AkwaKolose 1
1
Kuvumenena
1Edi diñoro dyaa tunda ku kwange ame no Paulu na muenthzetu Timoti. Ame po no kanganda ka Krisitu Yesu keshima ya Nyambi.
2Twaa ñorera anua Nyambi o mu Kolose, aenthzetu awa a na rurama mwa Krisitu. Nyambi Tata wetu a mi pe thsihemo no thsiyaro.
Okanderero no thsirombero
3Thsikati thsothsihe twaa kandereranga kwa Nyambi yoihe tu mi romberera, aye Tata wa Fumu wetu Yesu Krisitu. 4Inene na tu yuvu thsitawo thsenu kwa Krisitu Yesu no thsishimo thsenu kwanua Nyambi wahe, 5mukaci kokurupero ou mu na turekiwera mu wiru eyi na mu yuvu mu maywi o shemwa o Muthzimbu Ouwa.
6Ou Muthzimbu Ouwa ou na u keye ku kwenu waa thza mu kaye kokahe karo waa pirura myoyo thzanu, eci dyodi wa pirurire myoyo thzenu ku tunda mu diyuwa edi mwa tangire ku u yuva no ku yuvithsithsa shemwa thsihemo thsa Nyambi.
7Eyo na mu i cirongithsa kwa Epafurasi muenthzetu oyu twa shima oyu tu na kwamena pofoci nenthzi, mupika Krisitu o ku rurama oyu kwama mu dithzina dyetu.#1.7 Mañoro amweya a amba ci “Mu dithzina dyenu.” 8Naa tu tongwera keyi yo thsishimo thsenu kwanu amweya ethsi na mu piwa ku Mupepo.
9Mweyo, shimbi na tu yuvera yenu ka na tu thsii ku mi romberera. Twaa romba kwa Nyambi ci a mi pe odimukero o ku yara weshima yenthzi, no ku mi pa onyanyami o ku Mupepo no kuyuvithsithsa, 10ci nga mwa ku yoye komu a na shimena Fumu no ku tenda yo ku mu roerithsa. Mwa kwime ima mwikwama yoiwa yo ku cithsiathsia, no ku kura mudimukero o ku yara wa Nyambi.
11Twaa rombera karo ci Nyambi a mi tanarithse kokoro wenthzi oukuru ci nga mwikare nothzui no kukwatamucima kokuhe ko thsinyanyu. 12Mu kanderere ko thsinyanyu kwa Tata, oyu na a mi tende ci mba mu tambure kwinu eyi a na turekera Nyambi anuenthzi awa a na yoyo mu mwethzi. 13Na a tu amwena kukoro o mirema no ku tu tuturwera mu Kutumina kwa Mwanenthzi oyu a shima, 14aye oyu na a tu patura no ku tu tetera evi yetu.
Okuru wa Krisitu
15Krisitu po thsikupuro thsa Nyambi shimoniwa, yodiyo mwedi peuru thzo yumbiwa yoihe. 16Inene kenthzi aye enu yoihe yombiwire, yo mu wiru no pa kaye, enu yo ku moniwa neyi i shimoniwa, ikare mangunja nji okoro nji akwakutumina nji yoikoro. Kenthzi aye Krisitu, Nyambi wombire enu yoihe karo yombiwerire aye. 17Kwa ekarire enu yoihe o ku i shime ku tendiwa, karo yodiyo na kwata pofoci enu yoihe. 18Aye yodiyo mutwi werama, athzo kereke. Yodiyo matatekero, karo yo mwedi ku kupinduka kwafu, ci aye yofoci ekare o kutanga kwinu yoihe. 19Inene Nyambi ya mu roerithsire ku yoya mu mwenthzi ko kuyara. 20Kenthzi aye Krisitu, Nyambi wa huthserire enu yoihe ku kwenthzi. Wa retire thsiyaro nenu yoihe yo mu wiru neyi yo mu kaye konyinga wa Krisitu ou wa viire pa mbinda.
21Pa kutanga, mwekarire kokure na Nyambi karo mwekarire akwethzimbo yenthzi mu maano enu mukaci ketenda yenu yoimango. 22Uno honi Nyambi na a mi huthsera ku kwenthzi thsinda ko kufa kwa Mwane kwirama pa mbinda, ku mi reta pa meho enthzi o ku mu di owakenu no kupira thso ku mi shomorora nji kapongonyi.
23Mu tware ku rupara mu thsitawo thsenu, karo mu tanaremo. Mwa tunda mou okurupero ou mwa tamburire uya mwa yuvire Muthzimbu Ouwa. Ou Muthzimbu Ouwa na u hongiwa kwanu wahe mu kaye, ame no Paulu na ni piruka ngamba wao.
Ekwama ya Paulu mu kereke
24Pano honi ni na roera ino ni di mu makando mukaci kenu. Inene ko makando aa a di mwirama yange naa yarithserera eyi na i thsiarerako ku makando a Krisitu mukaci kerama yenthzi, athzo kereke. 25Nyambi na a ni tende ngamba o kereke. Na a ni pa ekwama yo ku rongithsa diywi dyenthzi ku kwenu ko kuyara. 26Ou Muthzimbu po diano edi dya horekiwire myaka na myaka no mwikati yoihe, uno honi na di hokoriwa kwanua Nyambi. 27Nyambi na a cihangwera ku wa dimukithsa okuru o kutethzima kodi diano mu kaci kAnukenge dyo ku amba ci: Krisitu mu mwenu a di. Eyi yaa mi pa okurupero ci kenge mwa ku eriwa ku kutethzima kwa Nyambi.
28Mweyo, twaa tongwera anu wahe ya Krisitu ku wa nomenithsa no ku wa rongithsa konyanyami ou na a tu pa Nyambi. Twaa fota ku reta anu wahe o kwa di o kwononoka mwa Krisitu. 29Eyi ngeyi ni kwamena nene no ku vendana kokoro ouhe wa Krisitu ou u kwama ku kwange.
Attualmente Selezionati:
AkwaKolose 1: mho
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
©2023 The Seed Company