Luka 8
8
Abakhasi bandi balondana nende Yesu
1Olunyumakhwo khandi yachenda mumatookho nende amataala, niyeelwatsa naleera Amakhuwa Amalayi kobwami bwaNyasaye, abo Ekhumi-nababili nibali ninaye, 2nende abakhasi bandi, abali nibahonibwa abaroho ababii nende obulwale, banga Mariamu oulangwa mbu Magadalene, owa amadimoni musaafu kali nikarulile muye, 3nende Yoana, mukha Khuza, omunyapara waHerode, naSusana, nende abandi abanji abali nibabakhoonyanga nende ebia bali ninabio.
Oluchelo Iwomumiitsi
(Mat. 13.1-9; Mk. 4.1-9)
4Mana olwa omukanda omukhongo kwali nikukhung'aaniile halala, abomumataala kosi nibatsia ewa yali, naye naboolela muluchelo, ari 5Omumiitsi yarula natsia okhumiitsa imwoye; ne olwa yali namiitsanga, eyindi yakwa khunjila, niyiseenwa nebilenje biabandu, amanyonyi akokhwikulu nikeetsa nikachibootsa. 6Eyindi niyikwa khulwanda, ne niyakhamela, yaniala, shichila yabula obunyifu. 7Eyindi niyikwa hakari mubisisia, ebisisia nabio nibikhulila halala ninayo, nibichitiya. 8Eyindi niyikwa mwiloba lilayi, niyikhula niyama ebiamo okhuula khushikhumi. Ne olwa yali nasunganga amakhuwa ako, yalanjisia ari Ouli namarwi akokhuhulila, ahulile.
Aka tsinjelo tsichoomakhwo
(Mat. 13.10-17; Mk. 4.10-12)
9Abeechibe nibamureeba bari Oluchelo olwo luli lurie? 10Naboola ari Inywe mwaheebwa okhumanya amabiso akObwami bwaNyasaye, ne khubandi munjelo; mbu bahenje nibaralola ta; bahulile, nibaramanya eshisina ta.
Yesu yeenoosia oluchelo Iwomumiitsi
(Mat. 13.18-23; Mk. 4.13-20)
11Ne oluchelo olwo ndwoluno; mbu Imwo neLikhuwa liaNyasaye. 12Nabo abali khunjila nibo ababeetsanga nibahuliile, mana Setani niyeetsa, nayiniamwo likhuwa okhurula mumioyo chiabwe, mbu baleshe okhusuubila nibahonibwa. 13Nabo abali khulwanda mbabano, mbu olwa bahulila habwenaho bafuchiilila likhuwa nobusangaali; ne bano babulanga emisi, abasuubilanga eshise eshituutu butswa, ne mundaalo tsiokhuteemwa bahunzukha inyuma. 14Eyeneyo eyakwa mubisisia, bano nibo abahuliile, ne olwa batsia khunjila yabwe, batiywa nebiamaramba nobuyinda nomwenya ebiomubulamu buno, mana ebiamo biabwe nibireenga ta. 15Eyomwiloba lilayi, bano nibo abali nemioyo emilayi echiatoto, ne nibahuliile likhuwa, balitiila butinyu, nibaama ebiamo nende obwisimilisii.
Itaha eyifuunikhwa neshimzuelo
(Mk. 4.21-25)
16Ne abulaho omundu ouhambia itaha mana wachifuunikhakhwo inyungu, kata okhuchira mulwalo weshitali; nebutswa achira khushichibi mbu mana abeenjila balole obulafu bwayo. 17Shichila libulaho elibiswa elirabisukha ta, kata elifuunikhwa elirafuunukha lialolekha mubulafu tawe. 18Kho mwiyile kahala mukhuhulila khweenywe, shichila omundu yesi oulikhwo nebindu, alaheebwa ebindi; nomundu yesi oubula ninabio, kata ebia akaala mbu ali ninabio bilabukulwa.
Nyina Yesu, nende abaana bebwe
(Mat. 12.46-50; Mk. 3.31-35)
19Nyina nende abaana babwe nibamwitsila nibakhaywa okhuula ewa yali khulwa obunji bwabandu. 20Ne yaboolelwa, ari Mawo nende abaana beenywe basinjiile elwanyi; beekomba okhukhulola. 21Ne yakalusia, nabasunjila mbu Mama nende abaana beefwe nibo abeenabo abahulilanga likhuwa liaNyasaye, nibalikhola.
Yesu yalenjeelesia imbumbuyeka
(Mat. 8.23-27; Mk. 4.35-41)
22Khunyanga yindi eyomundaalo etsio, yeenjila muliaro, ye nende abeechibe; nabasunjila ari Chende khwambushe khutsie injelekha weinyanza; nibachaaka oluchendo. 23Ne olwa bali nibali muliaro nibatsiitsanga, tsindoolo nitsimuyila; ne imbumbuyeka yeekha khunyanza, amatsi nikeenya okhwitsulamwo, nibaba mumatinyu. 24Nibeetsa ewa yali, nibamubuusia, nibasunga bari Omwami, Omwami, khuli okhusikha. Naye nasisimukha, nahalabila omuyeka nende okhurunda khwamatsi, nabio nibiakama, omuleenjeelo nikubaho. 25Nabareeba ari Obusuubili bweenywe buli heena? Nibaria, nibahuka, nibasungana bari Omwene uno niwina? Alakanga kata emiyeka nende amatsi, nabio nibimuhulila.
OmuGerasi owali namadimoniyahonibwa
(Mat. 8.28-34; Mk. 5.1-20)
26Niboola mushialo shiabaGerasi, eshihengaane nende Galilaya. 27Ne olwa yali niyakhoola khushialo eshiumu, yabukaana nende omundu undi owali niyarula mwitaala, owali namadimoni; ne mundaalo tsinyinji shiyali niyeefwalanga ingubo yosi ta, kata okhumenya munzu yosi, habula mubilindwa. 28Olwa yalola Yesu yayiiba, nakwa mumakuluke, nasunga nende omwoyo omukhongo, ari Obeele orie ninasi Yesu, iwe Omwana waNyasaye Ouli Ikulu Muno? Ekhusaaya mbu orasaalisia ta.
29Okhuba yali nalachile roho weshifwabwi okhurula mumundu oyo. Shichila yali namuhambanga khandi akhanji; ne yalindungwa nabalindi, nabohwa neminyololo nende ebitiili; ne yali nakhalakanga ebia yabohungwa ninabio ebio, niyeelusibwa okhutsia mushitsiimi khulwa amaani kelidimoni elo. 30Mana Yesu namureeba ari Eliiralio niwe wina? Naye nasunga mbu Nisie Legioni; shichila amadimoni amanji kali nikeenjiile muye. 31Nikamusaaya oburakalaka keenyoshe katsie mubuko ta.
32Ne khulukongo olwo lialiho lituuli lietsimbiitsi tsinyinji nitsiayanga; nikamusaaya mbu akafuchiilile keenjile mutsio. Naye nakafuchiilila ario. 33Amadimoni nikarula mumundu oyo, nikeenjila mumbiitsi; lituuli niliminina nilikholomokha niliikhupa munyanza, nitsifwilamwo.
34Nabaayi batsio olwa balola akali nikeekholile, beelukha nibatswania amakhuwa ako mwitaala liosi khandi mulukongo olwo lwosi. 35Abandu nibarula nibatsia okhulola akali nikeekholile; niboola ewa Yesu yali, nibanyoola oyo owa amadimoni kali nikarulilemwo niyeekhaale, niyeefwalile tsingubo nali habwene, nali hamakulu kaYesu; nibaria. 36Abaloli nibababoolela shinga owamadimoni olwa yali nahoniibwe. 37Abomushialo shiosi shiabaGerasi eshiebweneyo bamuboolela mbu arule mubo; shichila indenga ikhongo yali niyibatiilile; naye niyeenjila muliaro, niyeenyokha. 38Ne omundu oyo owa amadimoni kali nikarulilemwo yamusaaya mbu abeetsenje ninaye; naye namuseebula, nasunga ari 39Kalukha ebunanzuwo, otoonye amakhuwa aka Nyasaye yakhukholeele shinga olwa kali amakhongo. Naye niyeenyokha natsia niyeelwatsa mwitaala liosi amakhuwa aka Yesu yali namukholeele shinga olwa kali amakhongo.
Akomwana waYairo, nakomukhasi owatiilakhwo khungubo yaYesu
(Mat. 9.18-36; Mk. 5.21-43)
40Ne olwa Yesu yali nachelelanga abomukanda bamwinjisia nobusangaafu, shichila bali nibamulindiililanga. 41Ne lola, omundu oulangwa mbu Yairo niyeetsa, naye yali mulala khubakhuIundu beisinagogi; niyeekhupa hasi mumakulu kaYesu, namusaaya mbu yeetse ebunanzuwe; 42shichila yali nomwanawe omukhaana mulala yenyene, owali nali owemiyika shinga ekhumi nachibili, ne yali nakonile nali okhufwa. Ne olwa yali natsiitsanga abemikanda nibamutiya.
43Nomukhasi undi owali niyeerulutsanga emiyika ekhumi nachibili, niyamalila biosi ebia yakheekhoonyeelenje mubasilishi, naranyala okhuhonibwa nomundu yesi khubo ta, 44yeetsela emukongowe natiilakhwo khundulo weinguboye; habwene nahabwene okhwirulutsakhwe khwakhalikha. 45Yesu nareeba mbu Oundiililekhwo niwina? Ne olwa bosi beeyambakhana, Petero yaboola, nende aba yali ninabo, bari Omwami, emikanda chikhutiyanga nichikhumiina. 46Ne Yesu nasunga mbu Toto mwene omundu yandiililekhwo; shichila ndimanyile mbu obunyali bu'rulilemwo. 47Ne olwa omukhasi yalola mbu shianyala okhubisikha ta, yeetsa natechelanga, nakwa mumakuluke, naboola imbeli wabandu bosi amakhuwa akali nikachilile namutiilakhwo, khandi shinga olwa yali nahoniibwe habwene nahabwene. 48Naye namusunjila mbu Omukhaana wanje, obusuubilibwo bukhuhoniye; otsie nomulembe.
49Olwa yali nashisunganga oundi wewomukhulundu oyo weisinagogi niyeetsa, nasunga mbu Omwanawo umalile okhufwa; oramunyasia Omwechesia ta. 50Ne Yesu olwa yahulila yamukalusia ari Oraria ta. Suubila busuubila, naye alahonibwa. 51Ne olwa yoola enanzu, shiyamoka omundu yesi okhwinjila halala ninaye ta, habula Petero naYohana naYakobo, nende samwana omukhaana nende nyina. 52Bosi bali nibamwikhuulanga, nibakhupa tsimbungu; naye nasunga mbu Mureekhuula ta; shichila shiafwile tawe; akonanga butswa tsindoolo. 53Nabo nibamutseshelela butswa, okhuba bamanya mbu amalile okhufwa. 54Naye namutiila omukhono, naIanga ari Omukhaana, buukha. 55Omwoyokwe nikukalukha, nabuukha nonoho; nababiila mbu bamuheelesie eshiokhulia. 56Abeebulibe nibang'ang'aala; nabalaka butinyu oburaboolela omundu yesi akali nikakholilwe ta.
Attualmente Selezionati:
Luka 8: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975