2 AkwaKorinte 4
4
Rufumo ro mwoyo mu tunyungu toma
1Nyambi ko ñeke thzenthzi naa tu pa eyi ekwama, mweyo, tumba tu huka munyima. 2Tu na kana enu yo ku mukunda nenu yo ku fithsa honyi, ka tu tendire dinyanyamena nji ku tengurura diywi dya Nyambi. Uno honi, twaa monithsa oshemwa thsitonwameho no ku pa ombangi twathsinda ku mumoneno o munu no munu pa meho a Nyambi.
3Ngeci Muthzimbu Ouwa ou tu honga waa thsikiwa, wa thsikiwa pohuma kowa cithzira. 4Aa kana ku tawa, inene Satana, aye nyambi o kano kaye o neraurithsa maano o ci a mona mwethzi o Muthzimbu Ouwa ou u monithsa kutethzima kwa Krisitu, aye thsikupuro thsa Nyambi.
5Ka tu hongangire yetu twathsinda, unone twaa honga ci Yesu Krisitu po Fumu, atwe po twapikenu mukaci ka Yesu. 6Inene Nyambi oyu wa ambire ci: “Mwethzi u muneke mu mirema”, yo wa munekire mu micima thzetu ku tu pa mwethzi odimukero o kutethzima kwa Nyambi oku ku monahara mu rupara rwa Yesu Krisitu.
7Unone atwe po tu di noru rufumo mu tufuma toma, ku monithsa ci okoro o ku piterera po wa Nyambi kadi wetu.
8Twaa thsinenekiwa kokuhe, unone ka tu topwerire. Tu na karupera nene, uno honi ka tu pwererire okurupero. 9Twaa nyandithsiwa, unone Nyambi ka a tu thsiererire. Twaa huweriwa pashi, unone kwithsa kunongithsiwa. 10Thsikati thsothsihe twaa shimbanga kufa kwa Yesu mwirama yetu ci mwoyo wenthzi u monahare mwirama yetu.
11Inene atwe tu yoya twa ekaranga mwikarupa yo kufa mukaci ka Yesu, ci mwoyo wenthzi u monahare mwirama yetu yo ku twethsa kufa. 12Uno honi kufa kwaa kwama mu mwetu, mwoyo ao waa kwama mu mwenu.
13Ku na ñoriwa ci: “Ni na amba, inene ni na tawa.” Pakuninga ci tu di noo mupepo o thsitawo, twaa tawa, karo mweyo twaa amba. 14Tu na dimuka ci Nyambi oyu wa pindurire Fumu Yesu kwafu, kenge mba a tu pindura natwe kwafu pofoci na Yesu, no ku tu reta atwe namwe pa meho enthzi. 15Eyi yoihe yaa tendiwa mukaci kenu ci thsihemo thsa Nyambi ethsi thsi kuma kwanu owangiangi, thsi vurithse okanderero o ku shangara kutethzima kwa Nyambi.
Ku yoya ko thsitawo
16Mweyo, kadi twakwa ku huka munyima, shaanga ci erama yetu yaa thza o pwa, myoyo thzetu thzaa hemuniwa diyuwa no diyuwa. 17Inene makando etu po a rethzu karo a mu thsikati thsothsipu. Kenge a ku tu retera kutethzima koshokuru ko diyere ko kupita ao makando oahe. 18Mweyo, ka tu kengererire enu yo ku moniwa, uno honi twaa kengerera enu i shimoniwa, inene enu yo ku moniwa ya kwikara thsikati thsothsipu, unone enu i shimoniwa ya kwikara diyere.
Attualmente Selezionati:
2 AkwaKorinte 4: mho
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©2023 The Seed Company