Yelemiya 42
42
Wantu watamuombeza Yelemia awavikile
1Vikibinda wagholokezi woshe wa waghojo na Yohanani ng'wana wa Kalea na Yezania ng'wana wa Hoshaya hang'we na wantu woshe wakulu na wadodo, 2wakambasha Yelemia na kumghamba kuti, “Taaombeza utegheleze tivyekuombeza, utivikile kwa Zumbe Mulungu, Mulungu wako, ishwi woshe tishighalewo, kwa kuti nee tiiwangi, miya iviaha tishighale wagheke du sa uvyeona. 3Vika, kunga Zumbe Mulungu, Mulungu wako, ationyeshe sia ayekunda tizinkiie na mbuli tizekundighwa tighoshole.” 4Mteghanyi Yelemia akawahisa, “Nizamiiva, nenimvike Zumbe Mulungu, Mulungu wenyu, sa muniombezevyo, mbuli yoyoshe ndiyo Zumbe Mulungu anighambile, nenimighambile, senimifishe kintu chochoshe.” 5Vikibinda wantu wakamghambila Yelemia, “Zumbe Mulungu neaituke muona mkweli kwetu kati hetighoshole via Zumbe Mulungu, Mulungu wako akuaghiizevyo utighambile. 6Vikiituka ni mbuli ntana hambu mbada kwetu, ishwi netimuive Zumbe Mulungu, Mulungu weshu akuaghiizeye iwe kunga mbuli zeshu ziituke ntana tikimuiva Zumbe Mulungu, Mulungu weshu.”
Zumbe Mulungu atahisa mviko wa Yelemia
7Mishi muongo mng'we ihezinka, Zumbe Mulungu akalonga na Yelemia. 8Yelemia akamuitanga Yohanani ng'wana wa Kalea na wagholokezi wa waghojo ndiwo wai hang'we naye na wantu watuhu wosheni wakulu kwa wadodo. 9Akawaghamba, “Zumbe Mulungu, Mulungu wa Izilaeli muniaghiizeye kwakwe niighale mviko wenyu, aghamba ivi, 10‘Waona mwahema mwe inu shi, nenimitogheshe na hemuituke wabovu, nenimieke muonee na hemushamizwe vingi, kwa kuti ntogho nimieteezo zizanigea usoyoyo. 11Mushemuogohe zumbe wa Babeli muyemuogoha, ehe mushemuogohe, kwa kuti imi ni hang'we na inywi nimivunile na kumiusha mwe mikono yakwe. Ni miyo Zumbe Mulungu nilongiewo. 12Kwa kuti imi naamiivila mbazi, yohe nenimghalushe amiivile mbazi na kumiuza na mwe shi yenyu.’ ”
13“Miya mukishemuiva Zumbe Mulungu, Mulungu wenyu na mukighamba, ‘Hetikunda kuikala mwe inu shi, 14miya netikaikale mwe shi ya Misii, hantu hashinaho nkondo hambu vuzo ja magunda ya nkondo na hashinaho saa, 15teghelezai avyelonga Zumbe Mulungu inywi wantu mushighalewo mwe shi ya Yuda.’ Zumbe Mulungu mwena nguvu zoshe, Mulungu wa Izilaeli aghamba ivi, ‘Kati muzakunda kuita kweikala mwe shi ya Misii, 16nkondo muzeogoha nezimibuize ghuko uko kwe shi ya Misii, na saa muyeogoha, neilawiye uko Misii na nemufiie uko. 17Wantu woshe wefanyanya kuita kweikala kwe shi ya Misii, newafe kwa nkondo na kwa saa na kwa matamu, na hekuna mntu yoyoshe ndiye ashighale wala kuhona kwa mbuli ya ntogho ndizo niwaetee.’ ”
18“Kwa kuti imi Zumbe Mulungu mwena nguvu, Mulungu wa Izilaeli, naghamba ivi, ‘Sa via nikweighwevyo ni maya kwa mbuli ya wantu wa Yelusalemu, nee ndivyo munikweze maya mukiita Misii. Nemuituke kintu cha kushweea ute na chegea wogha na cha kukaaiziza na chegea shoni na inu shi hemuiyone vingi.’ ” 19Yelemia akahimba kuwaghambila, “Inywi wantu mushighalewo mwe shi ya Yuda, Zumbe Mulungu azamighambila kuti musheite Misii. Tailai ushe kuti lelo nizamishunda, 20kwa kuti, muzakigea mwe masa muheniaghiiza nikamivikile kwa Zumbe Mulungu, Mulungu wenyu, vikibinda nimighambile kia ndicho anighambile, nainywi nemughoshole. 21Lelo imi nizamighambila, miya hemutegheleze mbuli yoyoshe niaghiizweyo ni Zumbe Mulungu nimighambile. 22Kwa ivyoho ushe tailai kuti, hantu muhekunda kuita kweikala, nemufiie ghuko kwa nkondo na kwa saa na kwa matamu.”
Attualmente Selezionati:
Yelemiya 42: SHBV
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
The Old Testament in Shambala, @The Word for The World International, and Shambala Language translation. All rights reserved.