Lŭka 23

Jezŭ d́ŏ Pilăto Ahlò̆mò̄ nu

(Mattĕo 27.1,2,11-14; Mărko 15.1-5; Zowănnī 18.28-38)

1Bija aboahò tòcò wè̄hto kî leigè Jezŭ d́ŏ Pilăto ahlò̆mò̄, 2kî sawè̄gè Zò lò dèkèḿè amŏamo kî cò d́ògè, “Wa tcahtîgè bija ajo dèbwè mèsèsòwò̄hta htĭgepho tòcò, Zè mèd́îd́ăgè bija aki i Caĕsarè dèthwè̆ tòcò nu kî Cò d́ògè Ze ne Krĭstu, htè Saphra nu,” cò d́ò do.

3Pilăto d́è̆tcagè Jezŭ, “Ni ḿîbò̄ Jŭdapho Asaphra hŏ ā?”

Jezŭ d́òscĭge cè, “Ńò d́ògè do.”

4Pilăto d́ògè Phŭgido tòcò kî bija aboahò tòcò, “Ja da tcahtî dèkèḿè d́ŏ bija ajo dèbwè alò dimĭ ńò.”

5Barasă bija aboahò tòcò kèwohtasô, “Bija ajo dèbwè nu, Zô thôithò̆i bija gā htad́ĕd́ò dè d́ŏ Judĕage thèd́è̆ge abu lò. Za tcahta b́ĕ Galilĕage kî khŏnujo ado b́ĕjo htŏ.”

Jezŭ d́ŏ Èrŏdè Ahlò̆mò̄ nu

6B́ĕ Pilăto thîhè̆b́è dè ajo d́ō, cè d́è̆tcagè bija, “Ajo dèbwè ḿî Galilĕapho ā?” 7Zî thîhè̆gè Jezŭ ò d́ŏ Èrŏdè adèŭitcai akălè̄ nu d́ō, ca b́ăhlôlegè lōwa d́ŏ Èrŏdè ò nu, kî b́èni b́ĕ Èrŏdè le ògè d́ŏ Jerŭsalèm u bu akhî nu. 8Èrŏdè tcahtî Jezŭ d́ō, za thalōthalaigè azî̄azô̄ d́o. Manè̄, zî thîhè̆hnègè lōwa awîakè̆ kî ca thaè htcahtî lōwa òjî̄gè akhoacè̆ nu. Za sascĭi d́ŏ Jezŭ gè̄ mè dèbòdèba zò hlò̆mò̄ domomo acè̆ nu. 9Cè d́è̆ òèòògè lōwa dè, barasă Jezŭ tò d́ògegè cè dimĭ ńò. 10Phŭgido tòcò kî Skrĭbāpho tòcò wè̄hto sawè̄gè Zò lò dèkèḿè amŏamo lò. 11Èrŏdè kî ci klĭpho tòcò htèkè̆htèô, mèjūlakăkè hwă Cè d́o, agudulă cò thòhtani lōwa scid́ŏdo tèb́è kî ca b́ăhlôgegè lōwa d́ŏ Pilăto ò tapla b́ĕ. 12Èrŏdè kî Pilăto ḿî nòthò̆ athè̆d́ĕd́ò hlĕ aŭsu hnò̆nu, anu dini lò, cè gībwè phî̆htagè athè̆thò.

Jezŭ B́ècirrathĭ

(Mattĕo 27.15-26; Mărko 15.6-15; Zowănnī 18.39—19.16)

13Pilăto jo ladēplo hwă Phŭgido tòcò, atcaiŭidè tòcò kî bija aboahò tòcò d́ō, 14cò d́ògè lōwa tòcò, “Thĭ leigè bija ajo dèbwè d́ŏ jò ò acab́ô̆ bija ahtad́ĕd́òdè dèbwè nu. Jô htôtcad́è̆tca htŏ cè d́ŏ thĭ hlò̆mò̄ nu kî ja da panigè dèkèḿè thĭ sawè̄ Zò lò dimĭ ńò. 15Èrŏdè ḿî ḿî za da pahtîgè dèkèḿè dimĭ ńò acè̆, cè thè̆b́agegè lōwa d́ŏ jò ò jo. Bija ajo dèbwè dè mègè dèkèḿè atanib́è dèthĭ dimĭ ńò. 16Mègōnu akhoacè̆, ju gū mūhta hwă Cè d́o, ja kā b́ăhlô Cè lò,” cò d́ò lōwa tòcò do. 17(B́ĕ pwè̆ akhî nu bija b́ăhlô nènògè aladē dèkî̆dî̄ abu dèbwèbwè.)

18Bija aboahò kèwohtasô, “Mèthĭni wa ajo dèbwè jo kî b́ahlô̆htagebò̄ Barăba lò!” cò d́ò tòcò do. 19Barăba ḿîgè bija aladē dèkî̆dî̄ bu, amè gòthò̆gòrò dè kî amèthĭ bija dèbwè nu.

20Pilăto thaè b́ahlô̆htage Jezŭ acè̆ cò d́ògè lōwa tòcò tapla be, 21ḿî cè tòcò kèwohtasô, “Htalaglo Cè! Htalaglo Cè!” cò d́ògè do.

22Pilăto d́è̆tca bija aboahò thŏpla tapla, “Bija ajo dèbwè adèkèḿè ḿî danè̄? Ja da tcahtî Zè dèkèḿè amò tani dèthĭ dimĭ ńò. Mègōnu, ju mūhta hwă Cè d́ō, ja ka b́ăplè cè lò,” cò d́ò do.

23Barasă bija tòcò kèwo bogalā kî d́òsôgè Cè kè̄ b́è htalaglo thĭ lò acè̆, agudulă Cè tòcò da adĕ ani tèpwègè. 24Pilăto cirragè dè acab́ô̆ bija aboahò adèthaèni nu. 25Ca b́ahlô̆htagegè bija amè gòthò̆gòrò dè kî amèthĭ bija acè̆ aladēnī b́è dèkî̆dî̄ abu dèbwè nu kî ca ălanigè lōwa tòcò Jezŭ, acab́ô̆ cè tòcò adèthaèni ò adĕ nu.

Dèhtalaglo Jezŭ

(Mattĕo 27.32-44; Mărko 15.21-32; Zowănnī 19.17-27)

26B́ĕ cè tòcò hèhtai Jezŭ akhè̆ nu, ca panigè Simŏnè, Cerenĕopho dèbwè ò d́ŏ d́ŏbu, ze genī u bu akhî nu. Bija phò cè kî b́è̆lăgè Krusu d́ŏ ce plĕb́akho akā j́anikhĭbò̄ Jezŭ nu.

27Bija aboahò tòcò lekôgè Ze le. Amihmu tòcò lekô kî d́èla athamò̄, joha kî othootha nikhĭgè Jezŭ. 28Jezŭ tcahta cè tòcò kî d́ògè lōwa, “Ŏ Jerŭsalèm aphohmu tòcò, haibò̄ ḿè jè ḿè. Ḿî halaibò̄ thĭ ne kî thĭ pho thĭ li dòkhò̆,” Cò d́ògè lōwa do. 29“Manè̄ do, munimuthè̆ kò òkò̆ htè bija tòcò kò d́ò, ‘Ab́èhôwî ḿî amihmu asò̆dopho, adu muthèd́ŏ dakhă ńò kî ato b́oò̆ b́è abĭsèpho nu dakhă ńò tòcò nu.’ 30Anu tapla cè tòcò kò d́òkò̆, ‘Khò̆mukhòlò̆ tòcò ladēphabò̄ wo kho!’ kî ‘B́ò̆b́ibò̄ wa.’ 31Dè ajo tòcò gî̄ phî̆hta ma b́ĕ tho thĭthuḿŭ we akhè̆ d́ō, tho gē hwĕgè tapla agî̄ phî̆hta cadè̄?”

32Bija leiplogè Jezŭ dehwĕpho gībwè cab́ô̆htè za gā htalaglo thĭ lōwa nu. 33B́ĕ cè tòcò dole d́ŏ “Dèkokhwi Alle,” bija jo ami dokhlo nu, bija htalaglogè Jezŭ Krusu alò ploplo kî dehwĕpho gībwè d́ŏ Cu cukhò dòkhò̆ dèbwèbwè. 34Jezŭ d́ògè, “Ŏ Apa, b́ăplèbò̄ cè tòcò, manè̄, zè mè danè̄ nu zi dî thîhè̆ cè è̆ ńò,” Cò d́ò do. Cè tòcò bēphagè Zi scid́ŏ kî b́ogè mè̆.

35Bija tòcò sò̆hto kî tcaigè Cè b́ĕnu kî akhoane tòcò gòsè̆lèwè̄gè Cè kî d́ògè, “Zè mèhlô̆htage thè̆ bija nî̄. Zî kî ḿî b́eḿĕ Krĭstu, Kib́ĭcè rôhta dèbwè nu d́ō, Zè mèhlô̆htage d́ò̆è Ze ne,” cè tòcò d́ògè do.

36Klĭpho tòcò ḿî ḿî d́òjod́òhnăgè Cè. Ci ihta hwă lōwa thobiscihtĭ ascî d́ō 37cò d́ògè lōwa, “Nî gî̄ ḿî b́eḿĕ Jŭda Asaphra d́ō, mèhlô̆htagebò̄ Ne ne dakha!” cò d́ò lōwa do.

38Kîd́ò̆ d́ŏ Zo kokho nu, dèhwela ògè gōjo, “Ajo Ḿî Jŭdapho Asaphra.”

39Dehwĕpho aklè̆ dèbwè d́ò jūlakăkè Cè, “Nî dî ḿî Krĭstu ńò ā? Mèhlô̆htagebò̄ Ne ne kî wa papa nā!”

40Ḿî alewe dèbwè trab́agè cè, “Ni di scisăni B́ĭcè ale ńò ā? Kè̄ b́è cirra jāthôthô lò. 41Kè nu, gā khab́è dècirra acab́ô̆ gè dè mèkèḿè ò adĕ lò. Ḿî Cè nu, zè dèmèkèḿè tò ògè dimĭ ńò.” 42Hwă d́ō cò d́ò Jezŭ, “B́ĭcè, gomohtanibò̄ jè b́ĕ no doge d́ŏ Ni htĭ Ne ge nu,” cò dò lōwa do.

43Jezŭ d́ògè cè, “Jò d́ò nè adî̄ahma, khŏnu dini lò, ńò kò òkôb́èkò̆ ja kă d́ŏ Paradĭzo abu nu,” Cò d́ògegè lōwa do.

Jezŭ Adèthĭ

(Mattĕo 27.45-56; Mărko 15.33-41; Zowănnī 19.28-30)

44-45B́ĕ Lumuhtihta akhî nu, Lumu adèhlî̆ labî̄ kî dèkhithurŭgè d́ŏ gethèd́è̆b́è abu htô̆do Lumuhtikhlèb́a thŏnare nu, kî Zarādo adèthèd́od́îd́ă aò cola ane tèb́è htèlègè gīkò̆lā. 46Jezŭ kèwohtasô kî Cò d́ògè, “Ŏ Apa, jè lè̄laphlòḿĭ ja tha d́ŏ Nu cukhò bu lò,” Cò d́ò hwă gōnu d́ō Ca tha hèhtagè.

47B́ĕnu klĭbo atcai klĭpho dègèjè dèbwè tcahtîb́è dèphî̆hta gōnu d́ō zè bè̄dòbè̄thegè B́ĭcè d́ŏ dèd́òphlò̆hta abu, “Bija ajo dèbwè ḿî hmahmagè adèkèḿè tò ò ńò dèbwè!” cò d́ò do.

48Bija aboahò tòcò htè aladēplo lōwa b́ĕnu tòcò tcahtî dèphî̆hta ajo tòcò acè̆, za khagè thè̆thî, kîd́ò̆ ze gegè d́ŏ dèothootha, dèblalage athaî̆nèbò̄bu nu. 49Zò khò̆ zò thò kî amihmu aòkô ca kă d́ŏ Galilĕage bu tòcò, sò̆htoògè d́ŏ adòbò kî òsô̆wô̄ tcaigè dèphî̆hta gŏmimi tòcò nu.

Dèb́ŭlă Jezŭ

(Mattĕo 27.57-61; Mărko 15.42-47; Zowănnī 19.38-42)

50-51Bija aò d́ŏ Judĕage, Arimattĕa u, htè apanīkô d́ŏ Jŭkhodo abu, ami ḿî Zŏzè ògè dèbwè. Zî ḿî bija athodanāthadanā kî adî̄ahma. Cò òsô̆wô̄i tèpwè Kib́ĭcè Ahtĭage gō do nu. Za tha da lajīplo tèpwè Sahidrinpho alewe tòcò akă d́ŏ lōwa tòcò adèkŏdèkja kî adèphîdèmè abu ńò. 52Ze lehtî Pilăto kî dagè cè Jezŭ aco. 53Hwă d́ō za zāladē Jezŭ aco, cò b́ò̆b́iigè kî tîkî̆jā tè b́è, kî b́è̆nīgè lōwa d́ŏ lūkho lobu htè bija tè b́è b́ŭlănī abu dèbwè̆ hnî̆ńò abu nu. 54Anu dini ḿîgè dèpradòlò ani (Mujè̄ni) kî Munisòd́è̆ thamò̆ tcahtagè.

55Amihmu aò d́ŏ Galilĕa alekô Zŏzè akă tòcò tcahtîb́ègè lūkho lobu kî Jezŭ aco ò b́è̆lăgè cadè̄ cadè̄ nu. 56Hwă d́ō, cè tòcò geb́agè d́ŏ zi hi cab́ô̆htè ca pradòlòbò̄ dèhnŭẃihnŭthòrò̆ nu.

Munisòd́è̆ ani nu, zò sòd́è̆gè acab́ô̆ dèhmèla ò adĕ nu.

Attualmente Selezionati:

Lŭka 23: GRNT21

Evidenziazioni

Copia

Vuoi avere le tue evidenziazioni salvate su tutti i tuoi dispositivi?Iscriviti o accedi

Ulteriori informazioni su Geba Roman New Testament

Lŭka 23

I Versetti Biblici più popolari da
Lŭka 23

Bibbia:

Karen, Geba

Versione: Geba Roman New Testament - GRNT21

Lŭka 23

Lŭka 23

I Versetti Biblici più popolari da Lŭka 23

Bibbia:

Karen, Geba

Versione: Geba Roman New Testament - GRNT21

Lŭka 23

I Versetti Biblici più popolari da
Lŭka 23