Luka 22
22
1Leka likawandamili ligono likulungu lya mikate yangali ni kimela, lila likemaleka Pasaka. 2Na makasisi makulungu na wakulembela wakalonditi umu wankomele: pakuya wakayogwipi nsafi.
3Leka Shetani akanjingili Yuda wa kukemaleka Iskariota, wa mpingo wa kumi na wawili wala. 4Na akabiti, nakalongili nawo makasisi makulungu na manduna ga ngondo, umu ngaanfumbukisi kwa wombe. 5Na wakahekalili, na wakayilini nuyombe kumpela ndalama. 6Ni akakeliti, na akalonditi lukumbi lunofu lwa kunfumbukisa kwa wombe baha pakayili lepe lipuga.
7Leka likachiti ligono lya mikate yangali ni kimela, pa lila ngawadumwili pasaka. 8Na akatumiti Petro nu Yohana, kujowa, Mubitaye kutiwikila ngani pasaka, tikalye. 9Leka wakajowiti kwa yombe, Paliku ulonda tiwikile ngani? 10Leka akajowiti kwa wombe, Lola, pakuyingila mwenga pa likaya, yamuwonangane nu ngosi wa kupinda kifulu kya machi; munkise mu nyumba mula abita mula. 11Na mutawile kwa mwene nyumba, Mwalimu akujowela, Kuliku kimbetula kya wageni, pala yanilye pasaka pamonga na wanafunsi wangu? 12Nu yula yawalase kindemula kya panani kikulungu: kukula mwiwikile ngani. 13Na wakabiti, na wakakolili ngati umu atawili kwa wombe: na wakawikili ngani pasaka.
14Na pala saa yikachiti, akatemi pasi, na maapostolo pamonga nuyombe. 15Na akajowiti kwa wombe, Kugana niganiti kulya pasaka iyi pamonga nu mwenga palongolo pa kuwona mahumbuso: 16pakuya niwajowela, Yanilye lepa iki, mpaka yakimemaseke pa utwa wa Mulungu. 17Na akayupiti ntimbo, na apa akasengwisi, akajowiti, Muyupaye iki, ni mukigawile mwawene: 18pakuya niwajowela, Kitumbulile hino yaniywe lepa fipambiko fya mbelesa, mpaka pala utwa wa Mulungu yauyiche. 19Ni akatoliti nkate, ni apa akasengwisi, akametwili, nakawapili wombe, kujowa, Uwu uyii mbili wangu wakupelekeka kwa ndawa ya mwenga: mukitaye iki pa kikumbukumbu kya nenga. 20Nu ntimbo wilawila panyuma pa kyakulya, kujowa, Ntimbo uwu uyii kilagano kya hino pa mwasi wangu, wakuyitika kwa ndawa ya mwenga. 21Koma lola, kiwoko kya yula wakunifumbukisa kiyii panani pa mesa pamonga nu nenga. 22Pakuya Mwana wa adam abita, kwa ndingo wa kila kiwikili ngani: koma ling’aho kwa yula yuyu afumbulika nako! 23Nuwombe wakatumbwili kukotana yungi ni njini, nani wa wombe yakitaye iki.
24Leka likayili lipindikano kwa wombe, nani wa wombe awoneka kuya nkulungu. 25Leka yombe akajowiti kwa wombe, Watwa wa Mihuku wawatamila bambo; na wene chengo wa wombe wakemaleka Wa kukita finofu. 26Leka mwenga nukuya wila: koma nkulungu pa mwenga aye ngati nchoko; na wa kulongolela, ngati wa kutumakila. 27Pakuya nani ayii nkulungu, yula wakutama pa kyakulya, pangi wa kutumakila? si yula wakutama pasi? leka nenga niyii pagati pa mwenga ngati wa kutumakila. 28Leka mwenga muyii wala wahweliti pamonga nu nenga pa mageseko gangu; 29na nenga niwawikila ngani utwa, ngati umu Dadi wangu akaniwikili ngani nenga, 30kukita mulye na munywe pa mesa yangu pa utwa wangu; na yamutame pa fitihu fya utwa kupawula mitangilo kumi ni yiwili ya Israel. 31Simon, Simon, lola, Shetani akiluwili wenga, nausi akuyeyeluse ngati trigo: 32koma nenga nikaluwiti kwa wenga, nausi kiyitakiso kyako kisipelula: na wenga, pala ung’anamukili, uwakangamase walongowo. 33Leka akajowiti kwa yombe, Bambo, niyii tayari kugenda pamonga nu wenga pa kukungika haka pa kufwa. 34Leka akajowiti, Nikujowela wenga Petro, lijogolo yaliwike lepa lilino, mpaka yaukane kadatu kukita unimanya.
35Ni akajowiti kwa wombe, Pala nikawatumiti mwenga wangali kyakuwikila ndalama, haka lihaku, haka sapato, mukalemwiki kindu? 36Na wakajowiti, Pa waka. Leka akajowiti kwa wombe, Koma hino, uyu ayii ni kyakuwikila ndalama, akipinde, wiwila lihaku kawili: na uyu ayii nago lepa, atase mwingila wake, na auhemele upanga. 37Pakuya niwajowela, kukita kila kilembiki ngakimemasiki pa nenga, Na akawalangiki pamonga na wala wakuhokela: pakukita kila kya nenga kiyii ni pa kumemesika. 38Leka wakajowiti, Bambo, lola, apa maupanga gawili. Leka akajowiti kwa wombe, Kiyii kya kuyenela.
39Ni akapititi, umu ukayili nkuwu wake, nakagenditi ku kidunda kya Miseituni; na wanafunsi kawili wakankisiti. 40Leka pala akayili pandu pala, akajowiti kwa wombe, Musali musiyingila pa kugeseka. 41Na akapatwiki nawo ngati pa utumalilo wa liganga; na akapetiki mafugamilo, nakasaliti, kujowa, 42Dadi, wona ulonda, uwuse ntimbo uwu pa nenga: koma nukuya umu nilondela nenga, leka umu ulondela, kikitike. 43Leka akambonakili malaika kuhumila kunani, kunkangamasa yombe. 44Na pakutama pa kwigima akayili mu kusali kulutila kunyulumbuka: na lifuki lyake likayili ngati madolodolo makulungu ga mwasi gakaselili pasi. 45Na apa akayimi pa kusali kwake, akawayichili wanafunsi, nakawakolili wagoniti lugono kuhumila pa kuniongoneka, nakajowiti kwa wombe, 46Wuli mugona lugono? muyimaye, musalaye, musiyingila pa kugeseka.
47Pa kulongela yombe, lola, lipuga, na yula wakukemeleka Yuda, yumonga wa kumi na wawili wala, akawalongolili; na akambandamili Yesu kummianga. 48Koma Yesu akajowiti kwa yombe, Yuda, unfumbukisa Mwana wa adam pa kummianga? 49Leka wala wakayili kunsyungutila, pa wakaweni iki yakiye, wakajowiti, Bambo, tikawakeche ni upanga? 50Nu yumonga wa wombe akantemiti mbanda wa kasisi nkulungu, na akandumwili likutu lya kigosi. 51Leka Yesu akahigiti, nakajowiti, Mukotoke mpaka iki. Na akakwafiti likutu, na akandamisi. 52Nu Yesu akajowiti kwa makasisi makulungu, na manduna wa ngondo wa pa hekalu, ni wakuluwakulu, wala wakunchila yombe, Wila ngati pa ndugu mukapititi, ni maupanga ni ndonga? 53Pakuya nenga ligono ni ligono pamonga nu mwenga mu hekalu, mukatambalisi kiwoko kinu lepa pa nenga: koma iyi yiyii saa yinu ni mbafu ya lwisi.
54Ni wakankamwili yombe, ni wakabiti nako, ni wakantoliti ku nyumba ya kasisi nkulungu. Koma Petro akakisiti patali. 55Leka apa wakakositi mwoto pagati pa lihegele, ni wakatemi pasi pamonga, Petro akatemi pasi pagati pawe. 56Leka mwali, pakambweni atemi pa lulangalila, ni pakambangalili, akajowiti, Na uyu akayili pamonga nuyombe. 57Leka akakaniti, kujowa, Ndala, yombe nimmanya lepa. 58Na panyuma pachokope yungi pakambweni akajowiti, Wenga kawili uyii wa awa. Leka Petro akajowiti, Mundu niyii lepa. 59Na pa kuluta ngati saa yimonga yungi akakangamili kujowa, Chakaka uyu kawili akayili pamonga nuyombe: pakukita ayii mGalilaya. 60Leka Petro akajowiti, Mundu, nimanya lepa iki ujowa. Na hino apa, akona kilongalile, lijogolo likawikiti. 61Na Bambo akang’anamwiki, na akandolakisi Petro. Nu Petro akakumbukili lilowe lya Bambo, umu akanjowili yombe, Palongolo pa kuwika lijogolo lilino, yaunikanile padatu. 62Na apa akapititi kunja, akaliliti kiwinile.
63Ni wagosi wala wakunkamula Yesu wakankitili mihenje, kuntowa. 64Na wakansiwiti ku miho, nakankotiti, kujowa, Ulwete: nani uyu akakutowiti? 65Na fya mahele fingi wakajowiti kumpindika yombe, kundoga.
66Ni baha ni baha ukayili musi, nkokano wa wakuluwakulu wa nsafi ukawunganiki pamonga, makasisi makulungu na wakulembela kawili; ni wakabiti nako ku chengo kyawe, kujowa, 67Wona wenga uyii Kristo, utitawile. Koma akajowiti kwa wombe, Wona nitawila kwa mwenga, yamukele lepa: 68na wona niwakota, yamunihige lepa. 69Leka kitumbulile hino Mwana wa adam yaaye wakutama pa kiwoko kya ndilo kya mbafu ya Mulungu. 70Leka woha wakajowiti, Mumu uyii Mwana wa Mulungu, ati? Leka akajowiti kwa wombe, Mwenga mujowa kukita nenga niyii. 71Na wombe wakajowiti, Wuli tilonda ulungamakiso wungi? pakukita tikayufwini tawete kuhuma pa ndomo wake mwene.
Attualmente Selezionati:
Luka 22: MGS1937
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
First published by the British and Foreign Bible Society in 1937.