Mariko 15
15
Yesu yaleerwa imbeli waPilato
(Mat. 27.1-2,11-14; Lk. 23.1-5; Yoh. 18.28-38)
1Kho olwa bwashia mutsuli, abakhulundu babakuhani halala nende abakofu nende abahandiichi nende abeshiina bosi baboolana abeene khubeene, nibaboha Yesu, nibamuyila, nibamuhaana mumakhono kaPilato. 2Naye Pilato namureeba mbu Niwe Omuruchi wabaYahudi? Naye nakalusia, namusunjila mbu Nolwa oboola iwe. 3Mana abakhulundu babakuhani nibamuchonjela amakhuwa amanji. 4Pilato namureeba khandi, ari Shiokalusia likhuwa ta? Lola amakhuwa shinga olwa kali amanji aka bakhusitaachiile! 5Nebutswa Yesu shiyakalusia likhuwa liosi khandi ta; okhuula olwa Pilato yahuka.
Yesu yakhalachilwa eshiina shiokhufwa
(Mat. 27.15-26; Lk. 23.13-25; Yoh. 18.39—19.16)
6Ne khwisabo elo Pilato yalinji nabalekhuulila omubohe mulala, owa bamusaba. 7Ne yaliho omundu undi owalangwa mbu Baraba, owali niyabohwa halala nende abandi beinduli, abali nibakholile obwiri munduli yabwe. 8Abomukanda nibatikulukha nibachaaka okhumusaaya mbu akhole shinga olwa yabakholelanga. 9Pilato nabakalusia, naboola ari Mwenya mbu emulekhuulile Omuruchi wabaYahudi noho? 10Okhuba yali naluutsi mbu imbalikha niyo eyichilile abakhulundu babakuhani bali nibamuhaana mumakhonoke. 11Nebutswa abakhulundu babakuhani basema abandu, mbu nobulayi abalekhuulile Baraba.
12Pilato nakalusia khandi, nabasunjila mbu Kho nemukhole endie omwenoyo owa mulanga mbu Omuruchi wabaYahudi? 13Nibayiiba khandi, bari Omubambe khumusalaba. 14Pilato nabareeba ari Ne nibii shiina elia akholile? Nibameeta butswa okhuyiiba, bari Omubambe. 15Ne okhuba Pilato yeenya okhuchamisia abomukanda, yabalekhuulila Baraba; ne namalile okhumunywekha Yesu, yamuhaana mbu abambwe khumusalaba.
Abasikari banyokhoosia Yesu
(Mat. 27.27-31; Yoh. 19.2-3)
16Mana abasikari nibamuyila mulwanyi olwomukari, mbu Praitorio; nibalanga ing'anda yabwe yosi bakhung'aane halala. 17Nibamufwala ingubo yobukondo bweisambarau, nibalukha olusimbi lwamahwa nibamurakhwo; 18nibachaaka okhumushiesia, bari Mulembe, Omuruchi wabaYahudi! 19Nibamunywekha olusi khumurwe nibamunyilikhakhwo amare, nibasikama amasikamo nibamwinamila. 20Nolwa bali nibamalile okhumunyokhoosia, bamufwalula tsingubo etsio tsieisambarau, nibamufwala ebiifwalo bibie omwene. Nibamurusia nibamuyila okhumubamba khumusalaba.
Yesu yabambwa khumusalaba
(Mat. 27.32-44; Lk. 23.26-43; Yoh. 19.17-27)
21Nibamuluunyia omubiri undi okhutsia ninabo achinje omusalabakwe, niye Simoni omuKirene, saabwe Alekisanda nende Rufusu, owali narulanga mumikunda. 22Nibamuusia ahalangwa mbu Gologotsa, eshisina mbu Habundu wEshihanganga. 23Nibamuleerela idivai eyatsokasibwa amanemane; naye narachibukula ta. 24Nibamubamba khumusalaba, nibakabana ebiifwalobie, nibabiupila ikha, okhumanya eshia buli mundu abukula. 25Yali isaa yakhataru; nibamubamba khumusalaba. 26Nelihandiiko liobwinjililwibwe liahandiikwa ikulu, mbu OMURUCHI WABAYAEIUDI.
27Nahalala ninaye nibabamba abanuuli babili; mulala khumukhonokwe musaatsa, noundi khumukhono mukhasi. [28Kho amahandiiko nikoola, akaboola mbu Yabasibwa halala nende abakhayi.]
29Abali nibabirangaho nabo nibamunyeka, nibamuyuyila emirwe, nibasunga bari Wole! Iwe oulikulula ihekalu nochiumbakha khandi mundaalo tsitaru, 30wihonie omwene, wishe orule khumusalaba. 31Khandi abakhulundu babakuhani nabo bario nibamunyokhoosia abeene nabeene, halala nende abahandiichi, nibasunga bari Yahonia abandi, ne shianyala okhwihonia omwene ta. 32Kristo uno, Omuruchi waIsiraeli, yeeshe bulaano arule khumusalaba mbu khulole nikhusuubila. Kata aba yabambwa ninabo halala nabo nibamunyeka.
Okhufwa khwaYesu
(Mat. 27.45-56; Lk. 23.44-49; Yoh. 19.28-30)
33Nolwa yoola isaa yakhasasaba, eshialo shiosi shieekhola eshiilima okhuula khusaa yashienda. 34Mana khusaa yashienda Yesu yayiiba nende omwoyo omukhongo, ari Eli, Eli, lema sabakutsani? Eshisina mbu Nyasaye wanje, Nyasaye wanje, undeshile mbushiina? 35Abandi khubali nibasinjiileho, olwa bahulila, baboola mbu Lole, alanganga Eliya. 36Oundi natsia tsimbilo, niyeetsusia idivai eyiraanyile mushiangwe nara khulusi, namunywesia, nasunga mbu Lekha khulole Eliya naba niyeetsa okhumwisia. 37Yesu nayiiba nomwoyo omukhongo nakhalikha omwoyo.
38Ingubo ishinga eyomuhekalu niyirandukha ebitonye bibili, okhurula ikulu okhuula hasi. 39Ne omuseesia owali niyeemileho ahahengana ninaye, olwa yalola okhufwakhwe shinga olwa khwali, yaboola mbu Toto mwene, omundu uno abeele Omwana waNyasaye. 40Khandi bali nibaliho abakhasi, abali nibasinjiile ehale nibahenganga; ne mubo balimwo Mariamu Magadalene, handi nende Mariamu nyinabwe Yakobo omutuutu nende Yusufu, nende Salome; 41abeenabo bali nibalondananga ninaye olwa yali muGalilaya, nibamukhalabanila; khandi nende abakhasi bandi abanji abali nibatikulukha ninaye okhuula eYerusalemu.
Yesu yaalisibwa mung'ani
(Mat. 27.57-61; Lk. 23.50-56; Yoh. 19.38-42)
42Ne olwa bwoola mungoloobe, shichila yali Eyokhwikhwanilia, eshisim mbu inyanga eyiranjilila Sabato, 43Yusufu weArimatsaya, omukofu woluyali owomushiina, owali nalindiililanga obwami bwaNyasaye, niyeetsa; nakhola itswoni niyeenjila ewaPilato, namusaba omulambo kwaYesu. 44Pilato nachenya okhuhulila mbu ufwile; namulanga omuseesia, namureeba naba namalile okhufwa noho? 45Nolwa yaboolelwa nende omuseesia, yafuchiilila Yusufu okhubukula omulambo. 46Naye nakula ingubo yeikitani, namwakula, namukanyila mungubo eyo yeikitani, namwalisia mung'ani eyayabwa mulwanda; mana naselenjesia lichina nalira mumuliango kweing'ani. 47Nabo Mariamu Magadalene nende Mariamu nyina Yusufu nibalola aha yaalisibwa.
Attualmente Selezionati:
Mariko 15: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975