Matsayo 20
20
Abakholi mumukunda kwemitsabibu
1Okhuba obwami obwomwikulu bufwana shinga omundu omwenengo owarula mumabwibwi natsia okhufula abakholi abomumu-kundakwe kwemitsabibu. 2Ne olwa yali nalakaane nabakholi abo okhubaheelesia itinari khunyanga, yabaruma mumukundakwe. 3Mana narula shinga khusaa yakhataru, nalola abandi nibasinjiile butswa haluyia; 4khandi nabo nababiila ari Mutsie neenyu mumukunda, ne ndalamuheelesia eshimukhoyela. Nibatsia bario. 5Narula khandi shinga khusaa yakhasasaba, nende eyashienda, nakhola ario. 6Ne ahambi khusaa yekhumi nandala yarula nanyoola abandi khandi nibasinjiile; nabareeba ari Mbushiina nimusinjiile hano eshiteere tulu nimurakhola eshindu ta? 7Nibamukalusia bari Shichila abulaho oukhufulile. Naye nababiila ari Mutsie neenyu mumukunda kwemitsabibu. 8Ne olwa eshialo bweela, omwami omwene mukunda kwemitsabibu yaboolela omunyapara wemilimochie ari Langa abakholi, obarunje omushaara kwabwe, okhuchaachila khubamaliliishe okhuula khubaranjiliile. 9Ne olwa boola abali nibafulilwe shinga khusaa yekhumi nandala, bakabilwa buli mundu itinari. 10Ne abali abambeli olwa boolaho, bakaala mbu bakhaheebwa eshishila; nebutswa nabo nibakabilwa bario, buli mundu itinari. 11Ne olwa bali nibamalile okhuchibukula, babuutsuluulila omwenengo oyo, 12nibaboola bari Bano abolunyuma bamalile isaa ndala yonyene, ne obaleng'aasiye nineefwe abeefwiliile obusiro bweshiteere nende omubasu omululu. 13Naye nakalusia nareeba oundi khubo, ari Owashianje, shikhukholeele libii liosi ta; shikhulakaane nineenywe okhumuheelesia itinari? 14Bukula eshili eshishio, otsie butsia; nokhuchama khwanje okhumuheelesia uno owolunyuma shinga olwa ekhuheelesiye iwe. 15Shinyala okhukhola ebindu ebili bianje omwene shinga olwa enjama? Nohomba oluutsi obubii okhuba isie endi omuhaani? 16Nolwa kali, abeinyuma balaba abambeli, nabambeli abeinyuma.
Yesu yaboola akokhufwakhwe olwakhataru
(Mk. 10.32-34; Lk. 18.31-34)
17Ne olwa Yesu yali nali okhutikulukha okhutsia eYerusalemu yabukula abeechi abo ekhumi nababili bonyene, ne nibali khunjila nababoolela ari 18Lole, khutikulukha nikhutsia eYerusalemu; ne Omwana wOmundu alahaanwa mumakhono kabakhulundu babakuhani nende abahandiichi; nabo balamukhalachila eshiina eshiokhwirwa, 19nibamuhaana mumakhono kAbamahanga, mbu bamunyokhoosie, nibamunywekha tsikhoba, nibamubamba khumusalaba; ne khunyanga yakhataru alalamusibwa.
Yakobo naYohana basaba likhuwa
(Mk. 10.35-45)
20Mana nyinabwe abaana baZebedayo niyeetsa aha yali halala nabaanabe, namwinamila, namusaba likhuwa lindi. 21Namureeba ari Eshia wenya nishiina? Naye namusunjila ari Laka mbu abaana banje babili bano beekhale, mulala khumukhonokwo musaatsa, oundi khumukhono mukhasi, mubwamibwo. 22Ne Yesu yakalusia, nasunga ari Mukorilwe eshia musaba shinga olwa shili. Munyala okhunywakhwo khushikombe eshia endi okhunyweelakhwo isie? Nibamusunjila bari Khunyala. 23Naye nababoolela ari Toto, eshikombe shianje mulanyweelakhwo; nebutswa akokhwikhala khumukhono kwanje musaatsa nende khumukhono mukhasi shikali akanje okhuhaana ta; ne nakabeenabo aba kakasilibwa nende Papa.
24Nabo ekhumi, olwa bahulilakhwo, basinyishila akabashiabwe abo babili. 25Ne Yesu yabalanga ewa yali, naboola ari Mumanyile shinga abaruchi bAbamahanga olwa babaamihanga, khandi abakhongo babwe shinga olwa babarukanga. 26Ne shikalaba kario mwinywe ta; nebutswa owenya okhuba omukhongo mwinywe, abe ye omukhalabani weenywe; 27naye owenya okhuba owambeli mwinywe, abe ye omusumba weenywe; 28shinga Omwana wOmundu olwa arayeetsa okhukhalabanilwa ta, habula okhukhalabana, nokhuhaana obulamubwe bube eshinunulo khulwa abanji.
Ababofu babili banyalilwa okhulola
(Mk. 10.46-52; Lk. 18.25-43)
29Ne olwa bali nibarulanga eYeriko, omukanda omukali nikumulondakhwo. 30Ne lola, ababofu babili abali nibeekhaale khundulo weinjila, olwa bahulila mbu Yesu niye oubiranga, balanjisia, bari Omwami, okhubeele tsimbabasi, iwe Omwana waDaudi. 31Abomukanda nibabaloshela mbu baholeele; nabo nibameeta bumeeta okhuianjisia, bari Omwami, okhubeele tsimbabasi, iwe Omwana waDaudi. 32Yesu niyeemaho nabalanga, nareeba mbu Nishiina eshia mwenya emukholele? 33Nibamusunjila bari Omwami, mbu tsimoni tsieefwe tsitimbusibwe. 34Yesu nabatiililwa tsimbabasi, natiilakhwo khumoni tsiabwe; ne habwene nahabwene nibachaaka okhulola, nibalonda munyumawe.
Attualmente Selezionati:
Matsayo 20: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975