Mariko 11
11
Yesu yeenjila muYerusalemu nomwikhoyo
(Mat. 21.1-11; Lk. 19.28-40; Yoh. 12.12-19)
1Olwa bali niboolile ahambi nende Yerusalemu, okhuula eBetsefage nende Betsania, nibali enashikulu shiLmitseituni, yaruma babili abokhubeechibe, 2nababoolela mbu Mutsie mwitaala elihengaane nineenywe; habwenaho, nimushiinjilamwo, mulanyoola eshimoosi shieisishili nishiboyilwe, eshia omundu arashianiinakhwo ta; mushiboholole, mwitse ninashio. 3Ne omundu yesi naba namureeba mbu Mbushiina nimukhola murio? Kho muboole mbu Omwami ashienya, ne khandi alashikalusia hano bwangu. 4Nibatsia, nibanyoola eshimoosi nishiboyilwe hashilibwa, khunjila ebulafu; nibashiboholola. 5Ne abandi khubali nibasinjiileho nibabareeba bari Mukhola murie nimuboholola eshimoosi? 6Nabo nibababoolela shinga Yesu olwa yali nasunjile; mana nibabalekha. 7Nibaleera eshimoosi ewa Yesu yali, nibaala khushio ebiifwalo biabwe; naye nashiniinakhwo. 8Abandu abanji nibaala tsingubo tsiabwe khunjila, nabandi amasaafu aka bali nibaremuule mumikunda. 9Nabo abamwimilila, nende abamulonda bosi, balanjisia, bari Hosana; Owitsa muliira liOmwami yeetsoomibwe; 10obwami obwitsanga bwaDaudi seefwe bwitsoomibwe; Hosana ikulu mwikulu!
11Naye niyeenjila muYerusalemu, natsia muhekalu; nolwa yali nahenjile tsimbeka tsiosi khu-bindu biosi, yarula natsia eBetsania halala nende abo Ekhuminababili, okhuba eshialo bwali nihwilile .
Yesu yalaka omukhuyu eshilaka munwa
(Mat. 21.18-19)
12Mana mukamba, olwa bali nibarulanga eBetsania, inzala niyimuluma. 13Nalola omukhuyu nikuli ehale, okwamasaafu amanji, natsia, mbu haundi yakhanyoolakhwo eshindu; nolwa yoola aha kwali, shiyanyoolakhwo eshindu ta, habula amasaafu konyene; shichila shitsiali tsindaalo tsiamakhuyu ta. 14Nakusunjila ari Omundu yesi araliakhwo ebiamo khwiwe okhurula olwa leelo kata inziayo ta. Abeechibe nabo nibahulila.
Yesu yeenjila muhekalu
(Mat. 21.12-17; Lk. 19.45-48; Yoh. 2.13-22)
15Niboola eYerusalemu; naye niyeenjila muhekalu, nachaaka okhubarusia abo abali nibakusinjia nende okhukula ebindu muhekalu, nafumamia tsimeesa tsiabafunji bamapeesa, nende ebifumbi biabakusii bamahuusi, 16narafuchiilila omundu yesi okhubira muhekalu nachinjile omwandu ta. 17Nabeechesia, nasunga mbu Shikahandiikwa kari Inzu yanje yakhalangwe mbu inzu eyokhusaayilamwo khubamahanga kosi? Ne inywe mwachikholile imbinga yabanuuli. 18Abakhulundu babakuhani nende abahandiichi nibahulila, nibakhaaba shinga olwa bakhamumalilana; okhuba bamuriitsanga, shichila abomukanda bosi bali nibachenya khulwa okhwechesiakhwe. 19Ne buli nyanga nibwakheela yarulanga mwitookho.
Eliechesio elirula khukomukhuyu okwaniala
(Mat. 21.20-22)
20Kho mukamba olwa babiraho, balola omukhuyu okwo nikunialile okhurula khushisina. 21Naye Petero niyeetsulila, namusunjila ari Rabi, lola, omukhuyu okwa walaka eshilaka munwa kumalile okhuniala pe. 22Yesu nakalusia, nabasunjila ari Musuubilile Nyasaye. 23Emusunjila toto, mbu Omundu yesi oulasunjila eshikulu shino mbu Wichinje, wisukune munyanza; narakanakania mumwoyokwe ta, nebutswa nasuubila mbu aka asunga keetsa okhwikhola; alakholelwa ario. 24Niko akachila nimusunjila mbu ebindu biosi ebia mulasaba nimulaama, suubile shinga olwa mumalile okhubinyoola, kho mulaba ninabio. 25Kata buli lwosi olwa musinjila nimusaaya, nimuba nimubiishiile omundu yesi likhobo, mumuleshele; mbu mana Seenyve ouli mwikulu yesi amuleshele obuyiiri bweenywe. [26Nebutswa nimuba nimuraleshelana ta, kata Seenywe ouli mwikulu shialamuleshela obuyiiri bweenywe ta.]
Yesu yareebwa khukobunyali obwa yaheebwa
(Mat. 21.23-27; Lk. 20.1-8)
27Niboola khandi eYerusalemu; nolwa yali nachendanga muhekalu, abakhulundu babakuhani nende abahandiichi nende abakofu nibeetsa; 28nibamureeba bari Nobunyali shiina obuchila nokholanga amakhuwa kano? Kata niwina owakhuheelesia obunyali buno okhukhola amakhuwa kano? 29Yesu naboola ari Emureeba inywe likhuwa elala, neenyu mungalusiemwo, kho mana nemuboolele mbu nobunyali shiina obuchila nikholanga amakhuwa kano; 30mbu obubatisii bwaYohana, bwarula mwikulu, nohomba mubandu? Mungalusie. 31Nabo nibaboolelana abeene nabeene, bari Nikhuba nikhusunga mbu Bwarula mwikulu, alareeba mbu Kho mbushiina nimuramusuubilila ta? 32Ne nikhwakhasunga mbu Bwarula mubandubali nibariitsanga abandu; shichila bosi bali nibalolanga khuYohana mbu nomunabii toto. 33Nibakalusia Yesu, nibaboola bari Shikhumanyile ta. Yesu naye nabasunjila mbu Kata siesi shimuboolela mbu nobunyali shiina obuchila nikholanga amakhuwa kano tawe.
Attualmente Selezionati:
Mariko 11: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975