Matsayo 22
22
Oluchelo Iwelisabo lieshiselelo
1Mana Yesu nakalusia nababoolela khandi munjelo, ari 2Obwami obwomwikulu buchelasibwa nende omuruchi undi, owateeshela omwanawe lisabo lieshiselelo, 3naruma abasumbabe okhubalanga abali nibalanjilwe mushiselelo; nabo nibaloba okhwitsa. 4Khandi naruma abasumba bandi, ari Baboolele abalanjilwe mbu Lole, emalile okhuteekha ebiliibwa bianje; tsing'ombe tsianje nende ebinulu bianje biirilwe, ebindu biosi biirecheeshe; mwitse khwisabo lieshiselelo. 5Nabo nibarateeba ta, nibatsia ewa batsia, oundi mundalotsie, oundi khubukhalabwe; 6abandi nabo nibahamba abasumbabe abo, nibabakhola obubii, nibabeera. 7Kho omuruchi natiilwa oburima, naruma amahe kabasikaribe, nahesia abeeri abo, nasamba litaala liabwe. 8Mana naboolela abasumbabe ari Eshiselelo shikasiibwe, ne abali nibalanjilwe shibali nibakwanile ta. 9Kho mutsie mumasanganjila, ne bosi aba mulanyoola, mubalanje khwisabo lieshiselelo. 10Abasumba abo nibarula nibatsia khumihanda nibakhung'aasia bosi aba banyoola, kata ababii kata abalayi; abacheni mana nibeetsula mushiselelo.
11Nebutswa olwa omuruchi yeenjila mbu alole abacheni, yalolamwo omundu undi oureefwalile eshiifwalo shieshiselelo ta; 12namureeba ari Owashianje, winjiile muno orie, nobula nende eshiifwalo shieshiselelo? Naye nang'ang'aala butswa. 13Mana omuruchi naboolela abasumbabe ari Mumubohe amakhono nebilenje, mumusukume mushiilima shielwanyi; eyo khulabayo okhulila nende okhulumaasia ameeno. 14Shichila abalangwa nabanji, ne abalobolwa nabatuutu.
Akokhurunga obushuru bwaKaisari
(Mk. 12.13-17; Lk. 20.20-26)
15Mana abaFarisayo nibatsia nibasanjila okhukhaaba shinga olwa bakhamureka mumasungoke. 16Nibamurumila abeechi babwe halala nende abaHerode, nibareeba bari Omwechesia, khumanyile shinga olwa oli owatoto, niwibaalanga injila yaNyasaye mubwatoto, norateebanga akomundu yesi ta; shichila shiopaaranga khushiimo shiomundu yesi ta. 17Kho okhuboolele, mbu oluutsi orie? Okhurunga obushuru khuKaisari nomusilo nohomba? 18Ne Yesu yalola obumayaanu bwabwe, naboola ari Mundeema mbushi, inywe abakaati? 19Manyiekhwo amapeesa keene kobushuru. Nibamuleerela itinari. 20Nabareeba ari Nobwawina obukondo buno, nende lihandiiko lino? 21Nibamukalusia mbu NebiaKaisari. Mana nababoolela mbu Kho ebili biaKaisari, mumurunjenje Kaisari; nebili ebiaNyasaye, mumurunjenje Nyasaye. 22Ne olwa bahulila, bahuka, nibamurulakhwo, nibeenyokha.
Lireebo eliokhubulamushi
(Mk. 12.18-27; Lk. 20.27-40)
23Inyanga eyo abaSadukayo bandi nibeetsa, ababoolanga mbu bubulaho obulamushi; nibamureeba 24bari Omwechesia, Musa yaboola ari Omundu naba nafwa, ne narali nabaana ta, omusiani wabwe alakalusia omukhasiwe, amubuusilie omwana wabwe omurwe. 25Ne khwali nende abasiani musaafu abomunzu ndala; owambeli yateeshia, ne nafwa, ne olwa arali nolwibulo ta, namulaamila omusiani wabwe omukhasiwe; 26mana owakhabili yesi nakhola ario, nende owakhataru, okhuula khuwomusaafu. 27Olunyuma wabo bosi omukhasi yesi nafwa. 28Kho mukhulamukha aliba omukhasi wawina khubo musaafu? Shichila bosi balikhwo ninaye. 29Ne Yesu nakalusia, nabasunjila mbu Mushiamile, nimuramanya amahandiiko, kata oblmyali bwaNyasaye shinga olwa buli ta. 30Okhuba mubulamushi shibaliteeshinjia kata okhuteeshibwa ta; ne baliba shinga abamalaika abomwikulu.
31Ne khumakhuwa kobulamushi bwabafu, shimwasoomakhwo aka mwaboolelwa nende Nyasaye, mbu 32Nisie Nyasaye wAburahamu, khandi Nyasaye waIsaka, khandi Nyasaye waYakobo? Nyasaye shiali Nyasaye wabafu ta, habula wabali mwoyo. 33Ne olwa abemikanda bahulilakhwo, bahuka khukhwechesiakhwe.
Lilako likhongo
(Mk. 12.28-34)
34Nebutswa abaFarisayo olwa bahulila shinga olwa yali nang'ang'aasiye abaSadukayo, nibakhung'aana halala. 35Ne mulala khubo, omukhulundu wamalako, yamureeba lireebo, namuteema, ari 36Omwechesia, lili heena lilako likhongo eliomumalako? 37Naye namuboolela mbu Omuheelenje Omwami Nyasayewo nende omwoyokwo kwosi, neshiimoshio shiosi, nobuyililisiibwo bwosi. 38Lino nilio lilako likhongo khandi neliambeli. 39Nelindi eliakhabili, elifwanana ninalio, ndielino, mbu Oheelenje owashio shinga olwa wiheela omwene. 40Amalako kosi nende abanabii biileetanga khumalako ako kabili.
Lireebo eliokhuMwana waDaudi
(Mk. 12.35-37; Lk. 20.41-44)
41Ne olwa abaFarisayo bali nibakhung'aaniile halala, Yesu yabareeba lireebo, 42ari Muluutsi murie khuKristo? Mbu nomwana wawina? Nibamukalusia mbu Nomwana waDaudi. 43Nareeba mbu Kho Daudi amulanga arie mbu Omwami, niyeebaalilwa nende Roho? ari
44Omwami yasunjila Omwami wanje, ari
Yikhala khumukhono kwanje musaatsa okhuula olwa emba nikholile abasukubo babe aba olambisiakhwo ebilenje.
45Kho Daudi naba namulanganga mbu Omwami, yakhanyala arie okhuba omwanawe? 46Ne yabulayo owanyala okhumukalusia likhuwa, kata omundu yesi shiyatsaalikha okhumureeba amareebo kandi okhurula khunyanga eyo ta.
Attualmente Selezionati:
Matsayo 22: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975