Luke 1
1
Eti Mbuk Emi Abaŋade Jeses Emi Luke Ekewetde
Luke Ewed Deta Ɔnɔ Tiofilɔs
1Ata ukpono mfo Tiofilɔs, mme ediwak owo ema ewed ebaŋa mme ŋkpɔ emi ɔkɔwɔrɔde osu ke otu nnyiŋ abaŋa Jeses kpa nte Abasi eketiŋde. 2Mmɔ emi ema ewed ukem-ukem se mme mmɔ odo ekedide ntiense ebaŋa mme ŋkpɔ emi eketibe toto ke editɔŋɔ emi eketiŋde enɔ nnyin. 3Ami, ŋko, mmetim nduŋɔde ndikud kpukpri ŋkpɔ emi eketibede toto ke editɔŋɔ. Ndien ami mme nyuŋ nyime nte ke ɔyɔfɔŋ ami ndiwed nnɔ fi Tiofelɔs mme ata nnen-nnen ŋkpɔ emi eketibede, 4man afo ɔfiɔk nte ke kpukpri mme ŋkpɔ odo ekekpepde fi abaŋa Jeses edi akpanikɔ.
Engel ɔdɔhɔ ete ke John emi ediduɔkde mme owo mmɔŋ Eyemana
5Ini odo Herod ekedide ɔbɔŋ ke edem obio Juda, owo kied ama odu emi ekekotde Zakaria emi okoduŋde do. Owo emi ekedi kied ke otu mme oku Abasi. Anye okodu ke ikpehe mme oku emi ekekotde edian owo emi ekekerede Abijah. Ŋwan Zakaria emi ekekotde Elisabed okonyuŋ oto ubon Aaron, ata akpa oku mme Jew. 6Zakaria ye ŋwan asie Elisabed ekedi mbon emi ekenamde se inende nte Abasi ɔdɔhɔde enyuŋ enim kpukpri ibed Asie. Mmɔ ema enim kpukpri ibed Abasi ɔkɔnɔde ikɔd Asie enyuŋ enana ndo. 7Nte ekpededi, mmɔ ikenyeneke eyen ndomokied, kodo Elisabed ekedide ada ndien ke idahaemi mmɔ mbiba ema esɔŋ.
8Usen kied, Zakaria akanam utom nte oku ke iso Abasi kodo ekedide ini ikpehe asie ndikpono Abasi ke temple ke Jeruselem. 9Nte ubono-ŋkpɔ mme oku odo edide, mmɔ ema esin afia ndimek anye emi edidukde ke temple Ɔbɔŋ ndikifɔp ufuɔŋ-ŋkpɔ ke temple, ndien afia odo ama odoro Zakaria. 10Ke ini ama ekekem ɔnɔ anye ndifɔp ufuɔŋ-ŋkpɔ odo ke esit temple, ediwak mme owo ema eboho ke aŋwa enyuŋ ebɔŋ akam enɔ Abasi.
11Nte Zakaria okodude ke esit temple, engel Ɔbɔŋ ama ɔbiɔŋɔde ɔnɔ anye ini-kied, onyuŋ ada ke ubɔk nnasia itie-uwa odo esifɔpde ufuɔŋ-ŋkpɔ. 12Ke ini Zakaria okokutde anye, anye ama okop ndik ata eti-eti. 13Edi engel odo ama ɔdɔhɔ anye ete, “Kufehe ndik, Zakaria! Abasi omokop akam mfo emi abaŋade enɔ-eyen ndien ŋwan mfo Elisabed eyeyomo onyuŋ aman eyen-eden ɔnɔ fi. Afo enyene ndisio enyiŋ asie, John. 14Eyen mfo odo eyeda akwa idara ye inem esid ɔsɔk fi, ndien ediwak owo eyenem esid eti-eti ke anye ama amana, 15kodo Abasi eyeda anye nte ata akwa owo. Anye inyeneke ndiŋwɔŋ baba ɔkpɔsɔŋ mmin ndomokied emi anamide owo. Anye eyeyɔhɔ ye Edisana Sibirid Abasi kpa ke ini anye osuk odude ke ntuŋ-idibi eka asie. 16Anye eyenam ndiwak mbon Israel ekpɔŋ ndiɔi ido mmɔ enyuŋ efiak edem edinam ŋkpɔ enɔ Ɔbɔŋ emi edide Abasi mmɔ. 17Anye eyebeŋe mme owo idem ke abaŋa edidi Ɔbɔŋ, eyenyuŋ enyene ukem edu-uwem ye odudu emi oku Elijah ekenyenede. Anye eyeda emem edi ke ufɔd mme ete ye nditɔ. Anye eyeda mbon-ntrutɔŋ ye Abasi usuŋ ndikabade-esid enyuŋ enwɔŋɔde enyene nti-ibuod emi Abasi ɔnɔde nti owo. Anye eyenam kpukpri mme ŋkpɔ emi man anye ebeŋe mmɔ idem mbemiso Ɔbɔŋ ke idem Asie edi.”
18Ndien Zakaria obup engel odo ete, “Ndinam didie ndiɔŋɔ nte se afo etiŋde eyetibe ke akpan? Ami ndi akani-eden, ŋwan mi ŋko ɔsɔŋ onyuŋ ebe isua uman-eyen.”
19Engel odo ɔdɔhɔ Zakaria ete, “Enyiŋ mi edi Gabriel ami nda ŋkpere Abasi kpukpri ini mbeŋe-idem ndinam ŋkpɔ nnɔ Anye. Edi Abasi ɔkɔdɔŋ mi ete ndi nditiŋ eti mbuk emi nnɔ fi nte ke afo eyeyene eyen. 20Idahaemi, kpaŋ-utɔŋ! Kpukpri se ŋketiŋde nnɔ fi eyetibe ke edikem ini emi Abasi okonimde. Edi sia afo mukunimke se ŋketiŋde nnɔ fi, Abasi eyenam fi edi imum, man otodo afo udukeme nditiŋ ikɔ tutu usen odo eyen mfo eden odo edimanade.”
21Ke ini Zakaria ye engel odo ekesuk etiŋde ikɔ ke esid ke temple, ke Jeruselem, mme mmɔ emi ekebetde ke aŋwa temple odo ema ekere se ikpenamde anye ebighe ntre ke esid temple odo. 22Ke ini Zakaria ama ɔkɔwɔrɔ edi, anye ikikemeke nditiŋ ikɔ ye mme owo, edi oto ke mme edinam emi anye akanamde ke ubɔk asie mikinyuŋ ikemeke nditiŋ ikɔ, mmɔ ema efiɔk ete ke Abasi ama owud anye ŋkukud ke esid temple Jeruselem odo.
23Ke ini unam utom Zakaria ke esid temple ama okokure, anye ema ɔkpɔŋ Jeruselem onyuŋ afiak ɔnyɔŋ ufɔk asie ke Juda. 24Ke mme ini ama ekebe, Elisabed, ŋwan Zakaria ama oyomo. Anye ama etie ke ufɔk ikpɔŋ, ɔkpɔŋ mbon efen ke ɔfiɔŋ ition. 25Anye ɔdɔhɔ ke idem asie ete, “Abasi ɔmɔfɔn ido ye ami idahaemi. Anye ɔmɔkwɔhɔde bud ke ɔkpɔ-iso mi efep emi mme ŋkenyeneke eyen.”
Engel ɔdɔhɔ Mary Ete ke Anye eyenyene Eyen-eden
26Ndien ke ini idibi Elisabed ama ɔkɔyɔhɔ ɔfiɔŋ itiokiet, Abasi ɔdɔŋ engel Gabriel aka Nazared, obio emi odude ke isɔŋ Galilee. 27Anye ama aka ebine okpuk-ŋkaifedi emi ekekotde Mary. Emi ekeŋwɔŋɔde ndiyak anye nnɔ Josef ke ndɔ. Emi okotode ke ubon edidem David. 28Engel odo ama edi ebine anye onyuŋ ɔdɔhɔ anye ete, “Mmɔkɔm fi Mary, Abasi ɔmɔfɔn ido ye afo, Anye odu ye afo, omonyuŋ ɔdiɔŋ fi akan kpukpri iban eken.”
29Edi ke ini Mary okokopde ekɔm engel odo, ibuod ama oyoŋ anye eti eti, anye onyuŋ ekere ke idem asie se utɔ ekɔm odo ɔwɔrɔde. 30Ndien engel ɔdɔhɔ anye ete, “kufehe ndik Mary, kodo Abasi emenehede ɔfɔn ido ye afo. 31Kpaŋ utɔŋ, afo eyeyomo onyuŋ aman eyen eden. Afo enyene ndikod enyiŋ asie, Jeses. 32Anye eyedi ata akpan-owo. Mme owo eyekod Anye eyen ata edikoŋ Abasi. Ɔbɔŋ Abasi eyenam anye edi Edidem ɔnɔ mbon asie kpa nte edidem David emi ekedide ete-ete asie. 33Anye eyeda ubɔŋ ke ubon ufɔk Jacob ke nsinsi ndien anye idinyuŋ itreke ndida ukara.”
34Edi Mary obup engel ete, “Ami ndisaŋa-didie nyomo nnyuŋ mman eyen sia akananam ami mme nnamke ima ye eden-owo akpa?”
35Ndien engel odo ɔbɔrɔ Mary ete, “Editibe ntem: Edisana sibirid eyedoro fi ke idem, ndien odudu edikoŋ nkan, Abasi eyefuk fi nte mbukpɔŋ ndien emi eyenam fi oyomo. Mmɔdo, Eyen odo afo edimande eyedi edisana, ndien kpukpri owo eyekod Anye, Eyen Abasi. 36Kpaŋ-utɔŋ nnɔ mi: Elisabed, iman mfo ŋko eyenyuŋ aman eyen eden okposuk edi anye edide akani-aŋwan. Okposuk edi nte mme owo edɔhɔde ete ke anye edi ada, enye omoyomo idahaemi, ɔfiɔŋ itiokied edi emi. 37Kpukpri mme ŋkpɔ emi etibe kodo ŋkpɔ ndomo kied iduhe emi Abasi mikemeke ndinam.”
38Ndien Mary ete, “Ami ndi isuŋ-utom Ɔbɔŋ, yak kpukpri se afo etiŋde abaŋa mi ɔwɔrɔ osu.” Ke emi ama ekebe, engel odo ɔnyɔŋ.
Mary Ekese Elisabed
39Ke mme usen ifaŋ ama ekebe, Mary ebeŋe-idem onyuŋ aka ke usɔp ke obio emi okodude ke obod, ke edem Juda. Emi edi ebied emi Zakaria ye ŋwan asie, Elisabed ekeduŋde. 40Ke ini anye ama ekesim ke obio odo, anye aka ke ufɔk Zakaria. Mary oduk ke ufɔk onyuŋ ɔkɔm Elisabed. 41Ke ndo-ndo odo, Elisabed okokopde ekɔm Mary, Eyen odo ke ntuŋ-idibi Elizabed atuak ye idara ndien anye onyuŋ ɔyɔhɔ ye Edisana Sibirid. 42Elisabed osio-mkpo idaraesid ye Mary, onyuŋ ɔdɔhɔ ete, “Mary, Abasi ɔmofɔŋ-ido ye afo akan kpukpri iban eken, Anye eyenyuŋ ɔfɔŋ ido ye eyen odo emi esinede ke ntuŋ-idibi mfo. 43Emi edi akamba edidiɔŋ ɔnɔ mi, ete ke afo, eka Ɔbɔŋ mi ndidi ndise mi. 44Kpa ke ndo-ndo odo ami nkokopde ekɔm mfo, eyen ke ntuŋ-idibi mi atuak ye idaraesid. 45Emenehede ediɔŋ fi kodo afo enimde ete ke Ɔbɔŋ eyenam ye afo se Anye ɔkɔŋwɔŋɔde ndinam nnɔ fi.”
Ikwɔ Mary
46Ndien Mary ɔkɔm Abasi ye ikwɔ ete,
“Ke ofuri esid mi, ami mɔkɔm Ɔbɔŋ.
47Ofuri idem mi emenyene idaraesid,
ke Abasi emi anyaŋade mi.
48Kodo Anye amanam ɔfɔn ye ami isuŋ utom Asie
ke usuhɔde itie mi nte isuŋ-utom Asie,
ke ndimek mi ndidi eka Andinyaŋa.
Ke ntak emi, tɔŋɔde ke emi,
kpukpri mme emana eyekod mi
anye emi ema ekediɔŋ.
49Kodo Anye emi enyenede kpukpri Odudu
amanam mme ikpɔ ŋkpɔ ɔnɔ mi.
Anye edi Edisana.
50Anye eyewud mbɔm ɔnɔ mme owo emi eteŋede Anye
Tɔŋɔde ke emana tutu osim emana.
51Anye omowud kpukpri owo akwa odudu Asie.
Anye ɔsuhɔde mbon emi enyenede ntaŋ-idem,
enyuŋ ekere ebaŋa idem mmɔ ke ŋkɔhɔde-idem.
52Anye ɔbɔ mme ndidem odudu
edi Anye emenedede ke enyɔŋ,
mmɔ odo esuhɔdede idem mmɔ.
53Anye ɔyuhɔ mmɔ emi ekopde biɔŋ ye nti ŋkpɔ emi mmɔ eyomde,
edi Anye ebin mme imɔ owo ɔsiɔŋɔ ye ukpɔk-ubɔk.
54Anye amaŋwam nnyin mme isuŋ-utom Asie,
mme mbon Israel.
Anye emeti eŋwɔŋɔ Asie ndiwud nnyin mbɔm.
55Ɔnɔ Abraham ye ubon asie ke nsinsi
kpa nte Anye eketiŋde ɔnɔ mme ete-ete mmɔ
ete ke imɔ iyenam.”
56Mary ama odu ye Elisabed ke ŋkpɔ nte ɔfiɔŋ ita, ndien anye afiak ɔnyɔŋ aka ufɔk asie ke obio Nasared.
Elizabed aman John
57Ke ekekemde ini Elisabed ndiman eyen asie, anye ama aman eyen-eden. 58Ndien ke ini mme mbɔhiduŋ ye mme iman asie ekekopde mbuk akwa mbɔm odo Abasi ekeyenede ɔnɔ anye, mmɔ edi dara ye anye.
Unim-Mbobi John, Emi Ɔduɔkde mme owo mmɔŋ
59Ke ini eyen odo ama ɔkɔyɔhɔ usen itiaita, mme mbɔhiduŋ ye mme iman asie ema edi ke ufɔk Zakaria ndinam usɔrɔ unim-mbobi eyen odo. Mmɔ ekeyom ndikod enyiŋ asie Zakaria, ndian ete asie. 60Edi Elisabed eka eyen odo ete mmɔ, eyen odo idikereke Zakaria, edi enyiŋ asie enyene edidi John.
61Mme mbon odo enyuŋ edɔhɔ anye ete ke mmeimɔ ikikere ete ke eyekod eyen odo edian iman mmɔ, kodo iman mmɔ ndomokied ikereke enyiŋ odo.
62Ndien mme owo odo ema enam mme idiɔŋɔ ke ubɔk mmɔ enɔ Zakaria ndibup anye nte anye oyomde ekod eyen asie 63Zakaria ndien ama anam idiɔŋɔ ke ubɔk asie ndiwud ete ke imɔ imoyom itiad-ŋwed ndiwed ŋkpɔ. Ke mmɔ ema ekemen edi, Zakaria ewed ete, ke enyene ndikod eyen imɔ John. Kpukpri owo emi ekekutde se anye ekewetde ekedu ke ata mkpaidem. 64Ke ndo-ndo odo, Zakaria ama ekeme ndifiak ntiŋ ikɔ, anye onyuŋ ɔtɔŋɔ nditoro Abasi. 65Mme mbɔhiduŋ ema edu ke mkpaidem enyuŋ eyɔhɔ ye uteŋe, ndien etop ŋkpɔ emi eketibede asuana ke ofuri ŋkan-ŋkuk obod ke isɔŋ Juda. 66Ndien kpukpri mmɔ odo ekekopde ebaŋa mme ŋkpɔ emi eketibede ema ekere eti-eti ke esid mmɔ se eyen emi edidide ke ini iso, kodo ema ekud ete ke odudu Abasi odu ye anye.
Zakaria Otoro Abasi
67Ete John, Zakaria, ama ɔyɔhɔ ye Edisana Sibirid ndien anye onyuŋ etiŋ mme ikɔ emi Abasi akayaradede ɔnɔ anye ete,
68Eyak nnyin itoro Ɔbɔŋ,
emi edide Abasi Israel,
kodo Anye emedi ndiŋwam nnyin ikɔd Asie,
eyeyuŋ anyaŋa nnyin
69Anye ɔmɔdɔŋ ɔnɔ nnyin
akwa andiyaŋa edinyaŋa nnyin.
Anye oto ke ubon isuŋ-utom Asie, Edidem David.
70Abasi amanam kpa nte Anye ɔkɔŋwɔŋɔde
oto ke oku Asie ata anyaŋ ini ekebede.
71Anye ɔmɔdɔŋ okop-odudu owo ndinyaŋa nnyin
nsio ke odudu mme asua nnyin,
onyuŋ osio nnyin ke odudu
kpukpri mmɔ odo esuade nnyin.
72Abasi anam emi man owud mbɔm
emi Anye enyenede ɔnɔ mme ete-ete nnyin,
man onyuŋ eti Edisana ediomi Asie emi Anye akanamde ye nnyin,
73Emi Anye ɔkɔsɔŋɔde ɔnɔ ete-ete nnyin Abraham ye uŋwɔŋɔ,
74ke Anye eyenyaŋa nnyin osio
ke odudu mme asua nnyin,
man otodo nnyin ikpenam-ŋkpɔ inɔ Anye
ikunyuŋ ubak mme asua nnyin enyin.
75Ndinyuŋ ndu uwem emi asanade onyuŋ enende ke iso Asie
ke kpukpri usen uwem nnyin.
76Ndien afo, eyen mi John
eyekod fi oku ata Edikoŋ Abasi.
Kodo afo eyebem iso aka ekebeŋe
mme owo idem ke ini Ɔbɔŋ edidide.
77Afo eyeŋwam mme owo
ndifiɔk nte ke Ɔbɔŋ ke edi,
ndinyaŋa mmɔ ke ndifen mme idiɔk-ŋkpɔ mmɔ.
78Ke ntak akwa mbɔm Asie, Andinyaŋa emi etiede nte usiaha-utin eyeto ke heaven edi ebine nnyin
Ke ntem Anye ke ɔdɔŋ Ɔbɔŋ oto
ke obio-ubɔŋ-Abasi ediŋwam nnyin.
79Anye eyeda uŋwana ɔsɔk mmɔ emi minyeneke Abasi
enyuŋ efehede ndik ete ke mmeimɔ iyekpa.
Anye eyeda nnyin usuŋ man otodo nnyin idu ke emem ye Abasi.
80Eyen odo, John, ɔkɔri ke mbuɔtidem onyuŋ okpon ke edu-uwem. Anye okoduŋ ke edisad ebied tutu anye ɔtɔŋɔ ndikwɔrɔ-ikɔ aŋwa-aŋwa nnɔ mbon Israel.
Attualmente Selezionati:
Luke 1: EKI
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Eki Bible by Beyond Translation is licensed under Creative Commons Attribution-ShareAlike 4.0 License.