Genesis 4
4
Kain na Abel
1Nu Adam wa rara pomukazendu we Eva, neye wa rira otjingundi, a panduka Kain, na tja: “Ami mba munu omuzandu puna ombatero ya Muhona.” Neye we mu rukire Kain. 2Kombunda eye wa panduka omuangu we Abel. Abel wa ri omurise worupanda rwozonḓu, nu Kain wa ri omuungure wotjikunino. 3Nu kombunda yoruveze rworive Kain wa punguhira Muhona ombunguhiro yovihape vyotjikunino. 4#Heb 11:4Abel wina wa punguha omaveri wozonyanda morupanda rwe notuehe twazo wina. Nu Muhona wa ri nonyuṋe mu Abel nombunguhiro ye; 5nungwari ka ri nonyuṋe mu Kain nombunguhiro ye. Kain opa pindikira tjinene, na tivaurisa omurungu we. 6Nu Muhona wa tja ku Kain: “Mo pindikire tjike, nomurungu woye mo u tivaurisire tjike? 7Tjita imbi ovisemba nami me kara nonyuṋe move, nungwari tji wa tjiti ouhasemba, ouvi wa haama pomuvero womutima woye awe ku yenge, nungwari nga rire ove ngu mo honapara kombanda yawo.”
8 #
Mt 23:35; Lk 11:51; 1Jn 3:12 Kain wa hungira komuangu we Abel a tja: “Indjo, tu yende mokuti!” Nowo ngunda averi mokuti, Kain otja sekamena omuangu we Abel ne mu zepa.
9Nu Muhona arire tja pura ku Kain a tja: “Omuangu woye Abel u ri pi?”
Neye wa zira a tja: “Ami hi mu i; indu hapo owami omurise womuangu wandje are?”
10 #
Heb 12:24
Nu Muhona wa tja: “Wa tjiti tjike nai? Ombiṋdu yomuangu woye mai uru ku ami okuza mehi. 11Nambano ami me twako osengiro kombanda yoye kokutja ehi ari he ku hapisire ovikurya rukwao. Oro tjinga ara paturura otjinyo tjaro okukambura ombinḓu yomuangu woye meke roye. 12Mo ungura tjinene nomasa otjikunino tjoye, nu katji nokukuhapisira ovikurya; otji mo rire omuhangauke nomuhinaha kombanda yehi.”
13Kain opa tjera nai ku Muhona: “Omberero yandje onḓeu tjinene okuitjinda. 14Tara, ndinondi mo ndji ramba mehi, na komurungu woye; notji me rire omuhinaha nomuhangauke kombanda yehi. Nu auhe ngu me ndji munu me ndji zepa.”
15Nungwari Muhona we mu zira a tja: “Kako! Ngamwa auhe ngu me ku zepa ma verwa povikando hambombari.” Muhona arire tja twako otjihako ku Kain kutja ape ha ningi ngu me mu zepa, tja hakaene na ye. 16Nu Kain opa zira po komurungu wa Muhona na katura mehi ra Nod, ndi mari hee kutja “Oruveze ku ku hi neha nu kouhangauke,” komukuma wakuṱa komuhuka wa Eden.
Ozondekurona za Kain
17Kain wa rara pomukazendu we; neye a rire otjingundi na panduka omuzandu ngwa rukwa Enok. Nu Kain wa tunga otjihuro ne tji rukire mena romuzandu we Enok. 18Enok wa ri ihe ya Irad, Irad wa ri ihe ya Mehujael, Mehujael wa ri ihe ya Metusael, nu Metusael wa ri ihe ya Lamek. 19Lamek wa kupire ovakazendu vevari, ena romukazendu ingwi omunene wa ri Ada, nu ingwi omuṱiṱi wa ri Sila. 20Nu Ada wa panduka Jabal, ngwa ri ihe mukururume wa imba mba turire mozondanda nokurisa ovinamuinyo. 21Nena romuangu we ra ri Jubal, ngwa ri ihe mukururume wovanyande vovihumba nozohiva. 22Nu Sila wina wa panduka omuzandu Tubal-Kain, ngwa ri ihe mukururume wovahambure voviṋa avihe vyongoporo novyovitenda. Nomuṱena wa Tubal-Kain wa ri Naama.
23Lamek wa tja kovakazendu ve:
“Ada na Sila, purateneye ku ami!
Vakazendu va Lamek, purateneye kembo randje!
Tjiri, ami me zepa omurumendu ngu me ndji harisa otjito,
nomuzandu ngu me ndji tono okundjipitisa omazeze.
24Ngu ma tono Kain, ma verwa povikando hambombari.
Nungwari ngu ma tono Lamek,
tjiri ma verwa povikando omirongo hambombari na hambombari.”
Set na Enos
25Adam wa rara pomukazendu we rukwao; neye wa panduka omuzandu ne mu ruku Set. Orondu eye tjinga a tja: “Ndjambi we ndji pe omuatje warwe moruveze rwa Abel ngwa ṱa i Kain.” 26Nu Set wina wa ri nomuzandu ngwa rukwa Enos. Okuzambo ovandu otji va uta okuisana ena ra Muhona mongumbiro.
Attualmente Selezionati:
Genesis 4: HRR-UNI
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Herero Revision Bible © Bible Society in Namibia, 2021.