ရှင်လုကာ 1
1
အခန်း (၁)
သော်ဖိလုစငေါလ် ထောက်ခေါမ်စော်
1ခစ်လောဒ့်ခေါမ် သော်ဖိလုအား၊ ကေးမီးကီကိုယ်ဝေါလ် ဖုလော်ရှင်နား အစိုင်းဟိလ့်ခေါမ်လှီ့ 2အစိပ်ဟိုဝေါလ်ကထု မှူးဟိလ့်တိလှီ့ ဆောက်ဆီလှီ့အောလ်ထောလ်တိလှီ့လား ဖုလော်ရှင်နှုတ်ကပတ်တော် အမှုတော်ဆောင်တိလှီ့နား ကေးမီးရိုး အာမ်ဟောဟိလ့်ခေါမ်ဘော် ခေါင်လှီ့နား အာမ်ရော့ဟိလ့်။ 3အင်မ်ခန်းနောလ် အစိပ်ဟိုဝေါလ်ကထု ထောလ်ဟိလ့်တိလှီ့ကိမ်ကိမ် ဂရုတစိုက်စုံစမ်းထေ့နား နာင်စငေါလ် နီဘော် အစီစဉ်တကျရော့နားစေး အခိလ်ငိုက်တိရိုကေခိန်။ 4အင်မ်ဟိုဝေါလ်ယောင် နာင် ဆောင်ငယ်ဟိလ့်လောဒ့်ခေါမ်လှီ့ အမှန်နောက်ခေါမ် နာစုတ်င်လောဒ့်အိုက်။
သွီးဓေါလ်သန့်စင်ခေါမ် ပေးတိဆလော်ယောဟန်အမယ်လူးဟိုင်အမိန့်ဗာန်ခေါမ်
5ယုဒဘီ ဆောင်ဖလောင်ဟေရုဒ်နား အုပ်ချုပ်ခေါမ်အချိန်ငေါလ် ဇာခရိ မိန်နိုးတိ ဂျူးပုရောဟိတ်ခေါမ် အဘိယတိရို#1:5 အဘိယ= ဂျေရုဆလင်လုအောလ်မယ်တိ ဗိမာန်တော်ဝေါလ် အမှုတော်စိုင်းဟိုင် ဖွဲ့စည်းခေါမ် ဂျူးပုရောဟိတ် အဖွဲ့၂၄ဖွဲ့ဒုလ့်ကာလ်ကိ ဖွဲ့ဟှတ်တောလ်ပူလ်တိ ဂျူးပုရောဟိတ်ပွလ်ဟှတ်နားအမိန်။ ဟောင်ခေါမ် ပုရောဟိတ်#1:5 ပုရောဟိတ်= ဂျူးဘာသာရေးခေါင်ဆောင်လှီ့အောလ်ထောလ်ထေ့နား လေဝိယှီဝေါလ်ကိ ဆင်းသက်လူးတိအောလ်အထောလ်။ အင်မ်လှီ့နား ခေါင်လှီ့လား ဖုလော်ရှင်ကီကိုယ်ဝေါလ် တုလ်ထေ့နား ဂျေရုဆလင်လုအောလ်မယ်တိ ဗိမာန်တော်ဝေါလ် ပူဇော်ခေါမ်စိုင်းလောဒ့်တိလှီ့အောလ် အာမ်ထောလ်။ အဖွဲ့ဝင်ပွလ်ဟှတ်တောလ် အထောလ်။ အပီဟာ ဧလိရှဗက်ခါ အာရုန်တိရိုဟောင်ခေါမ် စိပ်စိပ်အစ္စရေးခေါင်ယှီ ဂျူးပုရောဟိတ်ယှီဝေါလ်ကိ မယ်လူးတိအောလ် အထောလ်။ 6ဇာခရိလား ဧလိရှဗက်နောက်ခေါမ် ဖုလော်ရှင်ပညတ်တော်လှီ့ကိမ်ကိမ် အမှော်မယ်ယဟနောလ် လိုက်နာထေ့နား ဖုလော်ရှင်မော်မှူးအောလ် ဖြောင့်မတ်တိအောလ်#1:6 ဖြောင့်မတ်တိ= ဖုလော်ရှင်ပညတ်တော်လှီ့ လိုက်နာတိ။ အဟီထောလ်။ 7အင်မ်ဘော်နားခါ ဧလိရှဗက်နောက်ခေါမ် အစိုးမယ်ထေ့ယခန်းနောလ် စိုးနောင်တောဝေကော်ဝေါလ် အင်မ်ဟွဒ့်ပွလ်နှိဓေါလ် တပြင်းအဟီစာန်လူးဟိလ့်။
8နှိုပ်ဟှတ်တောလ် ဇာခရိနား ဖုလော်ရှင်မော်ဝေါလ် ဂျူးပုရောဟိတ်တာဝန်အစိုင်း။ ဟိဘော်ဟိုင်ရိုးနောက်ဟိုဝေါလ်စေး အင်မ်အဖွဲ့နောက်ခေါမ် ဗိမာန်တော်ဒုလ့်ကာလ် ဖုလော်ရှင်ငေါလ် အမှုတော်ဆောင်ဟိုင် အလှည့်ကျခန်းနောလ်ထောလ်။ 9ဂျူးပုရောဟိတ်လှီ့ ထုံဘော် ဖုလော်ရှင်ဗိမာန်တော်ဒုလ့်ကာလ် အမွှေးနံ့သာလှီ့ ပူဇော်ဟိုင်ရိုး မဲနှိုက်ထေ့နား အာမ်ရွေးချယ်ဟိုဝေါလ် ဇာခရိ ရွေးချယ်အခံဟိလ့်လောဒ့်။ 10အင်မ်ခန်းနောလ် ဇာခရိနား ဗိမာန်တော်ဒုလ့်ကာလ် အမွှေးနံ့သာလှီ့ အပူဇော်ခေါမ်ချိန်ငေါလ် ခေါင်လှီ့ပူနူး ဗိမာန်တော်ခြံဒုလ့်ကာလ် ဆုအာမ်တောင်။
11အင်မ်ပါလ်နောလ် ဖုလော်ရှင်နား အတိလူးခေါမ် #1:11 နောတ်ဒေဝါ= ဖုလော်ရှင်စငေါလ်ကိလူးတိ နောတ်ပွန်။နောတ်ဒေဝါပါးဟှတ်ခေါမ် ဇာခရိနား အမွှေးနံ့သာလှီ့ပူဇော်နောက် ပလ္လင်ခလမ်းလာမ်းမာလ် ဇာခရိအောလ် တုလ်ဗာန်အဓေါင်နယ်။ 12ဇာခရိနား နောတ်ဒေဝါ အမှူးဟိုဝေါလ် အကိအယ်တောင်ထေ့နား အဇောတ်လှာယ်။ 13အင်မ်ဘော်နားခါ နောတ်ဒေဝါနား အင်မ်နောလ် “ကိကော့အား၊ ဇာခရိအား။ ဟိဘော်ဟိုင်ရိုး နောက်ဟိုဝေါလ်စေး နာင် ဆုတောင်ခေါမ် ဖုလော်ရှင်နား အရောက်ပါလ်။ နာင်ပီးဟာ ဧလိရှဗက်နား နာင်တွက် စိုးပုတောစောပွလ်ဟှတ် အဇောနောက်ကိုက်။ အင်မ်ဒိပ်စော ယောဟန် တိရို အမိန်နာမ်ဆူလောဒ့်အိုက်။ 14အင်မ်ဒိပ်စော အမယ်လူးခန်းနောလ် နာင်မီး တပြင်းနာမ်ပျော်လောဒ့်ဘော် အစွာခေါင်လှီ့ခါ အာမ်ပျော်လောဒ့်အိုက်။ 15ဟိဘော်ဟိုင်ရိုးနောက်ဟိုဝေါလ်စေး ယောဟန်ခေါမ် ဖုလော်ရှင်မော်ဝေါလ် ကြီးမြတ်တိပွလ်ဟှတ်တောလ် အထောလ်နိုက်။ အင်မ်နား အီဟိုဝေါလ်ခါ စပျစ်ဝိုင်လား အူလောက်လှီ့ အူးဟိုင်ဆီးယော်။ အင်မ် အမယ်လူးဟာမ်းယ ဟိုဝေါလ်ကထု ဉာဏ်အလင်းတော်ခေါမ် အင်မ်ဓေါလ်ဟှတောလ် အမယ်ရိုက်။ 16အင်မ်နား အစ္စရေးခေါင်ယှီလှီ့ အပြစ်ဒုစရိုက်ရိုးကိ နောင်တသံဝေဂလောဒ့်ဟနောလ်စိုင်းထေ့နား အင်မ်လှီ့ အရှင်ငေါလ်ထောလ်တိ ဖုလော်ရှင်လာမ်းမာလ် မောင်ဘွာလ်ဟနောလ် အစိုင်းရိုက်။ 17ယောဟန်ခေါမ် #1:17 ပရောဖက်= ဖုလော်ရှင် မိန့်ခေါမ်လှီ့ ခေါင်လှီ့အောလ် တဆင့်ဟောတိ။ပရောဖက်ဧလိယဘော် အခွင့်အာဏာလား တန်ခိုးလှီ့မယ်ထေ့နား အရှင်မော်ဝေါလ်ဈာတ်တိအောလ် အထောလ်နိုက်။ အင်မ်နား နူးပေါလ်လှီ့လား စိုးနောင်လှီ့ လုန်လိုယေဘွာလ်ဟနောလ်စိုင်းထေ့နား နာခံမှုမယ်ယတိလှီ့ခါ ဖြောင့်မတ်တိလှီ့အောလ် ဖုလော်ရှင်နားအပက်ခေါမ် အသိပညာလာမ်းအဓေါင်ပက်တိုက်။ အင်မ်ခန်းနောလ် ခေါင်လှီ့ခါ အရှင်အကြွလူးဟိုဝေါလ် အဆင်သင့်အာမ်ထောလ်နိုက်” တိရို အဟောင်။
18အင်မ်ပါလ်နောလ် ဇာခရိနားခါ နောတ်ဒေဝါဝေါလ် “နီဘောင်လှီ့ ထောလ်လူးဝိုက်နောက်ခေါမ် ကေးနား ဟီဘော် ကာမ်စုတ်င်ခွတ်ကိုက်။ ဟိဘော်ဟိုင်ရိုးနောက်ဟိုဝေါလ်စေး ကေးလားကေးပီးဟာနောက်ခေါမ် တပြင်းကေဟီဆောက်င်စာန်ဟိလ့်” တိရို အဟောင်ဘွာလ်။
19အင်မ်ဟိုဝေါလ် နောတ်ဒေဝါနား အင်မ်နောလ် “ကေးခေါမ် ဖုလော်ရှင်မော်ဝေါလ် ခစားလောဒ့်တိ ဂါဗြေလယောင်။ နာင်ငေါလ် ပျော်နောက်ဟိုင်နီဆီးတင်ပွန် ဟောင်ဟိုင်ရိုး ဖုလော်ရှင်နား အတိလူးယောင်။ 20အင်မ်ဘော်နားခါ ကေး ဟောင်ခေါမ်လှီ့ နာယုမ်ယခန်းနောလ် နီလှီ့ထောလ်လူးဟာမ်းယဝေ့ နာင် ခေခွတ်ကော်ဝေါလ် နာမောင်ငိုက်။ ဟိဘော်ဟိုင်ရိုးနောက်ဟိုဝေါလ်စေး ကေးခေခေါလှီ့ အချိန်ကျနားစေး အထောလ်လူးဝိုက်” တိရို အဟောင်။
21ဇာခရိလား နောတ်ဒေဝါ ဗိမာန်တော်ဒုလ့်ကာလ် အဟီခေဝေဟိုဝေါလ် ဗိမာန်တော်ခြံဒုလ့်ကာလ်ခေါင်ထုပရိတ်သတ်လှီ့နား ဇာခရိခေါမ် အာမ်စောင်။ အင်မ်လှီ့နား ဇာခရိ ဗိမာန်တော်ဒုလ့်ကာလ် ဟိဘော်ဟိုင်ရိုး အဓီနောက်ခေါမ် အာမ်စါစ်နောက်။ 22ဇာခရိ ဗိမာန်တော်ဝေါလ်ကိ အထွက်လူးဘွာလ်ဟိုဝေါလ် အခေခွတ်တီးယခန်းနောလ် ဗိမာန်တော်ဒုလ့်ကာလ် အမယ်ဟိုဝေါလ် ဖုလော်ရှင်နား ဇာခရိအောလ် အူဟှတ်ဟှတ် အဓေါင်ဟိလ့်နောက်ခေါမ် ခေါင်လှီ့နား အာမ်ယှောက်စုတ်င်။ ဟိဘော်ဟိုင်ရိုးနောက်ဟိုဝေါလ်စေး အင်မ် အမောမ်ခန်းနောလ် ကွတ်လှီ့ခူလှီ့အောလ်ယောင်အမှုရာဓေါင်ထေ့နား ဆက်ကယ်နား ခေခွတ်ကော်ဝေါလ် အမယ်။
23အင်မ်ပါလ်နောလ် ဇာခရိနား ဗိမာန်တော်ဝေါလ် စိုင်းလောဒ့်ဟိုင် ပုရောဟိတ်အမှုတာဝန်လှီ့ အစိုင်းပါလ်နောလ် အအိမ်းမာလ် အဈာတ်ဘွာလ်။ 24အချိန်မက်စောဓီပါလ်နောလ် ဇာခရိပီးဟာ ဧလိရှဗက်ခေါမ် အဟြွလ်အမယ်လူး။ အင်မ်ခန်းနောလ် အင်မ်မုတောနောက်ခေါမ် ခိုးပိုဟိုးဓီဝှေ့ ခေါင်လှီ့မော်ဝေါလ် ဈာတ်ရော့ခ်ကော်ဝေါလ် အမယ်ဟိလ့်။ 25ဧလရှဗက်နား “ဖုလော်ရှင်နား ကေးရိုး ဟြွလ်မယ်ခေါမ်အခွင့် အပက်ဟိလ့်ပါလ်၊ ဖုလော်ရှင်နား ကေးအမာနယ်ခေါမ်ကြောင့်ငေါလ် ခေါင်လှီ့ အထင်သေးခေါမ် အခိတ်ဟိလ့်ပါလ်” တိရို အပုန်းဟို့နားအပုန်းဟို့ အဟောင်ဝေး။
ကိုယ်တော်ယေရှု မယ်လူးဟိုင်အကြောင်း
26ဧလိရှဗက် အဟြွလ်ခိုးဆော့တ်မယ်လူးဟိုဝေါလ် ဖုလော်ရှင်နား နောတ်ဒေဝါ ဂါဗြေလခေါမ် ဂါလိလဲဘီရိုးကိ နာဇရက်လုအောလ် အတိဟိလ့်။ 27မာရိတိရို ဟောင်ခေါမ် ဟောက်ဟူစောစငေါလ် ဈာတ်ထေ့နား ဆီးတင်ခေခေါ အဟောင်ဝေဆောက်။ မာရိနောက်ခေါမ် ဆောင်ဖလောင်ဒါဝိဒ်ယှီဝေါလ်ကိ မယ်လူးတိ ယောသပ်ဓေါလ် စေ့စပ်အယ်တိအောလ်အထောလ်။ 28နောတ်ဒေဝါနား မာရိ ဘစ်တယ်ထေ့နား “ဖုလော်ရှင်နား နာင်ငေါလ် အမာနယ်ခေါမ်ဓေါင်ထေ့နား နာင်ဓေါလ်ဟှတ်တောလ်အမယ်” တိရို အဟောင်။
29အင်မ်ဘော်နားခါ မာရိနား နောတ်ဒေဝါ ဟောင်ခေါမ်ခေခေါလှီ့ အရောက်ဟိုဝေါလ် တပြင်းအလုန်ရှုပ်ထေ့နား ဟအီအဆိုလိုနောက်ခေါမ် စုတ်င်ဟိုင်အလီ။ 30အင်မ်ပါလ်နောလ် နောတ်ဒေဝါနား မာရိအောလ် “ကိကော့အား၊ မာရိအား။ ဟိဘော်ဟိုင်ရိုးနောက်ဟိုဝေါလ်စေး ဖုလော်ရှင်နား နာင် အမာနယ်ခေါမ်အဓေါင်ပါလ်။ 31နာင်ခေါမ် ဟြွလ်မယ်ထေ့နား စိုးပုတောစောပွလ်ဟှတ် နာစောနောက်ကိုက်။ အင်မ် ယေရှု တိရို အမိန် နာဆူလောဒ့်အိုက်။ 32အင်မ်နောက်ခေါမ် ကြီးမြတ်တိပွလ်ဟှတ်တောလ် ထောလ်လူးထေ့နား တန်ခိုလန်ဆုံးတိ ဖုလော်ရှင်နား အစိုးတိရို အာမ်ဟောင်ခေါမ် အခံလောဒ့်အိုက်။ ဖုလော်ရှင်ငေါလ်ထောလ်တိ အရှင်နား အင်မ်နောလ် အဆွား ဆောင်ဖလောင် ဒါဝိဒ်ဘော်ဝေါလ် အင်မ်ခေါင်ယှီလှီ့ အုပ်ချုပ်ခွတ်ခေါမ် အခွင့်အပက်တိုက်။ 33အင်မ်နား ယာကုပ်ယှီဝေါလ်ထောလ်တိ အစ္စရေးခေါင်ယှီလှီ့ အုပ်စိုးဆော်ထေ့နား အင်မ်နား အအုပ်စိုးခေါမ် အီဟိုဝေါလ်ခါ ပျက်ဟိုင်ဆီးယော်” တိရို အဟောင်။
34အင်မ်ပါလ်နောလ် မာရိနား နောတ်ဒေဝါဝေါလ် “ကေးနောက်ခေါမ် ဟောက်ဟူပွလ်ဟှတ်တောလ် ကေထောလ်ခန်းနောလ် နီလှီ့ဟိဘော် အထောလ်ခွတ်ကိုက်” တိရို အဟောင်။ 35နောတ်ဒေဝါနားခါ “ဉာဏ်အလင်းတော်ခေါမ် နာင်စငေါလ် ခိုက်လူးထေ့နား တန်ခိုးလန်ဆုံးတိ ဖုလော်ရှင်တန်ခိုးခေါမ် နာင်ဓေါလ်ဟှတောလ် အမယ်ရိုက်။ အင်မ်ခန်းနောလ် နာင် စိုးခါ မြင့်မြတ်ထေ့နား ဖုလော်ရှင်နားအစိုး တိရို အာမ်ဟောင်ခေါမ် အခံလောဒ့်အိုက်။ 36နာင် ယှီယောင် ဧလိရှဗက်ခေါမ် စာန်လူးထေ့နား စော ဇောနိုးခွတ်ယော်တိရို ခေါင်လှီ့နား အာမ်ခိန်နားခါ တုအောလ် အဟြွလ်မယ်ခေါမ် ခိုးဆော့တ်မယ်ပါလ်။ 37ဟိဘော်ဟိုင်ရိုးနောက်ဟိုဝေါလ်စေး ဖုလော်ရှင်နား ကိမ်ကိမ် အစိုင်းခွတ်ခန်းနောလ်ထောလ်” တိရို အဟောင်ဘွာလ်။
38အင်မ်ဟိုဝေါလ် မာရိနား “ကေးနောက်ခေါမ် ဖုလော်ရှင် အစေခံပွလ်ဟှတ်ဓေါလ် ကေထောလ်။ ကေးရိုး နာင်ဟောင်ခေါမ် ခေခေါဘော် ထောလ်ဆက်” တိရို အဟောင်။ အင်မ်ပါလ်နောလ် နောတ်ဒေဝါခါ မာရိစငေါလ်ကိ အဈာတ်ဘွာလ်။
ဧလိရှဗက်စငေါလ် မာရိအသိုင်ယေခေါမ်
39အချိန်မက်စောအဓီပါလ်နောလ် မာရိခေါမ် ဝဲလ်လာစိုင်းထေ့နား ဇာခရိမယ်နောက် ယုဒဘီရိုးကိ ကုန်းဟြှလ်လုလုဟှတ်တောလ် အရင်ငေါလ်အဈာတ်။ 40အင်မ်ဓိလ်နောလ် အခိုက်ယေဟိုဝေါလ် ဇာခရိ အိမ်းမာလ် ဝင်ထေ့နား ဇာခရိပီးဟာ ဧလိရှဗက် အဘစ်တယ်ယေ။ 41မာရိနား အဘစ်တယ်ခေါမ် ဧလိရှဗက်နား အယှောက်နား အဟြွလ်တုံဒုလ့်ကာလ်ကိ ဒိပ်စောနောက်ခေါမ် စကယ်လူးဗာန် ဉာဏ်အလင်းတော်တန်ခိုးခေါမ် ဧလိရှဗက်စငေါလ် အမယ်။ 42ဧလိရှဗက်နား မာရိအောလ် “နာင်နောက်ခေါမ် အစွာမုတောလှီ့ ကိမ်ကိမ်ထက်ကာလ် ပိုဝေနား နာခူလ်ပွန်။ နာင်နား နာစောနောက်ဟိုင် ဒိပ်စောခါ အခူလ်ပွန်ရိုက်။ 43နီဘော် အရှင်နားအနူး ကေးစငေါလ်အလူးခေါမ် ပွန်တိအခွင့် ဟိဘော်ဟိုင်ရိုး ကေးစငေါလ်အထောလ်လူးလောဒ့်။ 44နာင် ဘစ်တယ်ခေါမ် ကေယှောက်လောဒ့်နား ကေး ဟြွလ်တုံဒုလ့်ကာလ်ကိ ဒိပ်စောခေါမ် ပျော်ရွှင်ဗာန် အစကာလ်။ 45ဖုလော်ရှင်စငေါလ်ကိ ဆီးတင်ခေခေါ အမှန်နောလ် အထောလ်လူးဝိုက်နောက်ခေါမ် နာင်နား နာယုံခန်းနောလ် နာင်ခါ နာခူလ်ပွန်” တိရို ပါငယ်နား အဟောင်။
မာရိနား ဖုလာ်ရှင်အချီးမွမ်းခေါမ်
46အင်မ်ပါလ်နောလ် မာရိနားခါ
“ကေးနား ဖုလော်ရှင် ကေချီးမွမ်း။
47ကေး လုန်ခေါမ် ကယ်တင်ရှင်ငေါလ်ထောလ်တိ ဖုလော်ရှင်ကြောင့်ငေါလ် အပျော်လောဒ့်။
48ကေးနောက်ခေါမ် ဖုလော်ရှင်တွက် နိမ့်ကျတိ အစေခံမာလ် ထောလ်နားခါ
ဖုလော်ရှင်နား ကေးညှယော်။
တုအချိန်ငေါလ် ကထုစအယ်နား ခေါင်ယှီတိုင်ငေါလ်ကိ ခေါင်လှီ့ကိမ်ကိမ်နား
ကေးခေါမ် ကေခူလ်ပွန် တိရို အာမ်ဟောင်ဝိုက်။
49ဟိဘော်ဟိုင်ရိုးနောက်ဟိုဝေါလ်စေး ဘုန်းတန်ခိုးလန်တိဖုလော်ရှင်နား ကေးစငေါလ်
ပွန်တိလှီ့ ခိုက်ဟနောလ်အစိုင်းဟိလ့်ပါလ်။
ဖုလော်ရှင်မိန်ခါ အမြင့်မြတ်#1:49 မြင့်မြတ်တိ= ကွန်ဟှတ်ခါ အပြစ်စိုင်းယတိ။ အပြစ်မယ်ယတိ။
50ဖုလော်ရှင်နား ခေတ်အဆက်ဆက်ကာလ် အပုန်းဟိုး ရိုသေတိလှီ့ ခေါင်တိုင်ငေါလ်
အမာနယ်လန်ခေါမ် အဓေါင်ဆိုလ်။
51ဖုလော်ရှင်နား ပုန်းဟို့နားပုန်းဟို့အထင်ကြီးယေတိခေါင်လှီ့ အတန်ခိုးဝေါလ် နှိမ့်ချထေ့ဟနောလ်အစိုင်းရိုက်။
52ဖုလော်ရှင်နား အာဏာဝေါလ်အုပ်စိုးတိ ဆောင်ဖလောင်လှီ့ အင်မ်လှီ့ ပလ္လင်ခုံငေါလ်ကိ ခေါထေ့နား
နိမ့်ချအယ်တိခေါင်လှီ့ အရေးပါတိလှီ့အောလ် ထောလ်ဟနောလ်အစိုင်းရိုက်။
53ဖုလော်ရှင်နား မိတ့်ဟာ့တိလှီ့အောလ် ပွန်တိလှီ့ ပေးနားခါ
ဘို့တိလှီ့အောလ်စေး အီခါပေးကော် အတိဘွာလ်ဝိုက်။
54ဖုလော်ရှင်နား အပုန်းဟို့ အမာနယ်လန်ခေါမ် အမှတ်လောဒ့်ဆော်ခေါမ် အနေရိုး အပုန်းဟို့ အမှုတော်ဆောင်ရွက်တိလှီ့အောလ်ထောလ်တိလှီ့ အစ္စရေးခေါင်ယှီလှီ့ အကူညီပါလ်။
55ဟိဘော်ဟိုင်ရိုးနောက်ဟိုဝေါလ်စေး ဖုလော်ရှင်နား ကေးမီး ဆွားကိုင်လှီ့အောလ်ထောလ်တိ #1:55 အာဗြဟံ= ဂျူးခေါင်ယှီလှီ့နား စိပ်စိပ်အာမ်ဆွားလှီ့ဒုလ့်ကာလ်ပူလ်တိ ပွလ်ဟှတ်။ အာဗြဟံလား အင်မ်ယှီယောင်လှီ့အောလ် ကတိအပက်ဟိလ့်ခန်းနောလ်ထောလ်”
တိရို ဖုလော်ရှင်အချီးမွမ်း။
56အင်မ်ပါလ်နောလ် မာရိခေါမ် ဧလိရှဗက်ဓေါလ် ခိုးထုမ်ဘောင် ဟှတောလ် မယ်ဟိလ့်ထေ့နား အအိမ်းမာလ် အဈာတ်ဘွာလ်။
သွီးဓေါလ်သန့်စင်ခေါမ်ပေးတိ ဆလော်ယောဟန် အညှာယေခေါမ်
57အင်မ်ပါလ်နောလ် ဧလိရှဗက် အညှာယေဟိုင် အချိန်ကျလူးဟိုဝေါလ် စိုးပုတောစော အဇောနောက်။ 58ဧလိရှဗက် အိမ်းစင်းပွီလှီ့လား ယှီယောင်လှီ့နား အင်မ်နောလ် ဖုလော်ရှင်နား အမာနယ်လန်ခေါမ် အာမ်ယှောက်ခန်းနောလ် အင်မ်ဓေါလ်ဟှတောလ် အာမ်ပျော်လောဒ့်။
59ဒိပ်စော အဆောက်င်အဆာတ့်နှိုပ်ပါလ် အရေးဖျားလှီး#1:59 အရေဖျားလှီ့မင်္ဂလာ= မောရှေပညတ်ကျမ်းရိုး ရော့ကယ်တိဘော် ပုတောစောအင်္ဂါ အွတ်လောဒ့်ခေါမ်ဓလေ့အောလ်ထောလ်။ မင်္ဂလာစိုင်းဟိုင် ခေါင်လှီ့ အာမ်ခိုက်လူးဟိုဝေါလ် အင်မ်လှီ့နား ဒိပ်စောအမိန်ခေါမ် အပေါလ် ဇာခရိမိန်ငေါလ် ဆူဟိုင် အာမ်လီ။ 60အင်မ်ဘော်နားခါ ဒိပ်စောအနူးဧလိရှဗက်နား “အင်မ်ဘော်ဆီးယော်။ အင်မ် ယောဟန်တိရိုယောင် ဆူလောဒ့်အိုက်” တိရို အဟောင်။
61အင်မ်လှီ့နားခါ ဧလိရှဗက်အောလ် “နာင် ယှီယောင်ဒုလ့်ကာလ် ယောဟန် တိရို မိန်နိုးတိ အူခါမယ်ယော်” တိရို အာမ်ဟောင်။ 62အင်မ်ခန်းနောလ် အင်မ်လှီ့နား ဒိပ်စောနား အပေါလ် ဇာခရိအောလ် ဟိဘောင်မိန် ဆူဟိုင်နာလီ တိရို ခူဟန်ကွတ်ဟန်ရိုး အာမ်ဟိ့။ 63ဇာခရိနားခါ လုံးဆောင်းဖုန်းချပ်ဟှတ် တောင်ထေ့နား အစိုးမိန်ခေါမ် ယောဟန် တိရို အရော့။ အင်မ်ဟိုဝေါလ် မှူးတိခေါင်လှီ့နား အာမ်စါစ်နောက်လှလ်။ 64ချက်ချင်းကုံး ဇာခရိ ခေဘွာလ်ခွတ်ထေ့နား ဖုလော်ရှင် စအယ်နားအချီးမွမ်းလှာလ်။ 65အိမ်းစဉ်းပွီလှီ့ကိမ်ကိမ်နား အင်မ်ဘော်အထောလ်ခေါမ်လှီ့ အာမ်မှူးဟိုဝေါလ် အာမ်ကိအယ်တောင်လှလ်။ ခေါင်လှီ့နား အင်မ်ဘော်ထောလ်ခေါမ်လှီ့ကိမ်ကိမ် ယုဒဘီရိုးကိ ကုန်းဟြှလ် ဓိလ်တိုင်ငေါလ် အာမ်ဟောင်ရောခ့်လှာယ်။ 66အင်မ်ဆီးတင် ရောလောဒ့်တိလှီ့ ခေါင်တိုင်နား “အင်မ်ဒိပ်စော အလန်လူးနားစေး ဟိဘောင်ခေါင်ငေါလ် အထောလ်လူးဝိုက်” တိရို အာမ်လုန်ဒုလ့်ကာလ်အာမ်စဉ်းစား။ ဟိဘော်ဟိုင်ရိုးနောက်ဟိုဝေါလ်စေး ဖုလော်ရှင်တန်ခိုးတော်ခါ အင်မ်ဒိပ်စောဓေါလ် ဟှတောလ်အမယ်ဟာ့ခန်းနောလ်ထောလ်။
ဖုလော်ရှင် ဇာခရိနား အချီးမွမ်းခေါမ်
67အင်မ်ပါလ်နောလ် ဉာဏ်အလင်းတော်ခေါမ် ယောဟန်အပေါလ်ဇာခရိဓေါလ်ဟှတောလ် မယ်ထေ့နား ဖုလော်ရှင်ကိုယ်စား ဆီးတင်လှီ့အဟောခေါမ်စေး
68“အစ္စရေးခေါင်ယှီလှီ့ အရှင်ငေါလ်ထောလ်တိ ဖုလော်ရှင် ကေချီးမွမ်း။ ဟိဘော်ဟိုင်ရိုးနောက်ဟိုဝေါလ်စေး
ဖုလော်ရှင်ခေါမ် အပုန်းဟို့ခေါင်ယှီလှီ့ လွှတ်မြောက်ဟနောလ်စိုင်းဟိုင်ရိုး အကြွလူးပါလ်။
69ဖုလော်ရှင်နား အပုန်းဟို့ အစေခံဆောင်ဖုလောင်ဒါဝိဒ်ရိုးကိ မယ်လူးတိ တန်ခိုးအာဏာလန်တိ
ကယ်တင်ရှင် ကေးမီးကိမ်ကိမ်တွက်ကာလ် အပက်ဟိလ့်ပါလ်။
70ဟမာလ်ကထု ဖုလော်ရှင်နား မြင့်မြတ်တိ ပရောဖက်လှီ့အောလ် အဟောင်ဟိလ့်ခေါမ်ဘော်
71နီတန်ခိုးလန်တိ ကယ်တင်ရှင်နား ကေးမီး ဆုန်ပွီလှီ့လား
ကေးမီး မှူးတောင်တိလှီ့ကိမ်ကိမ်ကွတ်တောလ်ကိ အကယ်ရိုက်။
72ဖုလော်ရှင်နား ကေးမီးဆွာကိုင်လှီ့အောလ် အမာနယ်ခေါမ်အဓေါင်ဟိုင်လား
အပက်ဟိလ့်ခေါမ် #1:72 သဘောတူညီမှု= ခေါင်လှီ့လားဖုလော်ကိုယ်ကိုဝေါလ်အာမ်တောဒ့်ခေါမ်ကတိမြင့်မြတ်တိသဘောတူညီမှုခါ အခိန်နယ်ရိုက်။
73ဖုလော်ရှင်နား ကေးမီးဆွားကိုင်ရိုးထောလ်တိ အာဗြဟံရိုး အပက်ဟိလ့်ခေါမ်ကတိဘော်
74ကေးမီး ဆုန်ပွီလှီ့ ကွတ်တောလ်ကိ ကယ်ထေ့နား ကေးမီးခါ ကိအယ်ခေါမ်လှီ့မယ်ကော် ဖုလော်ရှင် အမှုတော်ကာမ်ထမ်းခွတ်ဟနောလ် အစိုင်းရိုက်။
75အင်မ်ဘော်ခန်းနောလ် ကေးမီးခါ ဖုလော်ရှင်မော်ဝေါလ် မြင့်မြတ်ထေ့နား ဖြောင့်မတ်တိဘဝအောလ် ဆက်ကယ်နားကာမ်မယ်ခွတ်ကိုက်”
တိရို အထောလ်။
76အင်မ်ပါလ်နောလ် ဇာခရိနား အစိုးဝေါလ်
“ကေးစိုးဝြား၊ နာင် တန်ခိုးလန်ဆုံးတိ ဖုလော်ရှင် ပရောဖက် တိရို အာမ်ဘစ်တယ်ထေ့နား
နာင်နောက်ခေါမ်အရှင်မော်ဝေါလ်ဈာတ်တိ အင်မ်လာမ်း စိုင်းပက်လောဒ့်ဗာန်တိအောလ်ခါ နာထောလ်နိုက်။
77ဖုလော်ရှင်နား ခေါင်လှီ့အပြစ် ခွင့်လွှတ်ထေ့နား
ကယ်တင်ဟိုင်အကြွလူးခေါမ်အကြောင်း
နာင်နား ခေါင်လှီ့အောလ်ခါ နာဟောလောဒ့်အိုက်။
78ဟမီးဖုလော်ရှင်နား အမာနယ်ခေါမ်ကြောင့်ငေါလ် ဟြှားလုအောလ်ကိ မေရှိယခေါမ် ဟမီးစငေါလ်လူးထေ့နား
79အယှုန်ဒုလ့်ကာလ် မယ်တိလှီ့လား ဘာလ့်ဟိုင်စဉ်းစားထေ့နားကိတိလှီ့ ကူညီထေ့နား ငြိမ်းချမ်းတိလာမ်းမာလ် လာမ်းအဓေါင်ပက်တိုက်”
တိရို အဟောင်။ 80တုအောလ် ယောဟန်ခေါမ် အပုန်းလန်လူးထေ့နား အလုန်စာန်းတိအောလ်အထောလ်လူး။ အင်မ်နား အစ္စရေးခေါင်ယှီလှီ့မော်ဝေါလ် အမှုတော်စအယ်နား ဆောင်ရွက်လှောင်နောလ် ခေါင်မယ်နောက်ယဒိုင်ဒုလ့်ကာလ် အမယ်ဟိလ့်။
Attualmente Selezionati:
ရှင်လုကာ 1: CSJ
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Chin Songlai (ဆောင်လိုင်) Bible by Beyond Translation is licensed under Creative Commons Attribution-ShareAlike 4.0 License.