Matej 2
2
O mudraci priznajinena e čhavore e Isuse sar caro
1O Isus bijandilo ano gav Vitlejem ani regija Judeja zako e carosoro e Irodesoro vreme. Ko adava vreme, nesave mudraci taro Istok resle ano Jerusalim 2hem lelje te raspučen pe: “Kaj o nevo bijando caro e Jevrejengoro? Dikhljam sar lesiri čereni ikljola ko istok i aljam te pera ko kočija anglo leste.”
3Kad šunđa adava o caro o Irod, but uznemirinđa pe, a oleja hem sa o manuša ano Jerusalim. 4Vičinđa kora peste sa e jevrejengere šerutne sveštenikonen hem e učiteljen e Zakonestar hem pučlja len kaj o Hrist valjani te bijanđol.
5A on phende lese: “Ano Vitlejem ani Judeja, adalese so ađahar o proroko pisinđa:
6‘Tu, Vitlejeme, ki phuv e Judejakiri,
na injan najtikoro maškaro legarutne dizja e Judejakere,
adalese so ka ikljol tutar vladari
kova sar pastiri ka legari mle narodo, e Izraelconen.’”
7Tegani o Irod čorale vičinđa kora peste e mudrakonen hem pučlja len kad tačno mothovđa pe i čereni. 8I bičhalđa len ko Vitlejem vaćerindoj: “Džan hem šukar raspučen tumen e čhavorestar. Kad ka arakhen le, aven te javinen maje te šaj hem me te avav te perav ko kočija anglo leste.”
9O mudraci šunde e caro hem džele. I otojekhvar, i čereni, sava dikhle sar ikljola ko istok, džala ine anglo lende sa đikote na terdini upreder o than kote inele o čhavoro. 10Kad dikhle i čereni, zorale radujinde pe. 11Đerdinde ko čher hem dikhle e čhavore lesere dajaja e Marijaja i pele ko kočija anglo leste. Tegani ikalde pumare darija hem dinde le zlato, tamjan hem smirna. 12Palo adava, ko suno o Devel upozorinđa len te na irinen pe palal koro Irod, i adalese avere dromeja irinde pe ki pumari phuv.
O Josif našela e Marijaja hem e čhavoreja ano Egipat
13Kad o mudraci džele, o anđeo e Gospodesoro alo ko suno e Josifese hem phenđa lese: “Ušti, le e čhavore hem lesere daja hem našen ano Egipat. Ačhoven adari đikote na phenava tumenđe, adalese so o Irod ka rodel e čhavore te mudari le.”
14O Josif uštino hem adaja rat dželo ko Egipat e čhavoreja hem lesere dajaja. 15I ačhile adari sa đi e Irodesoro meriba. Adaleja pherdilo okova so o Gospod phenđa prekalo proroko:
“Taro Egipat vičinđum mle čhave.”
O Irod mudari e murše čhavoren ano Vitlejem
16Kad o Irod dikhlja so o mudraci hovavde le, but holjanđa hem bičhalđa e vojnikonen ano Vitlejem hem ano sa o pašutne thana te mudaren sa e murše čhavoren đi o duj berš. Sa adava ćerđa premalo vreme zako savo šunđa e mudrakonendar. 17Tegani pherdilo okova so phenđa o proroko o Jeremija:
18“Ani diz Rama o glaso šundilo,
o kukiba hem o rojba baro;
Adava i Rahilja rovela ple čhaven
hem na mangela te utešini pe, adalese so lakere čhave nane više dživde.”
O Josif irini pe e Isuseja hem e Marijaja ano Izrael
19Kad o Irod mulo, o anđeo e Gospodesoro alo ko suno e Josifese ano Egipat 20hem phenđa lese: “Ušti, le e čhavore hem lesere daja, i džan ki phuv Izrael, adalese so mule okola so mangle te mudaren e čhavore.” 21Ov uštino, lelja peja e čhavore hem lesere daja hem dželo ano Izrael. 22Kad šunđa so e Irodesoro čhavo o Arhelaj ulo nevo vladari ani regija Judeja, darandilo te džal adari. Tegani ko suno o Devel upozorinđa le te na džal adari, nego te džal ki regija Galileja. 23I džele hem živinde ani diz Nazaret. Adaleja pherdilo okova so phende o proroci e Mesijastar da ka vičini pe Nazarećanin.
Attualmente Selezionati:
Matej 2: RAB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi