Matsayo 17
17
Okhukalulwa khwelikondo liaYesu
(Mk. 9.2-13; Lk. 9.28-36)
1Olunyuma lwetsindaalo tsisasaba Yesu yabukula Petero nende Yakobo nende Yohana omusiani wabwe natsia ninabo mushikulu eshirambi bonyene; 2nakalulwa likondolie imbeli wabwe; obwenibwe nibwakha shinga eliuba, ebiifwalobie nibikwa ebilafu, shinga omubasu. 3Ne lola, Musa nende Eliya nibabaloleshela, nibasungananga ninaye. 4Mana Petero nakalusia, namusunjila Yesu ari Omwami, neshilayi ifwe okhuba hano; noba nochama, enyumbashe hano amatili kataru, elala elilio, elindi liaMusa, nelindi liaEliya. 5Ne olwa yali nashiboolanga, lola, lileesi ling'inang'inu liabafwimba; ne lola, omwoyo okwarula mwileesi nikuboola, kuri Uno niye Omwana wanje omuheelwa; muye nimwo omwa enjamisilibungwa muno; mumuhulilenje. 6Ne olwa abeechi bakuhulila, beekhupa hasi mafumama, indenga niyibahamba. 7Yesu niyeetsa nabatiilakhwo, naboola ari Buushe; muraria tawe. 8Nibachinguula tsimoni, nibaralola omundu ta, habula Yesu yenyene.
9Ne olwa bali nibashiikhanga okhurula mushikulu Yesu yabeetiinya, ari Muraboolela omundu yesi akelibisulo lino ta, okhuula olwa Omwana wOmundu alaba nalamuushe okhurula mubafu. 10Abeechibe nibamureeba bari Nishiina eshichila abahandiichi nibaboolanga mbu Eliya akhoyile okhwitsa mbeli? 11Nakalusia nabasunjila mbu Toto mwene Eliya yeetsa, ne aleeluula ebindu biosi obuyia; 12nasi emusunjila mbu Eliya yamala okhwitsa, nibaramumanya ta, ne bamukholela kosi aka bali nibeenya. Khandi nolwa Omwana wOmundu yesi aleefwila akabwe. 13Kho abeechi nibatiila khushisina mbu abasunjilanga akaYohana Omubatisii.
Yesu yahonia omwana owali owelidimoni
(Mk. 9.14-29; Lk. 9.37-43)
14Nolwa boola ewa omukanda kwali, omusaatsa undi namwitsila, namusikamila, nasunga mbu 15Omwami, obeele omwana wanje tsimbabasi, okhuba noweindulume, ne asaalilanga okhushila; shichila khandi akhanji akwitsanga mumulilo, khandi akhanji mumatsi; 16ne emuleerile khubeechibo; ne bakhayilwe okhumuhonia. 17Yesu nakalusia, nasunga ari Inywe abolwibulo olurambaatsanu, olurasuubila ta, ndalabeetsanga nineenywe okhuula liina? Ndalamwisimilisilia okhuula lina? Mumundeerele hano. 18Yesu namukondeshela, mana lidimoni nilimurulamwo; omwana nahona okhurula khushise eshio.
19Mana abeechi nibeetsa ewa Yesu yali bonyene, nibareeba bari Nishiina eshichilile ifwe nikhuranyalile okhulirusia ta? 20Naye nabasunjila ari Khulwa obuleemu bwobusuubili bweenywe; shichila emuboolela toto, mbu nimuba nimuli nende obusuubili shinga imoni ndala yolufwa Iwelisaatsi, mulasunjila eshikulu shino mbu Rula hano otsie halia; nashio shilarulaho; ne shililabaho likhuwa liosi elira munyalishila ta. [21Ne imbia yino shiyirulanga ta, habula khulwa okhusaaya nokhuhonga inzala.]
Yesu yaboola khandi akokhufwakhwe
(Mk. 9.30-32; Lk. 9.43-45)
22Ne olwa bali nibamenyile eGalilaya Yesu yabasunjila mbu Omwana wOmundu alahaanwa mumakhono kabandu; 23ne balamwira, ne khunyanga yakhataru alalamusibwa. Nabo nibaba neshibeela muno.
Akokhurunga obushuru bweihekalu
24Nolwa bali niboolile eKaperinaumu, abasololi beinusushekeli ' nibatsia ewa Petero yali, nibareeba bari Omwechesia weenywe arunganga inusushekeli noho? 25Nakalusia mbu Ee, arunganga. Ne olwa yeenjila munzu, Yesu yaranjilila okhumureeba, ari Simoni, oluutsi orie? Abaruchi abomushialo, nabandu shiina aba baroosinjia nibabarunjia obushuru? Mbu abaana babwe, nohomba abarende? 26Ne olwa yakalusia mbu Mbula, abarende; Yesu namuboolela mbu Khulwako abaana abeebule nabalekhuule. 27Nebutswa, mbu khuleshe okhubasinyisia, otsie khunyanza, ofuube olulobo, obukule inyeenu eyo eyiranjilila okhufutukhakhwo, ne olwa aloba niwikuule omunwa kwayo, olanyoola ishekeli; ochibukule, obarunje khulwanje khandi khululwo.
Attualmente Selezionati:
Matsayo 17: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975