Ebikhole 3
3
Owelikara yahonilibwa hamuliango weihekalu
1Nabo Petero nende Yohana bali nibatikulukha okhwinjila muhekalu khusaa yokhusaaya, isaa yashienda. 2Ne omundu undi owali owelikara okhurula munda yanyina yachingungwa; ne bali nibamwalisinjia buli nyanga hamuliango kweihekalu okulangwa mbu Omukaasu, mbu abasabe ebihaanwa abeenjilanga muhekalu; 3omwenoyo yalola Petero naYohana nibali okhwinjila muhekalu, nasaba mbu aheebwe eshihaanwa shietsimbabasi. 4Mana Petero niyoomisia tsimoni okhumuhenga, halala nende Yohana, nasunga ari Okhuhenje. 5Naye narechelesia, nasuubila mbu yeetsa okhuheebwa ninabo eshindu. 6Nebutswa Petero namusunjila mbu Ifeetsa kata itsahaabu shindi ninabio ta; ne eshia endi ninashio nishio eshia ekhuha. Muliira liaYesu Kristo weNazareti, buukha ochende. 7Namutiila omukhono musaatsa, namubuusia; habwene nahabwene ebilenjebie nende tsikhong'ositsie nibinyoola tsingufu. 8Naye nasiila, nasinjila; nachaaka okhuchenda; niyeenjila ninabo halala muhekalu, nachenda, nasiilasiila, namwitsoomia Nyasaye. 9Abandu bosi nibamulola nachendanga namwitsoomia Nyasaye; 10nibamumanya, mbu niye owikhalanga niyeenya ebihaanwa haShilibwa Eshikaasu shieihekalu; nibahuka nibang'ang'aala khukeenako akali nikamwikholeele.
Aka Petero yeelwatsa mushitsafu shiaSulemani
11Ne olwa yali nashibatiila Petero nende Yohana, abandu bosi nibeetsa tsimbilo ewa bali, nibeekhung'aasiaho mushitsafu eshilangwa mbu eshiaSulemani, nibahuumana muno. 12Mana olwa Petero yalola ario, yakalusia nasunjila abandu ari Inywe abaIsiraeli abashianje, muchenyanga khukomundu uno mbushiina? Kata olwashiina nimukhuumisiliakhwo tsimoni shinga abakaala mbu nifwe abachila nachenda, khulwa obunyali bweefwe kata obulayi bweefwe abeene? 13Nyasaye waAburahamu, khandi owaIsaka khandi owaYakobo, niye Nyasaye wabakuuka beefwe, amwemeeshe Omukhalabaniwe Yesu muluyali; omwenoyo owa mwakhoba, nimumwiyambakhana imbeli waPilato, olwa yali nareelekhwo omwoyo okhumulekhuula. 14Nebutswa inywe mwamwiyambakhana oyo Omutakatifu Omulunjishi, nimusaba mbu muheebwe omwiri, 15nimumwira oyo Omusimishi wObulamu; owa Nyasaye yamalile alamusie mukhufwa; nineefwe khuli abaloli khubwo. 16Ne khulwa obusuubili muliiralie, eliiralie limukufuhasiye omundu uno, owa mulola, nimumanya; toto, obusuubili obuli muYesu nibwo obumuheelesiye obulamu obulamba imbeli weenywe mwesi.
17Ne bulaano, baana beefwe, emanyile mbu mwakhola khulwa okhukorwa; khandi abaruchi beenywe nabo bario. 18Ne amakhuwa aka Nyasaye yalolosia khale muminwa chiabanabii bosi mbu Kristowe akhoyile okhusaalila, akoosiye ario. 19Kho mwikalukhasie, nimushiukhana, mbu ebionoono bieenywe bisiliisibwe, mbu mana tsinduukho tsiobusakulushi tsiitse khulwa okhubaho khwOmwami; 20khandi mbu amurume Kristo oyo owareebwaho khulweenywe, niye Yesu; 21owa kakhoyela likulu okhumwinjisia okhuula khutsinduukho tsiokhuusilia elala amakhuwa kosi, etsia Nyasaye yaboolakhwo muminwa chiabanabiibe abatakatifu abalinjiho okhurula khukhuchaaka khweshialo. 22Nitoto, mbu Musa yaboola ari Omwami Nyasaye alamubuusilia omunabii okhurula mubaana beenywe, owingana isie; omwenoyo, mulamurechelesia mumakhuwa kosi kosi aka alamusunjilanga. 23Ne buli mundu ourarechelesia omunabii oyo ta, alahesilibwa elala arusibwe mubandu. 24Toto, kata abanabii bosi okhurula khuSamweli nende abo abamulondakhwo, bosi ababoolakhwo, abo bosi batoonyanga aketsindaalo tsino.
25Ninywe abaana babanabii nende abeindakano eya Nyasaye yalakana nende abakuuka beenywe, namusunjila Aburahamu ari Khandi mulwibulolwo nimwo omwa abebilibwa biosi bieshialo bilanyoolelamwo ikhabi. 26Olwa Nyasaye yali namalile okhubuusia Omukhalabaniwe, yaranjilila okhumuruma khwinywe okhumuheelesia ikhabi namushiukhasia buli mundu okhurula khubumayaanubwe.
Attualmente Selezionati:
Ebikhole 3: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975