MATAYO 8
8
Kubanja muntu eumbuka
(Mrk. 1:40-45; Luk. 5:12-16)
1Ekisea he ntuvi, luvungano lubaha lukamratera; 2niho hakaza mntu eumbuka, akamdunkutia, ekiti, “Mfumwa wekikunda uidima kunizerija.” 3Yesu akaronga mkono wakwe, akamkunta ekiti, “Nakunda, zera!” Hala indi akazera. 4Yesu akamti, “Rereha, usiremvwira mntu; mira tonga urekuvonyesha he mtasi, kangi uinkije itasi sa vuntu Mose eazere, lioke vuonwa hevo.”
Mndima wa akida ebanjwa
(Luk. 7:1-10)
5Niho ekiingia Kapernaumu, akida mmwe akamzia, 6akamsemba ekiti, “Mfumwa, mndima wangu eshinjie kula kaa, ni muwaji wa kuholoja, ewajwa haiwa.” 7Yesu akamti, “Nineza nim’banje.” 8Ula akida akamgharusha, akamti, “Mfumwa, mi tekinitara uingie he nyumba yangu; mira teta kiteto kimwe du, mndima wangu enebanda. 9Ambu nami ni mntu neinkiwe nzinya, nina vasikari veho kijusi hemi, nekimti uu, ‘Tonga,’ etonga; na uu, ‘Nzoo,’ eza; na mzoro wangu, ‘Ronga iki na iki,’ eronga.” 10Yesu ekisikia huvo akakugha, akavati vala vemratere, “Kididi nimutio, ‘Sinavona mwitikijo weringane huvu he Israeli, he mntu neri mmwe.’ 11Nami nimutio, ‘Vajinki venefuma kibuka izuva na kigwa izuva, vaze kuikaa ne Abrahamu ne Isaki ne Yakobo he vufumwa vwa uko wanga; 12mira vana va kifumwa venetaghwa na he kija cha uko nze, niho heneketa kuwela na kukereresa majegho.’” 13Yesu akamti ula akida, “Kutongire; kikoloke sa vuntu weitikije!” Ula mndima wakwe akabanda saa ila ila.
Mkwewe Petro na vangi vajinki vebanjwa
(Mrk. 1:29-34; Luk. 4:38-41)
14Yesu ekifika kaa hakwe Petro, akamvona mkwewe Petro, mlala wavo mche wakwe, eshinjie he Kitanda, e muwaji wa isha. 15Akamkunta mkono, isha likasea; akavuka akavatumikia.
16Hekioka chahemagheri vakamwetie vajinki vegurirwe ni mpepo, naye akajifunya kwa kiteto chakwe; akavabanja na vala vewajwa vose, 17nesa kikoloke kila chetetiwe ni mroti Yesaya, ekiti,
“Ye mwenye eghuhie vusoka vwetu,
Na kutika mawaji etu.”
Mighesho itara he vala veneoka varateri
(Luk. 9:57-62)
18Yesu ekivona mavungano majinki vekimjunguluka, akaazera kukelanya na sela. 19Mwandiki mmwe akamswia, akamti, “Mcheji, ninekuratera hantu hose wetonga.” 20Yesu akamti, “Vibarwe vina makongo, na madeghe a wanga ena mashasha, mira Mwana wa Mntu tena ha kuyaja mtwi wakwe.” 21Ungiwa he varateri vakwe akamti, “Mfumwa, ronganikundija nitonge niremjika vava.” 22Mira Yesu akamti, “Niratera. Shigha vefwie vajike vefwie vavo!”
Kubohia nkungu na bahari vihuje
(Mrk. 4:35-41; Luk. 8:22-25)
23Akaingia he ngilawa, na varateri vakwe vakamratera. 24Hakaketa nkungu mbaha he bahari, ngilawa ikaenda kufinikirwa ni mpombe; naye eshinjie lughohe. 25Varateri vakwe vakamswia, vakamvusha, vekiti, “Mfumwa, tukije, tuteka.” 26Akavati, “Unywi va mwitikijo mghere, hanini mwesikia vogha?” Hala indi akavuka, akabohia nkungu na bahari; hakahuja chwi. 27Vala vantu vakamaka, vekiti, “Ni mntu ani uu, hata nkungu na bahari vyemsikia?”
Vagerasi vena mpepo
(Mrk. 5:1-20; Luk. 8:26-39)
28Vekifika sela ila he isanga la Vagerasi, vantu veri vena mpepo, vakakintana naye, vefuma he mbira, vakai mno, neri mntu esiidime kuvechija he nzia ila. 29Niho vakalonza vekiti, “Tunani nawe Mwana wa Mrungu? Kana weteza kuturisha vwasi igheri letu lesinafika?” 30Hekina ifio la nguve nyingi lekila hae navo. 31Jila mpepo jikamsemba jekiti, “Kakicha utufunya, utukundije tuingie he lila ifio la nguve.” 32Akajiti, “Tongani!” Jikafuma; jikaingia he nguve. Ifio lose likajinka, likasea he kijevu mhaka he bahari, jikafwia he mpombe. 33Varisha vakaaha, vakatonga noko he muzi, vakaghamba vyose, hata mburi ya vala venye mpepo. 34Niho vantu vose va ula muzi vakafuma, vakatonga kumzana Yesu. Vekinamvone vakamsemba iti avuke he isanga lavo.
Attualmente Selezionati:
MATAYO 8: CHSUNT67
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Chasu New Testament © Bible Society of Tanzania, 1967.