Dibandu 20
20
Abraham na Abimelek
1Abraham amagusuga vana amayenawenda o Neguev; amayetsana va gari Cades na Chour, diwendi rie: Amaviosa mua temu o bulongu buGuerar. 2Abraham amavosa mu diambu dimugatsi andi Sara rie: Avu yibusi yiami. Kabogu Abimelek agumaba kaga jiGuerar amamupatula Sara. 3Mbana Nsambi amalabana mukolu o ndosi na Abimelek na amamutsingula rie: Gufu mu diambu dimugetu agu gumabonga, ana mulumi. 4Abimelek agusamafubana yitsiga na Sara, amagamuga rie: Fumu gubunga nesi dilongu adivu disungama? 5Jandi asamamfurila rie: Avu yibusi yiami? Na Sara jaʼ beni asamamfurila rie: Avu katsi ami? Nyimadivaga na murima usunduga, ngaajaba.
6Muna ndosi eni Nsambi amabuesa rie: Nyijabi gumadivaga na murima usunduga; nyimagugubitsa yiri gugovaga dibi va gusu ami. La dibandu ngaasingisila yiri gufubana yitsiga nandi. 7Tsie gabusi mugatsi ngana. Jandi avu mubiyitsi, ogusambilila na gudila monyu. Tumba pa gugogabusa mugetu eni, jaba rie: gufu na abagu botsu wandi.
8Abimelek amarelama kedi jineni amanengila basalitsi bandi botsu na amabatsingula mambu meni motsu; baneni bandi bamagaangu na goma jineni. 9Abimelek amanengila Abraham wandi na amamuwivula rie: Ayina yi? Dibi yi nyimaguvayila yiri gutulasa maguga mamunongu egugu, jetu na batu bami? Disaawelimina uvaga nana gumapayila. 10Mbana amawivula Abraham rie: Dibandu yi gumavayila nana?
11Abraham amawagula rie: Nyimatasa yiri batu bebaba bagaa na goma Nsambi diurungula uba bomboka mu diambu dimugatsi ami. 12Va julu vana aji yibusi yiami, avu muana mugetu utaji ami tumba tugaa nguji mosi; la dibandu nyimamuwelila. 13Ava Nsambi amandinsila vala na ndagu taji ami nyimatsingula Sara rie: Gulu diboti adi gupayila adidi rie: mbura tsiotsu atsi tuyenawendanga gukaposila rie: Avu katsi ami.
14Abimelek amawakisa Abraham mulendu ubindombu na binsabi na bangombi na basalitsi bababaala na babagetu; amamugabusila mugatsi andi Sara. 15Mbana Abimelek amavosa nandi rie: Bulongu buami abuna; tsana ava ndeʼ beni guirondi.
16Na amatsingula Sara rie: Laba nyiveyi tosini mbongu tsilora jivema ombu katsi agu; tsionyi tsiutsindula mbela agu va misu mabatu botsu.
17Abraham amasambila Nsambi, Nsambi amabelusa Abimelek, na mugatsi andi na basalitsi bandi babagetu yiri borungula uburanga. 18Mu mbari Fumu amalevaga bisi ndagu Abimelek botsu binguma, mu diambu diSara mugatsi uAbraham.
Attualmente Selezionati:
Dibandu 20: PUU1992
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
La sainte Bible en langue Yipunu © Alliance Biblique du Cameroun, 1992.