2 AkwaKorinte 1
1
Kuvumenena
1Edi diñoro dyaa tunda kwa Paulu, kanganda ka Krisitu Yesu keshima ya Nyambi, noku kwa muenthzetu Timoti.
Naa ñorera kereke thza Nyambi mu Korinte, mofoci kengeyo nakwakutawa wahe o mu Akaya momuhe.
2Thsihemo no thsiyaro thsa Nyambi Tata wetu na Fumu Yesu Krisitu ikare nenu.
Paulu aa kanderera kwa Nyambi munyima thzo makando
3Ku shangariwe Nyambi, aye Tata wa Fumu wetu Yesu Krisitu, Tata o thsidirañeke no Nyambi ohengawethzo ouhe, 4aye oyu na tu hengawethzanga mu makando etu oahe ci natwe tu twethse ku hengawethza awa a di mu makando kohengawethzo ou naa tu pa Nyambi. 5Inene dyodi tu nyandera nene Krisitu, nohengawethzo wetu dyo u kura nene ka Krisitu. 6Ngeci atwepo tu nyanda twaa nyandera amwe ci mu wane ohengawethzo no kuyoyithsiwa! Inene yoihe tu hengawethziwa, natwe kenge twa ku mi hengawethza, mweyo mwaa piwa okoro o ku cithzua no ku kwata mucima o ku mu di mu makando o ku cishoka noa tu di nao. 7Okurupero wetu ku kwenu po u koro, inene tu na dimuka ci dyodi mu ciera mu makando etu, dyo mwa ku ciera muhengawethzo wetu.
8Andengenu, twaa fota ci mu dimuke yo makando aa twa kekarire nao mu Asia. Shime twa kekarire mukaru nene, o ku piterera okoro othzui wetu, mane shime twaa anekera ci ka twa ku yoya karo. 9Yoshemwa, shime twaa ciyuva eci na tu ratweriwa kufa. Unone yoihe eyi shime na i tendahara ci twa cikurupera twathsinda, unone tu kurupere Nyambi oyu na pinduranga afu. 10Karo yodiyo na a tu amwena kukaru o ku twethsa ku twara ku kufa, karo kenge a ku tu amwena. Pa penthzi podiyo tu na paka okurupero wetu ci kenge a ku twarerera ku tu amwena. 11Namwe mu tu kwathse ko ku tu romberera, ci anu owangi a ku kanderere kwa Nyambi mukaci ko thsihemo ethsi naa tu pa mu kutawa erombero yanu owangi.
Paulu aa pirura eanekera yenthzi
12Kucishangara kwetu po oku, mumoneno wetu waa pa ombangi nawa, nenepo keyi yenu, twa yoyire mu kaye ko mikarero thzothziwa no kupira kapongonyi. Na tu tende kengeyo kadi ko ku tanarera ponyanyami o kaye, unone pa thsihemo thsa Nyambi. 13Inene ka tu mi ñorerire enu eyi mu kana ku twethsa ku tara nji ku yuvithsithsa. Naa kurupera ci kenge mwa ku yuvithsithsa ko kuyara, 14enu eyi mu yuvithsithsa kamanana pano, ci mu diyuwa dya Fumu Yesu mwa ku twethse ku cishangara mukaci ketu eci edi twa ku cishangara natwe mukaci kenu.
15Pakuninga ci na tawire shemwa eyi, na ni foto ci na ni mi hungerithse tango ci nga mwa ku tambure thsiyauthzi rwidi. 16Shime na ni foto ku na mi hungerithsa o ku ni thza ku Masedonia, nou nga na ku ka huka ku Masedonia ci nga mwa ku na ni kwathse mu ruendo rwange ro ku thza ku Judea.
17Ene ka na ni anekera nawa ou na ni ceke ku tenda kengeyo nji? Inji naa kwama esheteka yange konu, ku ciroithsera ku amba “Ii, ii” no “Dyombo, dyombo” mu thsikati thsofoci? 18Dyodi a na rurama Nyambi, diywi dyetu ku kwenu po kadi ci ngwa dya “Ii” no “Dyombo.” 19Inene Yesu Krisitu, aye Mwana Nyambi oyu na tu mi hongo, ame na Silasi na Timoti, kadi ci ngwa wa “Ii” no “Dyombo,” unone ku kwenthzi thsikati thsothsihe po “Ii.” 20Inene yoihe ekumbwethzo ya Nyambi po “Ii” mwa Krisitu. Karo ngeyi tu na amberanga “Ameni” wetu kenthzi ku shangara kutethzima kwa Nyambi.
21Uno honi Nyambi po yodiyo na tu thziimekanga atwe namwe mwa Krisitu. Yodiyo karo naa tu wethse, 22na a tu paka thsitamba ku tu tenda anuenthzi shemwa no ku paka Mupepo Oukenu mu micima thzetu kwikara thsitanarithso thseyi a kumbwethzire.
23Unone naethsa Nyambi kwikara mbangi wange, ka ni miangerire. Eyi na ni kana ku hukera oko ku Korinte po ka na ni foto ku mi retera karo makando. 24Kadi ci ngwa twaa fota ku endithsa thsitawo thsenu, unone twaa fota ci tu kwamene pofoci nenu ci mwikare no thsinyanyu, inene mu na tanara mu thsitawo thsenu.
Attualmente Selezionati:
2 AkwaKorinte 1: mho
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©2023 The Seed Company