Shitatiko 4
4
Kaina na Abele
1Andama walalile na Eva mukazendi ku wulili, pe mukazendi wemitile. Niho abelekele mwana wa mulume, pe Eva wambile ngayi, “Naliwaninakale mwana wa mulume ha kuyavwa kwa Nyambi ya Ngula.” Pe wamutumbile Kaina. 2Munyima ya matena niho kami abelekele mwana wa mulume ou atumbile ngayi, “Abele.” Mukonzo wa Kaina. Abele wengile mulishani wa bambelele, ngoboni Kaina wengile ndimi. 3Munyima ya matena Kaina watwalile kuli Nyambi ya Ngula ntupu yanebye atezele. 4#Bah 11:4. Niho Abele naye kami atwalile kuli Nyambi ya Ngula ntupu ya mweli wa mwana mbelele wamu litanga lyendi. Wamuzihile pe wapanine bimamo byabiwahe hamo na mazi wendi. Nyambi ya Ngula wawahililile pe watambwile nkombela ya Abele, 5ngoboni wakanine Kaina na ntupu yendi. Pe Kaina wapilamine shikuma na lupala lwakakabalile na wukali. 6Nyambi ya Ngula wambile kuli Kaina ngayi, “Kati shumangani unapilamini? Shumangani unakakabalili ku lupala? 7Shinga watenda shiwahe, kati shinga kutambuliwa wufwako ndi? Ngoboni ndaba unatende shibi, wubi ukushinga kukukoneneka, unakubelamini ku shipana shobe ngo shimbwi ukushinga ku kukwata. Ngoboni uku fwanina kuwukoma.”
8 #
Mat 23:35; Luka 11:51; 1Yowa 3:12. Mutena wamina Kaina wambile kuli Abele mukonzo wendi ngayi, “Tuye na kwenda enda mu mfuba.” Oho bekalile mu mfuba Kaina wafutulukilile mukonzo wendi pe wa muzihile.
9Pe Nyambi ya Ngula wepwile Kaina ngayi, “Mukonzowobe Abele ulikuti?”
Kaina wakumbwile ngayi, “Nami kulimuka nifwako. Kati ami nengi mukakulama mukonzowami ndi?”
10 #
Bah 12:24. Niho Nyambi ya Ngula ambile ngayi, “Unatende shumangani? Mukeza wa mukonzowobe unazihi mponde uli na kulilila hanci kukwami. 11Haya uli wa kukutiwa ku limvu, pe ukatandiwa ha limvu elye linazaba na mukeza wa mukonzowobe ngonehe linayahamishi kanwa kalyo na kuwumina oho wamuzihile. 12Wakashanga mbuto yobe, limvu kukakumeneshela mbuto lifwako, kami ukenga wakubula munzi na nyambangizi hano hanci.”
13Kaina wambile kuli Nyambi ya Ngula ngayi, “Aka kashushwilo kanengi kakanene shikuma kukwami. 14Haya uli na kuntanda muno mu litunga kufuma ku meho wobe. Nikenga wakubula munzi na nyambangizi hano hanci, kami muntu nimwendi ukangwana ukanziha.”
15Ngoboni Nyambi ya Ngula wambile kukwendi ngayi, “Byo, ndi muntu ukakuziha bantu mutanu na babili bakazihiwa kubweshela wubi na wubi.” Niho Nyambi ya Ngula ayakile limango hali Kaina lya ku monesha ngayi muntu nimwendi ukamuwana hinga akamuziha. 16Niho Kaina afumine ku meho a Nyambi ya Ngula, wakazikile ku litunga lya Nondi, ku mushamuko wa mfuba ya Endeni.
Bazukulya Kaina
17Kaina walalile na mukazendi ku wulili, wemitile niho abelekele mwana lizina lyendi Inoki. Niho Kaina azikile munzi wawutumbile lizina lya mwanendi Inoki. 18Inoki wabelekele mwana wa mulume wamutumbile ngayi Ilandi. Ilandi wabelekele Mehuyale. Mehuyale wabelekele Metushayela. Metushayela wabelekele Lameki. 19Lameki wayekele bakazi babili, Anda na Zila. 20Anda wabelekele Yambalu, ou wengile nkaka ya balishani babimuna, bekalilenga mu zintanda. 21Mukonzo wendi wengile Yumbalu, ou wengile tata bangomba bambetelenga tumbuli na tunamitolilo. 22Zila wabelekele Tumbalu Kaina, ou wengile mfuzi wa bishebezesho nimwabyo ha lubemba naha byondo. Mpanza Tumbalu Kaina wengile Naama.
23Lameki wambile ku bakazendi ngayi,
“Bakazami, Anda na Zila, nyuvwililenu.
Ami nazihi muntu ndaba wandemeka,
namuzihi ou ndumbana#4:23 Lizu elye mu Shihebelu, bafwako kwamba ndumbana wakanuke bakwamba uya wakukalamana mu nzita. ndaba wankama.
24Ndi myoyo mutanu na yibili yikuyumbiwa ha kuziha Kaina,
pe myoyo 77 yika yumbiwa ndi muntu ukunziha.”
Sheta na Inoki
25Andama walanganine na mukazendi kami ku wulili, pe wabelekele mwana wa mulume wamina. Niho amutumbile ngayi, “Sheta, kutontolola ngayi Nyambi unampana mwana wa mulume wa kuhingisha muli Abele ou azihile Kaina.” 26Sheta wabelekele mwana wa mulume wamutumbile ngayi Enoshi. Ha shikati shiyo bantu batatikile kulemesha Nyambi ya Ngula.
Attualmente Selezionati:
Shitatiko 4: LLK
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Libuka Lya Kuyela © Bible Society of Zambia, 2020.