Dibandu 24
24
Diwela diIsaac na Rebecca
1Abraham amanuna tindi ununa na Fumu amamugabilanga miula mu mambu motsu. 2Yilumbu yimosi Abraham amatsingula yivunda yibasalitsi bandi agumaba mukelisi ubima biandi biotsu rie: Vangana pangini nami, 3na jiwarisi na pesi jidiina diFumu, Nsambi julu na butamba, yiri gugowelila muana ami mugatsi va gari banumba baCanaan agu nyitsanini, 4tumba wenda o bulongu buami o yiari yiami uyewelila muana ami Isaac mugatsi.
5Musalitsi amamuwagula rie: Tanguji mugetu agogaru uruga nami o bulongu buebubu, je nyurungula ubega muana agu o bulongu abu gumapalila? 6Abraham amamuwagula rie: Tsatsabi: Guyabega muana ami udibaala guna! 7Fumu Nsambi aguvu o julu, agumapalisa o ndagu taji ami na o bulongu buami amavangana nami na amajiwarisa na pesi; amavosa rie: Nyuvega bategula bagu bulongu buebubu. Jaʼ beni osindiga yiansa yiandi o gusu agu; aguna guyawelila muana ami udibaala mugatsi. 8Pa mugetu agerondi uruga nagu diambu digomueba va julu muru agu gumadugusu pangini; viaga, guyabega muana ami guna.
9Musalitsi amavangana pangini na fumu andi Abraham na amajiwarisa na pesi rie: Nyudugusu mambu meni motsu. 10Musalitsi amabonga yigumi yisamo tsifumu andi, mbana amayenawenda na biboti bifumu andi. Anorelama amasogama uwenda o Mesopotamie o musiengi uNahor.
11Anotola o tsomu dimbu bebeli na yiduna yimamba amasikiga basamo. Dimaba diweru ditsisiga va temu aji bagetu beyeteganga mamba. 12Jandi amasambila rie: Fumu, Nsambi fumu ami Abraham, kululuati, payili adi nyirondi namunyi, vayila fumu ami Abraham diboti! 13Laba nyivu va mugula yiduna yimamba, namapapa banumba bamusiengi boruganga uyitega mamba. 14Numba aji nyuvonda rie: Kokolu peyi mua mamba! Jaʼ beni akawagula rie: Nu, na nyunuisa basamo bagu wandi! Jandi oba numba aji gumasolila musalitsi agu Isaac! Mbana nyujaba yiri gumavayila fumu ami diboti.
15Mbe asakamana usambila, Rebecca muana mugetu uBetouel muana dibaala uMilka musalitsi Nahor muana nguji Abraham, amaruga na yitegulu yiandi va disambaka. 16Amaba tindi muboti na amaba tsiemi. Amasunduga o yiduna yimamba, amabasa yitegulu yiandi mbana amasabuga. 17Musalitsi Abraham amamubengusana na amamuvonda rie: Kokolu, peyi mua mamba monu. 18Amawagula rie: Nu, fumu ami.
Amasundila umuwakisa yitegulu yiandi nomu vega mamba monu. 19Anomana umu vega mamba monu amabuela rie: Nyuteyila basamo bagu wandi te na botsu bonu.
20Amawitila yitegulu yiandi mu yinuinu yibibulu na amamuewenda mbangu uyetega mamba; amateyila basamo botsu. 21Musalitsi eni amamugengila yisuisu tsiri uvosa diambu, amaviva ujaba yeri Fumu amabuejisa mulingu andi. 22Basamo banomana unu, musalitsi amabonga moru ulora (utsira u-uonyi umaba garama yisiamunu) na milunga mibeji (utsira umionyi umaba kama garama). 23Mbana ama-muwivula rie: Ndeʼ muana nyi? Nsinguliati! Kokolu va mbura usilimina o ndagu taji agu?
24Amavosa rie: Menu muana Betouel muana dibaala uMilka na Nahor.
25Amabuela rie: Ombu getu biguji bibibulu bivu ne uviolila na vavu mbura usilimina wandi.
26Mbana musalitsi eni amagudama va tsi va gusu Fumu, 27amasambila rie: Diboti ombu Fumu aguvu Nsambi fumu ami Abraham, jandi amalasa tindi maboti mandi ombu fumu ami! Va julu vana Fumu amambeganga te no ndagu biburu bifumu ami.
28Amawenda mbangu o ndagu nguji andi uyebatsingula mambu meni motsu. 29Kabogu Rebecca amaba na muana nguji udibaala, diina diandi Laban. Laban amawenda mbangu uyerasuna dibaala dieni o yiduna yimamba. 30Yiotsu ayi Laban amalabila moru na milunga amimaba mu miogu miyibusi yiandi nogulu posulu tsidibaala dieni amamurasuna va mugula basamo o yiari yiyiduna yimamba. 31Laban amavosa rie: Tʼwendi, ndeʼ aguvu na miula miFumu! Dibandu yi gusialila va gusu kana? Nyimagukunsila ndagu nesi mbura jibasamo.
32Musalitsi Abraham amatola o ndagu ogu; Laban amasundusa basamo mifuna na amabalisila mbana amavega batu botsu mamba ususa makulu. 33Mbana amamugabila biguji tumba amavosa rie: Ngoleji te na nyuvosa adivu nami. Laban amavosa rie: Ka vosa! 34Kabogu amawaka rie: Nyivu musalitsi uAbraham. 35Fumu amamuviosulila miula te na fumu ami avu yisina yineni. Amamuvega bindombu na binsabi na bangombi na lora jivema na lora na basalitsi bababaala na babagetu na basamo na baburu. 36Sara, mugatsi fumu ami nesi mu bununu buandi, amaburila fumu ami muana udibaala, fumu ami amawakisa muana eni biandi biotsu. 37Fumu ami amandevisa pesi ava amavosila rie: Guyawelila muana ami mugatsi va gari banumba baCanaan, agu nyitsanini, 38tumba wenda o bulongu buami nombu taji ami nombu yifumba yiami noyewelila muana ami mugatsi. 39Nyimatsingula fumu ami rie: Tanguji mugetu agogaru uruga. 40Amawagula rie: Fumu oyilingingi nami osindiga yiansa yiandi o gusu agu nobuejisa mulingu agu, gukayewelila muana ami mugatsi mu yifumba yiami, sinsa viri o ndagu taji ami. 41Yiotsu ayi gumayelabana na yifumba yiami diambu digoba va julu muru agu; pa bagedisingi digomueba va julu muru agu gumadugusu pangini. 42Namunyi nsitola o yiduna yimamba na nsisambila rie: Fumu, Nsambi fumu ami Abraham, pa guisingi ubuejisa mulingu ami, 43laba nyivu va mugula yiduna yimamba, numba ajiuruga uyitega mamba aji nyuvonda rie: Kokolu, peyi mua mamba monu 44na jandi okwagula rie: Nu, na nyunuisa basamo bagu wandi, jandi oba mugatsi agu Fumu amasolila muana dibaala ufumu ami! 45Mbe nyisakamana usambila o tsi murima ami, Rebecca atsilabana na yitegulu yiandi va disambaka; atsisunduga o yiduna yimamba na atsitega mamba. Nsimuvonda rie: Kokolu, peyi mua mamba monu. 46Atsisunda udiamisa yitegulu yiandi ayibetsi va disambaka na atsivosa rie: Nu, na nyunuisa basamo bagu wandi. Nsinu na atsinuisa basamo bami wandi. 47Nsimuwivula rie: Ndeʼ muana nyi? Atsikwagula rie: Menu muana Betouel muana dibaala uNahor na Milka. Nsimuduisa moru mu mbasu na milunga mu miogu miandi. 48Mbana nsigeluga na nsigudama va gusu Fumu na nsigabusila Fumu aguvu Nsambi fumu ami Abraham diboti! Nsimugabusila diboti mu mbari amakwendisa na buranga te na nyimadilila muana udibaala ufumu ami mugatsi agu nyumubeyila. 49Pa duirondi usinga diambu diedidi nondasa ubueji namunyi nsingulianu; pa dugerondi usingulianu wandi, mbana nyuyenakumanga yiari na yiari.
50Laban na Betouel bamawagula rie: Diambu diedidi diruyili ombu Fumu, jetu tugowaka yiri divu diwelimina vo digaa diwelimina. 51Rebecca jandi guna, mubongi yenawendanganu. Abi mugatsi umuana dibaala ufumu agu nana Fumu amavosila.
52Musalitsi Abraham anogulu kabusulu tsiogu amagudama va tsi va gusu Fumu. 53Mbana amapalisa bima bilora jivema na bilora na biduaru abi amavega Rebecca; na amavega muana nguji andi na nguji andi madila mapuela wandi. 54Motsu mana manovioga musalitsi Abraham na batu bandi bamaji na bamanu; mbana bamasilama.
Ava kedi musalitsi Abraham amavosa na muana nguji na nguji Rebecca rie: Kabusianu ombu fumu ami. 55Bamamuwaka rie: Muana aletsana mua temu netu, nesi yigumi yibilumbu mbana gukayenawenda.
56Amabawagula rie: Duyansinsa mu mbari Fumu amabuejisa mulingu ami; kabusianu uyenawenda ombu fumu ami. 57Mbana bamawagula rie: Tunengilianu muana, tukamuwivulanu ditasa diandi.
58Kobogu bamanengila Rebecca na bamamuwivula rie: Guirondi uwenda na dibaala diedidi? Amawagula rie: Nyiina. 59Mbana bamawensa Rebecca na ndetsi andi, bamayenawenda na musalitsi uAbraham na batu bandi. 60Bamagabila Rebecca miula na bamamutsingula rie:
Aa yibusi yietu,
ndeʼ gubanganga nguji
jibivevi bibatosini;
bategula bagu
boba balungitsi
tsiri abamabetsu.
61Rebecca na basalitsi bandi babagetu bamanangama mu basamo na bamasogama va mosi na musalitsi uAbraham.
62Isaac amaruyila o yiduna yimamba ayinengulungu Lahai-Roi agu amatsaninanga o yiari yiNeguev. 63Tsisiga mosi Isaac amayenalinganga o kumu na anobuaga misu amalabilila basamo uruga beruyi. 64Rebecca wandi amabuaga misu, amalabilila Isaac na amasunduga mu samo. 65Amawivula musalitsi rie: Dibaala oyilingi o kumu, anyi? Musalitsi amawagula rie: Aguna fumu ami.
Kabogu amabonga tsanda ukegumba yinsi. 66Musalitsi amatsingula Isaac mambu motsu ama amavaganga. 67Isaac amabega Rebecca o ndagu jitsanda jinguji andi Sara; amakotisa Rebecca na amamuronda tindi uronda. Anana Isaac amabembugulu nguji andi anofu.
Attualmente Selezionati:
Dibandu 24: PUU1992
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
La sainte Bible en langue Yipunu © Alliance Biblique du Cameroun, 1992.