Johnga 10
10
1Hisgexjina, hisgexjina hinigawina, hisha inke jhasga‐hojhi jhirobeja hokawarnigi, eshi hijahi nige hoti‐hokewegi, e wamanukeisha egi wankshig‐d’ehikeisha herenana.
2Eshi hisha jhirobeja hokewegi, jhasga‐hirakarara herenana.
3Jhirob‐hirakarara giruhasnana, egi jhasgara hora naxguiranana egi jhasga ewarnira rashra warajnana egi hironag hihinab‐hiranana.
4Egi jaja jhasga warnira hihinab‐wagigiga, E wajoginianaga egi jhasgara hironag hiranana, hora higinanke esge.
5Egi inke wawiperes‐hiranira inke wawironag‐hiraninana, eshi gigias‐hiranana, inke hora higininanke inke wawiperesninanke esge.
6Hisgera de‐e Jesus wawigena, egi inke naxgu hiranina jaguisha wawirokit’ajegi.
7Egi shige Jesus wawagena: Hisgexjina, hisgexjina hinigawina, jhasga jhirobra Newinena.
8Jarnaga joweharegi jira wamanukairena egi wankshigd’ehike hirena. Eshi jhasgara inke warnaxguinanina.
9Newinena jhirobra, Ne‐egi hisha hokewegishi wankshig‐inkjanena, egi hokewegi egi wokana hiekjanena.
10Wamanukera wamanu wagiu hajirena egi wankshigd’ehi egi maisinsh‐wahi. Nehajina e wankshig‐inekjege, egi e hiraijera roha wankshighoi harninekjege.
11Jhasga hirakara phira Newinena. Jhasga hirakara phira jhasgara e wagit’ena.
12Eshi e hisha warajegi egi inke jhasga hirakaraisha herenina, jhasgara inke e‐warninijege, shungjangra hisha huhau hajagi, jhasgara wat’unanana egi giasnana, egi shungjangra jhasgara warukosnana egi jhasgara hoeranana.
13Warajega giasnana wareisha waunjege esge, egi inke jhasgara washa wiranaininana.
14Jhasga hirakara phira Newinena, egi jhasga warnira hiaperessana, egi hinkaraperes‐nankshana newarnira.
15Hianjihiwira hinperes‐nagra she‐e hikisge, Hianjihiwira nishge hiaperes‐hajena, egi jhasgara e wagit’ena.
16Egi jhasga hijane harnira, inke hornihe eegi hereranina, she‐e hishge warnihakirikjanena egi ho‐harnira naixgunekjanena, egi hornihe hishankirakjanena egi jhasga‐hirakarara hishankirakjanena.
17Esge Jajiga woigixetena wankshighoi harnira eegi hakarat’umbjanena, egi shige wankshighoira hakurusikjanena.
18Inkisha wankshighoira hingirusnikjanena, eshi wankshighoi harnira eegi nexji hakarat’umbshana. Homashja harnira wankshighoira eegi hakarat’umbshana egi homashja harnira shige wankshighoira hakuruskjanena. Uwashi de‐e Jajiga eja hodussana.
19Deshesge e‐gi, shige Judra nupihi‐khinena.
20Egi roha wena: Waxopinishishig hisha harnijena, egi wanaxiowankjena, jagu‐u harnanaxgu‐harajeshe?
21Hijanera wairena: Inke de‐e hoit’era waxopinishishig hisha harni warnijena. Waxopinishishigra hisha hishjasura wagiruhas ruxurugnashe hisha hishjaraningkhi?
22Egi Jerusalem‐eja wohokhu‐hojhixete wakanjankkaragiregi worujxetera herena, egi maninegi herena.
23Egi Jesus wohokhu‐hojhixeteja manijena, Salomon hakohi harnira higairera eja.
24Egi Judra hahiranaga hogigix nashinena, egi wagairena: Jajaixji hoja wokibahi hinagikerewishe? Kristus neninegishi wogisogji hungiragwire.
25Jesus wornigiharna: Hornigitagwishare, egi inke harnanaxguwinina. Wore hauanjane Jajiga rash harnira wagiu‐hajena she‐e hunagnankshana.
26Eshi inke harnanaxguwinina, inke jhasga ne‐harniniwinira esge, shesge hinigawishare.
27Jhasga warnira hora naixguineshununa, egi ne‐waiaperes‐shana egi hiroinag‐hireshununa.
28Egi wankshighoi hisgeja wawak’una, egi inkaga d’airanikjanena, egi inke hisha nab‐harninegi higirushoroj hiranikjanena.
29Jajiga E woik’una, jarnagagre eshana xetena, egi inke hisha rushoroj ruxurugnina Jajiga nab‐harnieja.
30Ne‐winianaga egi Jajiga hishankira harniwina.
31Egi Judra shige ini rus‐hiranaga ini‐hirojinainena.
32Jesus wornigiharna: Wore phira roha ningiuwina Jajiga eja howaji, wore jaguisha hawau ini‐hiroirajinanash’i harajeshe?
33Judra hornigihairena wairena: Wore phi sh’ungi inke she‐e hawau ini‐hironiji‐nainiajena, eshi Maura sharaxjashguni rajege esge, egi Ne wankshig‐ranigaja, Mau rakik’u‐rajege.
34Jesus wornigiharna: Jasge inke woehi wowagax hashiniwieja, hinigawinishe, Mau raniwina?
35Mau hireshe wigegi, eja Mau hoit’era wirajina, egi wowagaxra inke rushe phinina.
36She‐e waragawishe hisha Hianjihiwira wakanjankhira, egi manegi howahuhira: Ne Maura sharaxjashgunina hiragawi, Maura Hinigra Newinena hihera esge.
37Jajiga wore harnira inke haunigi, inke harnaixguwinine.
38Eshi hauhajegi inke harnainaxguwinishge, wore haura e harnaxguwine, hiraperesjawina egi harnanaxgunkjawina Hianjihiwira hunjhijena egi Hianjihiwira wajhihajera.
39Esge shige harukosnainena, egi rugash‐rehirena.
40Egi shige nigiowarena Jordan ageja hajinja jorni Johnga ni‐wawaxunjera eja, egi eja hiwusharna.
41Egi roha hirahina egi wagairena: Johnga inke washa wowakanjank unina, eshi Johnga washa wang de‐e higera, harnaj hisgena.
42Egi roha harnaxguna eja.
Attualmente Selezionati:
Johnga 10: WIN
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Published by the American Bible Society in 1907.