Dibandu 16
16
Duburu duIsmael
1Sarai, mugatsi Abram asamamuburila baana. Sarai amaba na muviga umugetu agumaba muisi Egypte, diina diandi Agar. 2Sarai amatsingula Abram rie: Laba Fumu amapaga yinguma; nyiguveyi musuga ufubana yitsiga na muviga ami, tanguji ombu gandi nyudilila baana.
Abram amasinga adi Sarai amavosa. 3Yiotsu ayi Abram amatsanina yigumi yibilima o bulongu buCanaan, Sarai mugatsi andi, amabonga muviga andi Agar agumaba muisi Egypte na amamuwakisa ombu mulumi andi Abram. 4Abram amafubana yitsiga na Agar agumadila dimi. Anolaba yiri amadila dimi, amalensa Sarai. 5Kabogu Sarai amatatila Abram rie: Ndeʼ guitombisi ulensu. Nyimaguvega muviga ami, laba yiotsu ayi ejabi yiri aka na dimi yika ulensa endensi. Fumu jaʼ beni abi nsonsi va gari jetu nagu.
6Abram amagabusila Sarai rie: Ndeʼ gugaa na musuga ombu muviga agu? Muvayili adi guirondi, kabogu Sarai amabanda umukuana; Agar amamurina vala. 7Yiansa yiFumu yimamurasuna o kumu va mugula uyiduna yimamba, ayivu va mugula unsila jiChour. 8Yiansa yimamuwivula rie: Agar muviga uSarai, aguʼ guiruyisini? Aguʼ guiwendisini?
Agar amawagula rie: Urina nyirini Fumu ami Sarai. 9Yiansa yiFumu yimamuruma rie: Gabuga ombu fumu agu nokesunsa va gusu andi. 10Yiansa yiFumu yimamutsingula rie: Nyufunisa bategula bagu te na bagorungula utalu. 11Yiansa yiFumu yimamutsingula rie: Laba gubura muana dibaala na gumuluga diina diIsmael; Fumu amalaba munyongu agu. 12Ismael obanganga pinsa nderi buru jimusiru; otoyisa batu bapuela na batu bapuela botoga nandi; ovaga mulaku andi vala na milaku mibaana bataji bandi.
13Yiotsu yina Agar amanengilanga Fumu, El-Roi; amawivula yiansa rie: Tsiri vava nyimalabila Fumu Nsambi agumandaba? 14Amaluga yiduna yieni Lahai-Roi; ayimaba va gari Cades na Bered. 15Agar amaburila Abram muana dibaala. Abram amaluga muana agu Agar amamuburila Ismael. 16Abram amaba na magumidunana na bilima bisiamunu ava Agar amaburila Ismael.
Attualmente Selezionati:
Dibandu 16: PUU1992
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
La sainte Bible en langue Yipunu © Alliance Biblique du Cameroun, 1992.