Luka 3
3
Yohana Omubatisii
(Mat. 3.1-12; Mk. 1.1-8; Yoh. 1.19-28)
1Haho mumuyika kwekhumi nakharaano okwomuburuchi bwaKaisari Tiberio, Pondio Pilato nali Kafuna weBuyahudi, naye Herode nali omuruchi weGalilaya, Filipo omusiani wabwe nali omuruchi womumbali tsieIturea nende Turakoniti, khandi Lisania nali omuruchi weAbilene, 2mundaalo tsiobukuhani-obukhulundu bwaAnasi nende Kayafa, likhuwa liaNyasaye lia mwitsila Yohana waZakaria nali mushitsiimi. 3Naye niyoola mumbali tsiosi etsirondokhana nende Yorodani, niyeelwatsanga akobubatisibwi bwokhwikalukhasia khulwa obuleshelwi bwebionoono; 4shinga olwa kahandiikwa mushitabu shiamaKhuwa kaIsaya omunabii, mbu
Omwoyo kwoyo oulanjisia mushitsiimi,
mbu Mukasie injila yOmwami,
mukololosie emihandachie.
5Buli libanda lilabukwa,
khandi buli lukulu nende eshikulu bileesibwa hasi;
ahashiamu halakololokha,
ne tsinjila tsiamachinjini tsilareleesibwa;
6ne bosi balalola obuhonia bwaNyasaye.
7Kho yasunjila abemikanda abarulanga nibatsia okhubatisibwa ninaye, ari Inywe olwibulo Iwetsinzokha, niwina owamuchesiyia okhwilukha oburima obuli okhwitsa? 8Kho yame ebiamo ebiwinjana nende obwikalukhasii; nimurachaaka okhusunga mumioyo chieenywe muri Khuli nende kuuka weefwe, Aburahamu, tawe; shichila emusunjila mbu mumachina kano Nyasaye anyala okhubuusiliamwo Aburahamu abaana. 9Ne kata bulaano ihaywa yimalile okhureebwa khubisina biemisaala; kho buli musaala okuraamanga ebiamo ebilayi ta kuremwa, nikusukunwa mumulilo.
10Abemikanda bali nibamureebanga bari Kho khukhole shiina? 11Nakalusia nabasunjila ari Ouli nende tsingubo etsiomukari tsibili, akabane nende oubula ninayo; noyo ouli nebiokhulia, yesi akhole ario. 12Khandi abasololi bobushuru nibeetsa okhubatisibwa, nibamureeba bari Omwechesia, khukhole shiina? 13Nabasunjila ari Murasololanga okhushilaasia ebia mwalakwa ta. 14Abasikari nabo nibamureeba, bari Nineefwe, khukhole shiina? Nabasunjila ari Muramukholela omundu yesi akamahababa, kata okhubeenjilila itookho khwikhuwa liobubatsa ta; ne murabuutsuluulila omushaara kweenywe tawe.
15Ne olwa abandu bali nibalindiililanga akeetsa okhwikhola, bosi nibakanakania mumioyo chiabwe khuYohana, naba niyakhaba ye Kristo watsana, 16Yohana yakalusia, nababoolela bosi ari Isie toto emubatisinjia nende amatsi; ne oushila isie amaani yeetsanga; shingwanile okhuboholola olukhoba Iwebilaarobie ta; omwenoyo alamubatisia nende Roho Omutakatifu nende omulilo; 17ali nolutelu mumukhono, okhulabilia elala olwanyilwe, nokhukhung'aasia ingano mushiachishienebutswa omukhuutsi alakusamba mumulilo okuranyala okhusimibwa ta.
18Kho mana yabeelwatsila abandu Amakhuwa Amalayi nende obuchesiyi bundi obunji; 19ne Herode omuruchi, olwa yali nahalabiilwe ninaye khulwa Herodia, omukhasi womusiani wabwe, khandi khulwa amabii ako kosi aka Herode yali nakholile, 20yatasakhwo lino elishila akandi kosi, mbu yamwikalila Yohana mumbohe.
Okhubatisibwa khwaYesu
(Mat. 3.13-17; Mk. 1.9-11)
21Kho olwa abandu bosi bali nibabatisiibwe, Yesu yesi nabatisiibwe, nalaamanga, likulu lieekukha, 22naye Roho Omutakatifu niyeekha namuyeelakhwo mukhufwana khwomubili kwelihuusi, omwoyo nikurula mwikulu, nikuboola kuri Niwe Omwana wanje omuheelwa. Mwiwe nimwo omwa enjamisilibungwa muno.
Aketsinzibulo tsiabakukanyene Yesu
(Mat. 1.1-17)
23Ne Yesu omwene, olwa yachaaka okhwechesia, yali owemiyika shinga amakhumi kataru, abandu nibakaalanga mbu nomwana waYusufu, waHeli, 24waMatsati, waLawi, waMeliki, waYanai, waYusufu, 25waMatatsia, waAmosi, waNahumu, waEsili, waNagai, 26waMaatsi, waMatatsia, waSemeini, waYoseki, waYuda, 27waYoana, waResa, waZerubabeli, waShealitieli, waNeri, 28waMeliki, waAdi, waKosamu, waElemadamu, waEri, 29waYoshua, waEliezeri, waYorimu, waMatsati, waLawi, 30waSimeoni, waYuda, waYusufu, waYonamu, waEliakimu, 31waMelea, waMena, waMatatsa, waNatsani, waDaudi, 32waYese, waObedi, waBoazi, waSalumoni, waNashoni, 33waAminadabu, waAdimini, waArini, waHeseroni, waFaresi, waYuda, 34waYakobo, waIsaka, waAburahamu, waTera, waNahori, 35waSerugi, waReu, waPelegi, waEberi waShela, 36waKenani, waArapakhashadi, waShemu, waNoa, waLamekhu, 37waMetsusela, waEnoka; waYaredi, waMahalaleli, waKenani, 38waEnoshi, waSethi, waAdamu, waNyasaye.
Attualmente Selezionati:
Luka 3: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975