Matsayo 15
15
Ameechesio kabakofu
(Mk. 7.1-13)
1Mana abaFarisayo nabahandiichi barula eYerusalemu nibeetsa ewa Yesu yali, nibareeba bari 2Nishiina eshichilanga abeechibo nibakhaya ameechesio kabakofu? Shichila shibasaabanga amakhono nibali okhulia ebiliibwa ta. 3Nakalusia, nababoolela mbu Mbushiina neenyu nimukhayanga lilako liaNyasaye khulwako aka mwechesibwa. 4Okhuba Nyasaye yaboola ari Heelesinjia so nende mawo oluyali; khandi ari Oufwola samwana kata nyina, okhuula afwe. 5Neenyu muboolanga muri Omundu yesi ousunjila samwana kata nyina ari Eshieneshio eshia ndakhakhukhoonyile ninashio shiahuliilwe Nyasaye; 6kho aleshe okhumuheelesia samwana oluyali. Ne khulwako aka mwechesibwa, mwirile likhuwa iiaNyasaye. 7Inywe abobukaati, Isaya yalakula habwene khwinywe, ari
8Abandu bano bambeelesinjia oluyali neminwa,
ne emioyo chiabwe chili ehale ninasi.
9Banyinamilanga butswa, nibeechesinjia ameechesio kabwe akali butswa amalako kabandu.
Akoonooninjia omundo
(Mk. 7.14-23)
10Nalanga omukanda ewa yali, nabasunjila ari Hulile, mumanye neshisina shiene. 11Shishili eshio eshiinjilanga mumunwa eshimwonoonoonia omundu ta; habula akarulanga mumunwa niko akamwonoonia.
12Mana abeechi beene nibeetsa, nibamureeba bari Omanyile mbu abaFarisayo bahuchile olwa bahuliile lisungo elo? 13Naye nakalusia, naboola mbu Buli shiraache eshia Papa owomwikulu araraaka ta, shiakhasiulwe. 14Lekha babe; nabeemilisi ababofu. Ne omubofu naba niyeemilila omubofu washie, balakwa bombi mubuko.
15Petero nakalusia, namusunjila mbu Okhuboolele akoluchelo olwo. 16Nasunga ari Khane kata inywe mushileemile obumanyilisii? 17Shimumanyile mbu eshindu shiosi eshiinjila mumunwa shibira shitsia munda, nishirusibwa shitsia elwanyi? 18Ne akeensko akarulanga mumunwa kabeetsanga nikarulile mumwoyo; nako niko akamwonooninjia omundu. 19Shichila okhurula mumwoyo nimwo omwa murulanga amayililisio amabii, nobwiri, nobuheyi, nobusooti, nobwifi, nobuloli bwobubeeyi, nobuchiishi; 20amakhuwa ako niko akamwonooninjia omumdu; nebutswa okhulia namakhono akarasaabilwe ta, okhwo shikhwonoonia omundu ta.
Obusuubili bwomukhasi omuKanaanayo
(Mk. 7.24-30)
21Yesu narula ebweneyo niyeenyokha natsia mumbali tsieTiro nende Sidoni. 22Ne lola, omukhasi omuKananayo yarula mumbali etsio niyeetsa ewa yali, nalanga ari Umbeele tsimbabasi, E Omwami, omwana waDaudi; omwana wanje omukhaana anyasibungwa muno nende lidimoni. 23Nebutswa shiyamukalusia likhuwa ta. Abeechibe nibeetsa nibamusaaya, bari 'Museebule; okhuba alanjilisinjia munyuma weefwe. 24Naye nakalusia, nasunga mbu Shindarumilwa abandi tawe, habula khumakondi akakora akomunzu yaIsiraeli. 25Nebutswa omukhasi oyo niyeetsa namwinamila, naboola ari Omwami, ukhoonye. 26Naye nakalusia, ari Shineshilayi okhubukula omukaate kwabaana nokhusukunila tsimbwa u. 27Naye nasunga ari Mbula, Omwami, kata tsimbwa tsiliitsanga khumbungulusi etsibungulukhanga nitsirula khumeesa yabeenetsio. 28Mana Yesu nakalusia, namusunjila mbu Mama, obusuubilibwo nobukhongo; kakhukholelwe shinga olwa wenya. Omukhaanawe nahona okhurula khushise eshio.
Yesu yahonia abanji
29Yesu narula ebweneyo niyoola ahambi khuNyanza yaGalilaya; natikulukha mushikulu, niyeekhalayo. 30Mana emikanda emikhongo nichiitsa ewa yali, nibali nende abetsindieku, nababofu, nabasilu, nabalema, nende abandi abanji, nibabakonia imbeliwe, naye nabahonia; 31okhuula olwa abomukanda bachenya, olwa balola abasilu nibaboolanga, abalema nibeekaluule abalamba, abetsindieku nibachenda, nababofu nibalola; nibamwitsoomia Nyasaye waIsiraeli.
Yesu yaliisia abandu ebikhumila bine
(Mk. 8.1-10)
32Yesu nalanga abeechibe, naboola mbu Endiililwa omukanda kuno eshisa, shichila leela lukhola khataru nibabeetsanga ninasi nibarali nende eshia balia ta; shinzenya okhubaseebula nibali inzala tawe; haundi bakhahumbutsanila khunjila. 33Abeechi nibamukalusia bari Mushitsiimi muno khwakhanyoola heena emikaate eminji echihela okhubeekusia abomukanda omukhongo kuri? 34Yesu nabareeba mbu Muli nemikaate chinga? Nibakalusia mbu Nimusaafu, khandi norunyeeni oruleemu. 35Nababiila abomukanda mbu beekhale hasi; 36nabukula emikaate echio musaafu nende tsinyeeni etsio, nakhupa orio nabisonyola nabakabila abeechi; abeechi nabo nibakabila abemikanda. 37Nibalia bosi, nibeekura; nibatoola ebisonye ebiatong'a, ebimwelo musaafu. 38Abalia bali abasaatsa ebikhumila bine, oburabala abakhasi kata abaana tawe. 39Naye naseebula abemikanda, niyeenjila muliaro, niyoola mumbali tsiaMagadani.
Attualmente Selezionati:
Matsayo 15: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975