Yelemiya 39
39
Mzi wa Yelusalemu utaghuighwa
1Sedekia zumbe wa Yuda, ahegholokela mwe mzi wa Yuda kwa mavui mnane na myezi kenda, Nebukadineza zumbe wa Babeli ateita na waghojo wakwe wakautoa mzi wa Yelusalemu na kuudenga. 2Mwe mshi wa kenda ng'wezi wa ne, vui ja muongo mng'we na ng'wenga ja ugholokezi wa zumbe Sedekia, ukando wa mzi ukagandulwa.
3Vikibinda waambizi wa zumbe wa Babeli wakaingila na kuikala he uvi wa gatigati. Awo waambizi nee ni Neligali Shaleza wa Samugali, Nebo Salisekimu mkulu wa waghojo mwe kaya cha zumbe na Neligali Shaleza mkulu wa waja wemnka zumbe vinyanyi, hang'we na waambizi watuhu woshe wa zumbe wa Babeli.
4Sedekia yohe zumbe wa Yuda na waghojo wakwe woshe wahewaona kuti mzi wa Yelusalemu uzaghuighwa, wakawanyiika nakio, wakaita se ya mzi, kwa kuzinkia mwe kabuwa ka zumbe, he uvi gati ya nkando mbii, wakaita kwe koongo ja mto Yolidani. 5Miya waghojo wa Wakalidayo wakawabasha na kumgwia zumbe Sedekia hantu hashinaho miima uko Yeliko. Wahemgwia wakamuighala kwa Nebukadineza, zumbe wa Babeli ndiye ai mwe mzi wa Libula mwe shi ya Hamasi, yohe akamlaha. 6Uko Libula, zumbe wa Babeli akawakoma wana wa kibwanga wa zumbe Sedekia aiwelele kwa mesho yakwe, vingi akawakoma wagholokezi watuhu woshe wa shi ya Yuda. 7Vikibinda, akamnkunta Sedekia mesho na kumshunga mpingu na kumuighala Babeli. 8Waghojo wa Wakalidayo wakaitoa moto nyumba ya kizumbe na nyumba za wantu, na kuzikinya nkando za Yelusalemu. 9Vikibinda, Nebuzaladani mkulu wa waghojo wa zumbe, akawaighala Babeli wantu woshe ndiwo waishighale mwe mzi, wantu wakiighalewo kwa zumbe wa Babeli na wantu watuhu wosheni. 10Miya Nebuzaladani mkulu wa waghojo wa zumbe, akaeka wantu wagheke wakoshi mwe shi ya Yuda na washikidahawo, akawainka mbuwa za mizabibu na kuwainka mbuwa ntuhu za kuima.
Yelemia ataekewa
11Nebukadineza zumbe wa Babeli, nee aimuaghiize Nebuzaladani mkulu wa waghojo kwa mbuli ya yelemia kuti, 12“Mghue Yelemia umuwelele vitana, ushezamdoa, miya umghosholee chochoshe ndicho akunde.” 13Ushe, Nebuzaladani mkulu wa waghojo na Nebushazibani mkulu wa waambizi wa zumbe na Neligali Shaleza mkulu wa waja wemnka zumbe vinyanyi, hang'we na waambizi woshe wa zumbe wa Babeli, 14wakawaaghiiza wantu wamulavye Yelemia mwe chumba cha waghojo. Wakamuighala Yelemia kwa Gedalia ng'wana wa Ahikamu, ng'wezukuue ja Shafani, amuuze kaya aikale naye. Yelemia akaikala kaya kwakwe hang'we na wandughu wakwe.
Zumbe Mulungu ataika kilagha cha kumvunila Ebedimeleki
15Haja Yelemia aishungighwe he ukomea wa waghojo, Zumbe Mulungu akamghamba 16aite akamghambe Ebedimeleki Muesiopia kuti, Zumbe Mulungu mwena nguvu zoshe, Mulungu wa Izilaeli aghamba ivi, “Imi nenibontole zia mbuli nilongiezo, neniushakaze unu mzi na shiyo kuutamiza. Izo mbuli zikizalawiya, neukionee ng'wenye. 17Miya mwe uwo mshi, nenikuvunile, heugwiwe ni wantu uweogoha. 18Nenikuvunile heukong'we, neniuvunile ugima wako kwa kuti uzanialila imi.” Ni miyo Zumbe Mulungu nilongiewo.
Attualmente Selezionati:
Yelemiya 39: SHBV
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
The Old Testament in Shambala, @The Word for The World International, and Shambala Language translation. All rights reserved.