1 AkwaKorinte 15
15
Kupinduka kwa Krisitu kwafu
1Andengenu, naa fota ku mi vurukithsa yo Muthzimbu Ouwa uya na na mi hongire. Mwa na u tamburire, karo podiyo mu nemana. 2Mwaa yoyithsiwa kou Muthzimbu Ouwa ngeci mwaa tanarithsa diywi edi na na mi hongire. Ngeci kadi kengeyo, mu na tawa mu kenge.
3Inene na mi pire yoikuru nene mu thsivaka eyi na tamburire name ci Krisitu wa fererire evi yetu kokuthza ko Mañoro. 4Wa vumbekiwire no ku pinduriwa kwafu mu diyuwa dyo muthsihatu kokuthza ko Mañoro. 5Wa hokokire kwa Peturu, no ku hokoka karo kowa o dikumi naidi. 6Munyima thzeyo, wa hokokire kwirongwa yenthzi yo ku piterera makumi dikumi o mutanu mu thsikati thsofoci, awa ongi wo a yumi, shaanga ci amweya ku kwo na fu. 7Ngou a hokokire kwa Jakovo, ku tunda apo wa hokokire karo ku tunganda totuhe. 8Ku mahurerero weyo yoihe wa hokokire ku kwange ame ni cipitura eci mahonyi. 9Inene yame o muonye ku tunganda totuhe, ka ni roerire shaanga kwithsiwa kanganda, inene na nyandithsire kereke thza Nyambi.
10Unone ko thsihemo thsa Nyambi ni di eci edi ni di pano, karo thsihemo thsenthzi ku kwange nedi kadi thsa mu kenge. Inene na ni kwama nene kupita tunganda tumweya uno honi kadi yame, unone Nyambi wa kwamine mu mwange ko thsihemo thsenthzi. 11Mweyo kwithsa thsiano, nji ame ku honga nji awo, twahe twaa honga thsinu thsofoci, karo na mu tawa kare.
Kupinduka kwafu
12Ngeci yaa hongiwa ci Krisitu wa pinduriwire kwafu, ine honi amweya ku kwenu eyi a ambera ci kwithsa kupinduka kwafu? 13Ngeci kwithsa kupinduka kwafu, apo honi shaanga Krisitu ka a pindukire kwafu. 14Karo ngeci Krisitu ka a pinduriwire kwafu, apo honi kuhonga kwetu kwa mbango, karo no thsitawo thsenu thsa mbango. 15Karo atwe twa tunganda kenge tu waniwa ci twa angera keyi ya Nyambi, inene twaa pa ombangi ci Nyambi wa pindurire Krisitu. Uno honi ka a mu pindurire ngeci kwithsa kupinduka kwafu. 16Inene ngeci kwithsa kupinduka kwafu, no Krisitu naye ka a pinduriwire kwafu. 17Karo ngeci Krisitu ka a pinduriwire, thsitawo thsenu thsa tumbako, karo shimbi mwekarera mwivi yenu. 18Mweyo awa na fu o kwa na tawa kwa Krisitu na fererera. 19Ngeci okurupero wetu kwa Krisitu po wa muno mu mwoyo pohuma, twaa roera ku feriwa ñeke kupita anu wahe.
20Uno honi yoshemwa Krisitu na a pinduriwa kwafu. Kwafu wahe yodiyo mutomwa mu kupinduka kwafu.
21Inene pakuninga ci kufa kwa keyire ko munu, kupinduka kwafu nako na ku keya ko munu. 22Eci dyodi a fa anu wahe pakuninga ci twakwa Adama, munu yomuhe oyu di kwa Krisitu kenge a ku piwa mwoyo oupe. 23Unone munu no munu kenge a ku pinduka ko thsikati thsenthzi: Krisitu wa pinduriwire kwikara mutomwa mu kupinduka kwafu, wangu honi wahe awa di kwa Krisitu a ku pinduriwe ou a ku ka huka.
24Munyima thzeyo, mbeci a ku keye mahurerero, Krisitu ou a ku pa Kutumina kwa Nyambi Tata, no kwipithsa kutumina kokuhe noendithsi, nokoro. 25Inene Krisitu aa roera ku tumina shime apa a ku pakera Nyambi akwethzimbo yenthzi yoihe kushi thzedyato yenthzi. 26Mukwathsithzimbo o mamaneneno kwipithsiwa po kufa. 27Inene Mañoro a amba ci: “Na a paka enu yoihe kushi thzedyato yenthzi.” Mweyo, yoihe a amba Mañoro ci “enu yoihe i na pakiwa mushi thzenthzi,” yaa monithsa nawanawa ci ka i pakererire no Nyambi kengeyo, aye oyu na a paka enu yoihe mushi thza Krisitu. 28Enu yoihe ou ya ku pakiwa mukoro wenthzi, naye Mwana kenge a ku cipaka mukoro wa Nyambi oyu naa paka enu yoihe mukoro wenthzi, ci Nyambi a ku tumine enu yoihe.
29Ngeci kwithsa kupinduka kwafu ne, ine honi eyi a na korovethziweranga mu dithzina dyafu? Ine nga i kwamiwera, shime ngeci afu kenge a ku pinduka kwafu.
30Ine eyi tu na cipakera mukaru thsikati thsothsihe? 31Andengenu, ame naa citanekera no kufa diyuwa no diyuwa, ii, eci dyodi ni cishangara shemwa mukaci kenu mwa Krisitu Yesu Fumu wetu. 32Ine na ku wanapo iya yo ku rwa nekondwama, waya anu o mu Efese, ngeci ka kwa kwikara kupinduka kwafu? Ngeci kwithsa kupinduka kwafu, “Tu dyenu no ku nwa, inene peunthza twaa fa.” 33Mwangeriwa, “Ambusha owamango a epithsa mikarero thzothziwa.” 34Mu hukerenu kwianekera yenu komu ku na roera, karo mu thsie ku tenda thsivi, inene amweya ka dimuka Nyambi. Naa amba kengeyo ku mi fithsa honyi.
Erama eyi ya ku pinduka
35Unone yumweya kenge nga epura ci: “Ngepi a ku pinduriwa afu? Erama yo ngepi a ku keya nayo?” 36Otomba! Eyi o na kunu tumba i mene shime i fe tango. 37Yoihe o kuna, ko kunangire thsimena ethsi thsa kwikarako, unone waa kuna pohuma dinona, ikare dyo vuroto nji ngara dinona. 38Nyambi honi aa thsi pa erama omu a na shimena, karo mushovo no mushovo o dinona aa di pa erama yadyo adyo pohuma. 39Inene kadi nyama thzothzihe thza ku cipitura, unone ko thzi di thzo munu, ko thzi di thzeyama, ko thzi di thzenyunyi karo ko thzi di thzo thsi. 40Karo ko i di erama yo mu wiru nerama yo mu kaye. Kutethzima kwerama yo mu wiru ku na cithsii no kutethzima kwerama yo mu kaye. 41Ko ku di kutethzima ko diyuwa, ko ku di ko ngonda, karo ko ku di ko matungwethzi, karo ditungwethzi di na cithsii nedi dimweya mu kutethzima.
42Dyo ya kwikara no ku kupinduka kwafu. Erama eyi i kuniwa po yaa fa, eyi ya ku pinduriwa po ka ya fa. 43Yaa kuniwa mu kashwahu, unone yaa pinduriwa mu kutethzima. Yaa kuniwa mu kufaratera, unone yaa pinduriwa mukoro. 44Yaa kuniwa o ku i di erama yo nyama, unone yaa pinduriwa mwirama yo mupepo. Ngeci ko i di erama yo nyama, apo honi ko i di nerama yo ku mupepo.
45Ku na ñoriwa mu Mañoro ci: “Munu o kutanga Adama wa pirukire munu o muyumi,” Adama o mahurerero wa pirukire mupepo o ku pa mwoyo. 46Uno honi ethsi thsi na tanganga po erama yo nyama, mbeci ku keye yo mupepo. 47Munu o kutanga shime a tundire pa dikungu dyo kaye, o muthsidi aye shime a tundire ku wiru. 48Anu o kaye aa cipitura noyu munu o kaye, nanu o mu wiru aa cipitura noyu munu o mu wiru. 49Dyodi tu di no thsikupuro thsoyu munu o kaye, dyo mba twikara no thsikupuro thsoyu munu o mu wiru.
50Andengenu, eyi ni amba po ci erama yetu yo nyama nonyinga tumba i tambura Kutumina kwa Nyambi, yo ku twethsa ku fa tumba i tambura i shifu.
51Uno honi ni mi tongwere diano. Ka twa ku fa twahe, unone twahe kenge twa ku piruriwa. 52Kenge ya ku tendahara mu thsikati thsothsipu eci kucikopa ko dithziho, apa thza ku shikiwa torombita thzo mahurerero. Inene torombita ou thza ku dira, awa na fu kenge a ku pinduriwa a ku yoye diyere. Atwe tu yoya kenge twa ku piruriwa. 53Inene eyi erama yo ku twethsa kwora yaa roera ku piruriwa i shoro, karo eyi erama yo ku twethsa ku fa yaa roera ku piruriwa i shifu.
54Erama yo ku twethsa ku fa ou ya ku piruriwa i shifu, edi diñoro kenge dya ku citombora, dyo ku amba ci:
“Kufa ku na miniwa mu kuothza.
55Owe kufa, kuothza koe ne kupi ku di?
Owe kufa, kuhuma koe ne kupi ku di?”
56Kuhuma ko kufa po thsivi, karo okoro o thsivi po murao. 57Uno honi tu kanderere kwa Nyambi, aye na tu panga kuothza ka Fumu wetu Yesu Krisitu.
58Mweyo, ashimiwa ange, mu tanare. Katere thsi mi nyanganyithse thsinu. Thsikati thsothsihe mu cipake kwikwama ya Fumu, inene mu na dimuka ci kwithsa eyi mu na kwamena Fumu yo mbango.
Attualmente Selezionati:
1 AkwaKorinte 15: mho
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©2023 The Seed Company