Matthieu 5
5
Jésus amadigaa gô môkôdi gôéékéda mabégô mavôni
1Vameena Jésus géômbége gévôni amabata na va ngongo amôkôdi. Amadigaa. Vane aneengi edi amawesea na gôndé angô. 2Jésus amabandôa évovo mbe: Oôkôni mabégô mema.
Mabégô magényônga sapie
(Bono na Luc 6:20–23)
3Ti gô gényônga géndé n’anye nôsabômu mbe mitéma mianyô mindé g’ôsuga.
Okumu aNzambé ôndéké gôndé anye.
4Ti gô gényônga géndé n’anye nôdéani.
Menyani mbe Nzambé te môsumédi amitéma mainyô.
5Ti gô gényônga géndé n’anye nôsaba na nyemo.
Nômeetsô tsinane nyetso na Nzambé ôbiia.
6Ti gô gényônga géndé n’anye nôena tsôvé na nônyima mane manyôngéô Nzambé.
Amuene Nzambé angeesta anye mangô.
7Ti gô gényônga géndé n’anye nôena akanyô ngeba.
Amuene Nzambé anganôena ngeba te mônongovo.
8Ti gô gényônga géndé n’anye nondé na mitéma mimagôgéani.
Anye nôngeena Nzambé.
9Ti gô gényônga géndé n’anye nôndé na mitéma mimasumani, nôsuméda dôta na gétabé akanyô mitéma.
Nzambé anôénda mbe: Anami.
10Ti gô gényônga géndé n’anye nôtubédu gékuanô veendanye éne ényôngéô Nzambé.
Okumu aNzambé ôndéké gôndé anye.
11To gô gényônga géndé n’anye vatokou anye na vakuanô anye na vapatéô anye mabégô mabévani gôndé anye né’vamba n’ami. 12Tsôkéani na gényônga gévôni gôébégô nôngadiia misenda g’ôba. Va mbeego anye madeo nôsibôtu apandôédi amatasa maNzambé amakuanô te nane.
Mabégô mavianga na gévede
(Bono na Marc 9:50, Luc 14:34–35)
13Anye nôndé ga vianga gô tsengene. Okô vianga visabadô na duegi ?môma oongôa évinikéda duegine nayee? Okô viangavie visiba na duegi vingagunyu na gô mbadi, na oma angaviyeta.
14Anye te gévede sasi tsenge. Oma asoongôa ésuéga môsenge ômasaaô va ngongo amôkôdi. 15Môma asatumba dambi na tsué gôésuéga yangô gô gatse amôdômbô. Ivô amivumba te va gévumbéô sambe éngatanéda ebee wetso n’oma angadigaa gô gévede. 16Tanédani gévede sanyô gôndé oma na vangeenahngô mayanza manyô mamisôba, angakuméda Tétanyô ône andé g’ôba.
Meekédu maJésus gôébégo éamige miaNzambé
17Jésus angô mbe: Nômbiatasa mbe navigi gôénônôtôa gô ndongi na mige mimatsika Moïse, na gô mabégô mamavovo apandôédi amatasa maNzambé. Me tsivigé gôénônôtôa gô mabégôme mane, ivô navigi gôénômenyeda ébandôe éamangô na gakeneo mangô. 18Me nanôbeenda na gô pie mbe ta na vibénda vivo viaMatendeo MaNzambé vingabusuni ngu na vangamangôa viangô éyanzee éedi, buétsé te tsina n’oba épanga éôta. 19T’ebandô gôndé ône ookua môge ôvo buéyé mbe ôgeôge, na eekéda môkedi gôéôkua angô, angaba môma ameenzuni g’ôkumu aNzambé. Ivô ône akenea ndongi na mige miaNzambé na eekéda dôta akedi gôémikenea, angô angagobedu g’ôkumu aNzambé. 20Me nanôbeenda na gô pie mbe gôndé anye gôéengéa g’ôkumu aNzambé, géndégégéé, buétsé te nôgobeda éne ényôngéô Nzambé, éôtéa égobeda na éne éApharisien n’anigôi amige miaNzambé.
Meekédu mopisa
21Nôsabômu éne émabeendu tétee yanyô mbe: Nômbiayôha môma. One ayôha môma angatsundédu na évovi. 22Ivô me nanôbeenda mbe muetso angeena môkedi ôpisa angatsundédu n’evovi. Muetso angatoko môkedi angakedu na gô eba ôvôni amisoso. Muetso angakoko môkedi angagunyu gô mungu asoto géseemakani. 23Okô ôengéyi na gô eba aNzambé gôémôneegeda na éne éngeetsewe angô ôbiia, ôkô ôndé wangô ôbangôyi mbe: Môkasô andé n’ebégô n’ami. 24Tambô éne éndé n’ewe gôéétsa Nzambé ôbiia, ôtsika éangô gô eba gône. Kusa. Kea na gôndé môkoo, buéyé gandé éwe gébé n’oési, ôkekônza ébégôe anye n’edi. Vane nikea éengéa na gô eba aNzambé gôémôdeekeda ôbiie woo.
25Okô môkoo agôtsuéyi môsunda, yavôga ékônza ébégôe n’edi nôgébaka gô nzéa madeo nôsibuéa gô eba amisoso, kabaga ébégôe éba évôni va mbene agévovi. Na kabaga gévovi agôétsa môgôde, na kabaga môgôde agôengéda gô tsôgôô. 26Na gô pie nanôbeenda mbe ôsangakusa gô eba atsôgôô ta madeo ôsivana ébômée éne.
Meekédu magésasô
27Anye nômookô gamavovu mbe: Ombiakea gésasô. 28Ivô me nanôbeenda mbe muetso abono môgeto na tsôvé gôékea n’edi gésasô, amani ékea n’edi gésasô gô môtémedi. 29Okô isoe yoo éagéeyo gémôgôô éndé ga pagô gôégôkubéda gô mabégô mabévani, tambô yuua éangô na gunya éangô gôdagôda n’ewe. Okô ôkonzogi iso évo, gôndé éwe ésaba édagani. Ivô, ôkô ôtôe woo wetso ôgunyu gô mungu asoto, te ébégô éôtéa édagani. 30Na dôta, ôkô ôgogoe woo agéeyo gémôgôô ôndé ga pagô gôégôkubéda gô mabégô mabévani, tambô kitsa ango na gunya angô gôdagôda n’ewe. Te nane. Okô éwe ôkonzogi ôgogo ôvo, gôndé éwe ésaba édagani. Ivô ôkô ôtôe woo wetso ôgunyu gô mungu asoto, te éne éôtéa édagani.
Meekédu gôébégô éane ayôha yômba
(Bono na Matt. 19:9, Marc 10:11–12, Luc 16:18)
31Anye nômookô gamavovu mbe: One akina môgayedi te buedi mbe amôétsa gésangô gétubéda mbe: namôkini. 32Ivô me nanôbeenda mbe, ône akina môgayedi bobo, angô gééndé gésasô, angô te môma atévédi môgayedi gôékea gô gésasô. Na dôta ône abaa môgeto amakinôni akéyi te gésasô.
Meekédu mamisongia
33Nôsabômu éne émabeendu tétee yanyô mbe: Ombiasongéa éngôndô ivô indaka ébégô ésongéyi éwe gôétubéda Kumu Nzambé géneega. 34Ivô me nanôbeenda mbe, nômbiasongéa ta na môsongia ôvo. Nômbiasongéa ôba gôébégô ôba te gédigaa saKumu Nzambé. 35Nômbiasongéa tsina gôébégôtsinane te gétukéô samakôdô maNzambé. Nômbiasongéa Jérusalem gôébégô angô te môsenge aNzambé, Kumu épôni. 36Nômbiasongéa môtsée woo gôébégô éwe ôsaba na ngudi yekoa ta n’osôgé ôvo na vee, vo na vioo. 37Ene ésinganye singani mbe: Ii, gésongé môsongia. Ene ékinanye, kinani mbe: Aé, gésongé môsongia. Te Satan atôma oma gôésongéa misongia.
Meekédu Meevénda môkoo
(Bono na Luc 6:29–30)
38Nômookô gamavovu mbe: One angatuba môkedi éso angavéndu te étubu éso. One angagôbôa môkedi inô, angavéndu te égôbôu inô. 39Ivo me nanôbeenda mbe, nômbiavénda ône eenda anye ébégô ébévani. Okô môma agôbômôyi gô ébaku éagéeyo gémôgôô, itsa angô agôbômôa dôta n’ene éagéeyo gégeto. 40Okô môma anyôngéô ésunda éwe gôébongo kapane yoo, kôndéga angô na gényônga buéyé na ngoyine yoo épôni. 41Okô atômi atsenge agôtôma gôétsua égumba gô môtéta ôvo, buedi gôémôtsuéa na gényônga buéyé mitéta mibaé. 42Gôndé ône anôduka sôma, buedi gôémôétsa sangô. Nômbiakina ésombeda sôma gôndé ône atuba tsombi gôndé anye.
Meekédu meenyôngéô adudeo
(Bono na Luc 6:27–28,32–36)
43Nômookô gamavovu mbe: Nyôngéô weene yoo, na vinga môdudeone woo. 44Ivô me nanôbeenda mbe, nyôngéôni adudeoe wanyô. Vovoni na Nzambé mabégô mamisôba gôndé ane anôkuanani. 45Te gô mônongoe ône nôngatubéda mbe anye te ana aTétanyô ône andé g’ôba. Nzambé atsigéda kômbéne gôndé oma abévani na gôndé oma amisôba. Nzambé anyogeda mbuua gôndé ane amôgobedani na gôndé ane asamôgobedani. 46Okô anye nônyôngéô ane anônyôngéôni ?nômenya mbe Nzambé anganôétsa môsenda‐a? Asanganôétsa. Buéyé n’abongi adepu anyôngéô akaô te nane. 47Okô anye nôkômbôa te kinde yanyô atévo ?éne te mbe anye nôénda te ébégô éamôsôba‐a? Ane asavamba na Nzambé ?aseenda te nane‐a? 48Tétanyô ône andé g’ôba andé ti gébé n’oési gô mabégô metso. Tambô bakani gandé angô.
Attualmente Selezionati:
Matthieu 5: TSV
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Alliance Biblique du Gabon (Bible Society in Gabon) 1983