia kusatwarija kwa varateri
(Mrk. 8:14-21)
5Varateri vakwe vakatonga sela ila, vakaivaa kutika mikate. 6Yesu akavati, “Rerehani, kurindeni he chachu ya Vafarisayo na Vasadukayo!” 7Vakakanana venye na venye, vekiti, “Nikila twasatika mikate.” 8Yesu akamanya, akavati, “Unywi venye mwitikijo mghere, hanini mwekanana venye na venye iti ni kila mwasatika mikate? 9Temunatwarija, neri temukumbuka ila mikate misano he vala viku visano; na vikapu mwetotole ne vingahi? 10Neri ila mikate mfungate he vala viku vine, na vikapu mwetotole neki vingahi? 11Cheikee ze mwekisatwarija iti si vuntu vwa mikate, aho nekumuti, ‘Kurindeni he chachu ya Vafarisayo na Vasadukayo?’” 12Niho vakajughukiwa iti tetetie cha kukurinda he chachu ya mikate, esire he michejire ya Vafarisayo na Vasadukayo.
Petro evonyesha iti Yesu ni Kristo
(Mrk. 8:27-30; Luk. 9:18-21)
13Yesu akatonga mondo wa Kaisaria Filipo, akavavwija varateri vakwe, akati, “Vantu veti Mwana wa Mntu ni muni?” 14Vakati, “Kumwe veti u Yohane M’batizi, kumwe u Elia, na vakumwe, u Yeremia kana mmwe wa he varoti.” 15Akavati, “Na unywi muniti mi ni muni?” 16Niho Simoni Petro akagharusha, akati, “We u Kristo Mwana wa Mrungu mwenye moo.” 17Yesu akagharusha, akati, “U mrela vwedi Simoni mwana Yona; ambu si mwiri na sakame vyekufunukurire huvo, esire Vava wangu wa uko wanga. 18Nami nimutio, ‘We niwe Petro, na he ili ikamba ninejenga ho kanisa yangu, neri mpenge ja uko he nkoma tejikalizime.’ 19Nami ninekunka funguo ja vufumwa vwa uko wanga, kila wenechunga kunu he masanga, hata uko wanga charechungwe, na kila wenechungua kunu he masanga, hata uko wanga charechunguwe.” 20Niho akakokontia varateri vakwe iti vasiremvwire mntu kuti ye niye Kristo.
Yesu erota kifwa chakwe na kuvuka he vefwie
(Mrk. 8:31-33; Luk. 9:22)
21Kuvokia ilo igheri, Yesu akavoka kuvavonya varateri vakwe iti kimtara kutonga Yerusalemu, arishwe mavwasi mangi ni vaghosi na vabaha va vatasi na vaandiki, na kukomwa, msi wa katatu avuke he vefwie. 22Petro akamtika njama, akavoka kum’bohija ekiti, “Icho hai Mfumwa, ivyo vyesikakufikie!” 23Mira ye akagharuka, akamti Petro, “Vuka nyuma hemi, Shetani, unihosha ambu turirikana vya ki Mrungu, esire vya ki vantu.”
Mwitango wa kukukana
(Mrk. 8:34—9:1; Luk. 9:28-36)
24Niho Yesu akavati varateri vakwe, “Mntu eenda kuniratera, akukane ye mwenye, atike msalaba wakwe, aniratere. 25Ambu ula eenda kukija moo wakwe eneutesha, na ula enetesha moo vuntu vwangu, eneuvona. 26Hena lumazo ani, mntu ekivona mari ya masanga ose, mira ekitesha moo wakwe? Kana mntu enefunyani hantu ha moo wakwe? 27Ambu Mwana wa Mntu eneza na vamalaika vakwe, ena na ngazo ya Vavee, niho enemriha kila mntu kiringanyo cha mirongire yakwe. 28Kididi nimutio, ‘Hena ava veimuke aha vakumwe vesikasaghe kifwa, mhaka vavone Mwana wa Mntu ekiza he vufumwa vwakwe.’”
Attualmente Selezionati:
MATAYO 16: CHSUNT67
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Chasu New Testament © Bible Society of Tanzania, 1967.