1 AkwaKorinte 16
16
Koreko thzo ku kwathsa AkwaYerusalema
1Honi keyi yo ngudi thzenu thzo koreko thzo ku kwathsa akwakutawa, eci diya na raererire makereke o mu Galatia, namwe mu tende kengeyo. 2Mu diyuwa dyo kutanga mu sunda no sunda, munu no munu a pake pa mbadi madi kokuthza komu a na wanena, ku a paka ci ou na ku keya kwa ku nekara karo koreko. 3Ou na ku na kuma kenge na ku na tuma awa mwa ku tawethza no ku ñora mañoro o ku wa dimukaharithsa ci a ku tware thsikunda thsenu ku Yerusalema. 4Ngeci o ya ku monahare ci name naa roera ku thza, kenge a ku thza nange.
Eanekera ya Paulu
5Kenge na ku na mi hungerithsa ou na ku mana ku pita mu Masedonia, inene naa anekera ku pita mu Masedonia. 6Naa mona ci ngwa kenge na ku nekara nenu kamanana, mane ngwa kenge na ku nekara nenu kufu yomuhe, ci nga mwa ku ni kwathse mu ruendo rwange kokuhe oku na ku thza. 7Inene ka ni fotire ku na mi mona pohuma no ku piterera, naa kurupera ku nekara nenu thsikati thsothsire, ngeci waa ku i shime Fumu. 8Uno honi kenge na kwikara mu Efese shime ku ka kuma mu diyuwa dyo Pentekota. 9Kwaa monahara ci thsero thzothzikuru thzekwama thzi na ni yanthzurukera kuno, shaanga ikare ci owangi aa ni rwithsa.
10Timoti ou a ku keya, mwa ku na mu yapithsa, inene naye aa kwama ekwama ya Fumu eci ame. 11Mweyo, kwa ku nekara oyu wa ku na mu shomorora. Mwa ku mu kwathse mu ruendo rwenthzi mu thsiyaro ci nga a ku ni hukere, inene ni na mu taterera nakwakutawa amweya.
12Uno honi keyi ya muenthzetu Apolosi, na ni mu koñomeka nene ci naa mi hungerithse nakwakutawa amweya, unone kadi modiyo naa shimena ku keya pano. Kenge a ku keya apa a ku wana ndau.
Maywi o mamaneneno
13Mu mamere, mu tanare mu thsitawo thsenu. Mu ndumepe, karo mu korope. 14Yoihe eyi mu kwama mu i kwame mu thsishimo.
15Mu na dimuka ci mwanda wa Setefanasi wodiyo o kutanga kwikara akwakutawa mu Akaya, karo aa cipaka athsinda ku kukwamena akwakutawa. Andengenu, naa adikana ku romba ci, 16mu cihuthse kushi thzanu o kengeyo nowa wahe awa na kwama nene no. 17Ni na nyanyukera kukeya kwa Setefanasi na Fotunato na Akaikasi kuno, inene na na ni kwathsa eyi nga na mu ni kwathsa. 18Na na yooyerithsa mupepo wange nethzi thzenu kengeyo. Mwaa roera ku kanderera kwanu o kengeyo.
Kuvumenena ko mahurerero
19Makereke o mu Asia aa mi vumenena. Akwila na Purisila aa mi vumenena nenenene, mofoci kengeyo no kereke ethzi thzi na ciwanenanga mu nthzio thzo thzaa mi vumenena mwa Fumu. 20Akwakutawa wahe aa mi vumenena. Mu civumenenange ko thsitawo.
21Ame no Paulu naa ñora ko dyoko dyange oku kuvumenena.
22Ngeci munu ka a shimine Fumu, a kutiwe. Maranata - Fumu wetu, o keye!#16.22 Maranata! Thsirombero thso ku thsañuru ethsi na romberanga Makrisitu awa na ambanga Thsiaramaiki.
23Thsihemo thsa Fumu Yesu thsikare nenu. 24Thsishimo thsange thsikare nenu mwahe mwa Krisitu Yesu.
Attualmente Selezionati:
1 AkwaKorinte 16: mho
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©2023 The Seed Company