Ebikhole 25
25
Paulo yahaabila Kaisari
1Kho olwa Fesito yali namalile okhwitsa muburuchi obwo, olunyuma lwetsindaalo tsitaru yarula eKaisaria natikulukha natsia eYerusalemu. 2Mana abakhulundu babakuhani nende abandu abakhongo abomubaYahudi bamuboolela amakhuwa khuPaulo; nibamusaaya, 3nibasaba khukeke, mbu arume abandu okhumuleera eYerusalemu; mbu bamukoneshele khunjila okhumwira. 4Habula Fesito yakalusia, naboola mbu Paulo alindungwe eKaisaria, khandi mbu ye omwene yali nali ahambi okhutsiayo. 5Nasunga mbu Kho abali nobunyali mwinywe bakholomoshe ninasi, ne niliba nililiho likhuwa liosi libii khunundu oyo, bamwinjilile itookho.
6Mana olwa yali nahonjile mubo tsindaalo etsirashila munaane kata ekhumi ta, yakholomokha natsia eKaisaria; mana mukamba niyeekhala khushifumbi shiobuyaasii, nalaka mbu Paulo aleerwe. 7Ne olwa yali niyeetsile, abaYahudi abali nibakholomooshe okhurula eYerusalemu basinjila ahambi ninaye, nibamuchonjela amakhuwa amanji amatinyu muno, aka baranyala okhulolosia mbu nakatoto ta. 8Naye Paulo niyeeteetsa, nasunga mbu Shindayoonoonile ta, kata khumalako kabaYahudi, kata khuhekahl, kata khuKaisari tawe. 9Ne Fesito, okhuba yeenya okhuchamwa nende abaYahudi, yakalusia Paulo, nasunga mbu Ofuchiilila okhutsia eYerusalemu mbu oyaasilibweyo khumakhuwa kano imbeli wanje? 10Naye Paulo nasunga ari Isie esinjiile imbeli weshifumbi shiobuyaasii shiaKaisari, evea ekhoyile okhuyaasilibwa; khubaYahudi shindabakholeelekhwo libii liosi ta, shinga nawe olwa omanyile bulayi. 11Kho nimba nindi omukholi wetsimbii, nindakhola likhuwa liosi elichila ningwanile okhwirwa, shindoba okhufwa ta; ne kano kosi aka bano banzinjiliile ninako nikaba nikarali akatoto ta, abulaho ounyala okhumbaana mumakhono kabwe. Emuhaabila Kaisari. 12Mana Fesito, olwa yali nasungaane nende abeshiina, yakalusia ari Omuhabiliile Kaisari; olatsia ewaKaislri.
Paulo yaleerwa imbeli waAguripa naBerenike
13Haho olwa tsindaalo tsindi tsiali nitsibirile, Aguripa omuruchi nende Berenike niboola eKaisaria, nibamushiesia Fesito. 14Ne olwa bali nibeekhaaleyo tsindaalo tsinyinji, Fesito yamanyia omuruchi amakhuwa kaPaulo, nasunga mbu Aliho omusaatsa undi owa Feliki yalekha hano mumbohe; 15ne olwa ndali eYerusalemu abakhulundu babakuhani nende abakofu babaYahudi bamboolela khumakhuwake, nibasaba mbu emukhalachile eshiina. 16Nasi ningalusia nimbaboolela mbu shishili eshiima shiabaRoma okhuhaana omundu yesi owinjiliilwe okhukuumwa, narashialola abamwinjiliile mumoni nomumoni, naba nobwiyangu okhwiteetsa mwikhuwa elia bamwinjiliile ninalio, tawe. 17Kho olwa bali nibakhung'aaniile hano shindashindakhwo ta; ne mukamba ndeekhala khushifumbi shiobuyaasii, nindaka mbu omundu oyo aleerwe. 18Ne abamwinjilila olwa basinjila shibaleera likhuwa liosi khuye elia ndakhapaara mbu nelibii, tawe; 19nebutswa bali nende amakhuwa kandi khuye, akali akeidini yabwe, nende akoundi mbu Yesu, owafwa, habula Paulo aboolanga mbu nomulamu. 20Nasi olwa ndakhayilwe okhumanya shinga olwa ndakhanoonelesia khumakhuwa ako, ndareeba naba niyakhatsia eYerusalemu mbu ayaasilibweyo khumakhuwa kano. 21Ne olwa Paulo yahaabila mbu abiikhwe okhukhalachilwa eshiina nende Kaisari, ndalaka mbu alindungwe okhuula olwa ndakhamuruma ewaKaisari. 22Mana Aguripa nasunjila Fesito ari Nasi siesi ndakheekomba okhuhulila omundu oyo. Naboola mbu Mukamba olamuhulila.
23Kho mukamba olwa Aguripa yali niyeetsile nende Berenike, nolukungu olukhongo, nibeenjiile aha bahuliililanga amakhuwa, halala nende abaseesia abakhulundu nabasaatsa abakhongo abomwitookho, Fesito yalaka likhuwa, mana Paulo naleerwa. 24Fesito nasunga mbu Omwami Aguripa, nende inywe mwesi aba khuli ninabo hano, mulola omundu uno, owa abomukanda kwosi kwabaYahudi, kata abeYerusalemu kata abahano, basaayile khululwe, nibayochela nibaboola mbu shiakhoyile okhuba mwoyo ta. 25Nasi ndanyoola mbu shiyakhola likhuwa liosi elikwanile okhufwa tawe; ne olwa omwene yahaabila Kaisari, ndapaara okhumuruma. 26Ne shindi nende amakhuwa kahabwene aka ehandiichila omwami wanje tawe; niko akachilile nimuleera hano imbeli weenywe, nokhushila muno imbeliwo, Omwami Aguripa, mbu olwa kalaba nikanoonelesiibwe embe nende aka ehandiika. 27Okhuba kandoleshela isie mbu shikakhoyeele okhuruma omubohe, ne noramanyia amakhuwa keene aka yeenjililwa ninako ta.
Attualmente Selezionati:
Ebikhole 25: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975