Mariko 9
9
1Nabasunjila ari Emuboolela toto mbu baliho khubasinjiile hano bano abaralikoonyeelelakhwo khukhufwa ta nibarashialolakhwo Obwami bwaNyasaye shinga olwa bwitsile nobunyali tawe.
Okhukalulwa khwelikondo liaYesu
(Mat. 17.1-13; Lk. 9.28-36)
2Olunyuma lwetsindaalo tsisasaba Yesu yabukula Petero nende Yakobo nende Yohana, natsia ninabo mushikulu eshirambi, bo bonyene; nakalulwa likondolie imbeli wabwe; 3ebiifwalobie nibikwa ebing'inang'inu okhushila, nibilabile tsererere, kata abulaho omwosii yesi owomushialo owakhanyala okhubilafia ario. 4Naye Eliya halala nende Musa nibabaloleshela; ne bali nibasungananga nende Yesu. 5Mana Petero nakalusia nasunjila Yesu ari Rabi, neshilayi ifwe okhuba hano; lekha khuumbashe amatili kataru; elala elilio, elindi liaMusa, nelindi liaEliya. 6Okhuba yakorwa elia akalusia; shichila indenga yali niyibahambile. 7Haho lileesi niliitsa nilibafwimba; omwoyo nikurula mwileesi, kuri uno niye Omwana wanje omuheelwa; mumuhulilenje. 8Mana shialuba nibahenga eyi nende eyi, nibaralola omundu khandi ta, habula Yesu yenyene halala ninabo.
9Nolwa bali nibashiikhanga okhurula mushikulu yabakaania oburaboolela omundu yesi khumakhuwa aka bali nibaluutsi ta, habula olwa Omwana wOmundu yakhaba nalamuushe okhurula mubafu. 10Nabo nibalinda likhuwa elo, nibareebana abeene bonyene khushisina shielikhuwa elo, mbu okhulamukha okhurula mubafu nishi? 11Nibamureeba bari Nishiina eshichila abahandiichi nibaboolanga mbu Eliya akhoyile okhwitsa mbeli? 12Nabakalusia mbu Toto mwene Eliya aranjilila okhwitsa, niyeeluula ebindu biosi obuyia; ne kahandiikwa karie khuMwana wOmundu, mbu akhoyile okhwifwila amakhuwa amanji, nende okhulechelwa elala? 13Nasi emusunjila mbu Eliya yamala okhwitsa, khandi bamukholela kosi aka bali nibeenya, shinga olwa kamuhandiichilwa.
Yesu yahonia omwana owali naroho wobusilu
(Mat. 17.14-21; Lk. 9.37-43)
14Nolwa boola ewa abeechi bali, balola omukanda omukali nikubabotokhaane, abahandiichi nibayingananga ninabo amakhuwa. 15Habwenaho abomukanda bosi olwa bamulola nibachenya muno nibatsia ewa yali tsimbilo nibamushiesia. 16Naye nabareeba ari Eshia muyinganilanga ninabo nishiina? 17Mulala khubomukanda nakalusia mbu Omwechesia, ekhuleereele omwana wanje, oulikhwo nende roho wobusilu; 18ne hosi hosi aha amuhambilanga amukhupanga hasi; lifilo nilifwitukha mumunwakwe, nalumaasia ameeno, natoreelela; nasi esungaane nende abeechibo mbu bamurusie; ne shibanyalile ta. 19Naye nabakalusia, nasunga ari Inywe abolwibulo olurasuubila ta, ndalabeetsanga nineenywe okhuula liina? Ndalamwisimilisilia okhuula liina? Mumundeerele. 20Nibanluleera ewa yali; nolwa yamulola, habwenaho roho oyo namubahasia muno; nakwa hasi, nakalakala, lifilo nilifwitukha mumunwakwe. 21Nareeba samwana ari Kano kachaaka liina okhwikholanga khuye? Naye ari Okhurula nali omwana. 22Khandi akhanji amukwisinjia kata mumulilo kata mumatsi, okhumumalilana; ne noba nonyala eshindu, okhubeele tsimbabasi, okhuhabine. 23Yesu namusunjila mbu Noba nonyala, ta! Kosi kanyalikhanga khwoyo ousuubila. 24Habwenaho samwana omwana nalakaya, nasunga ari Esuubiile! Ukhoonye khuburasuubila bwanje. 25Nolwa Yesu yalola shinga olwa abomukanda beetsa nibeelukhanga, yakondeshela roho oyo weshifwabwi, namusunjila mbu Iwe roho wobusilu nokhwikala amarwi, ekhulaka mbu omurulemwo, noramwinjilamwo khandi tawe. 26Naye nayiiba, namubahasia muno, narula, omwana naba shiomufu, okhuula olwa abanji baboola mbu Afwile. 27Nebutswa Yesu yamutiila omukhono, namubuusia; naye nasinjila. 28Nolwa yali niyenjiile munzu abeechibe nibamureeba mabiswi, bari Nishiina eshichilile ifwe nikhuranyalile okhumurusia ta? 29Naye nabasunjila ari Imbia yino shiyinyala okhurusibwa nelikhuwa liosi ta habula okhusaaya.
Yesu yaboola khandi akokhulwakhwe
(Mat. 17.22-23; Lk. 9.43-45)
30Nibarulayo nibakhalasia muGalilaya; naye nareenya mbu omundu yesi amanyekhwo ta. 31Okhuba yali niyeechesinjia abeechibe, nabasunjila mbu Omwana wOmundu ali okhuhaanwa mumakhono kabandu, ne balamwira; nolwa alaba niyeerilwe, inyuma wetsindaalo tsitaru alalamukha khandi. 32Ne shibamanya eshisina shiamakhuwa ako ta, nibaria okhumureeba.
Niwina ouzi omukhongo?
(Mat. 18.1-5; Lk. 9.46-48)
33Niboola eKaperinaumu; nolwa yali nali munzu yabareeba ari Netsimbakha shiina etsia mukhupilenje khunjila? 34Nibaholeela tsi; shichila bali nibayingaanenje abeene nabeene khunjila mbu niwina omukhongo? 35Naye niyeekhala, nalanga abo Ekhumi-nababili, nabasunjila ari Omundu yesi naba niyeenya okhuba owambeli, abe ye ouhelelesia mubosi, khandi omukhalabani wabosi. 36Nabukula omwana omutuutu, namura hakari wabo, namuchinga mumakhono; nabasunjila mbu 37Omundu yesi owinjisia omwana omutuutu mulala shinga uno khulwa eliira lianje, yanzinjisia isie; ne ounzinjisia isie, shiyanzinjisia isie ta, habula oyo owanduma.
Ourakhufukula ta nowolubeka Iweefwe
(Lk. 9.49-50; Mat. 10.42)
38Yohara namusunjila mbu Omwechesia, khwaluutsi oundi narusinjia amadimoni khulwa eliiralio, nikhumukaania, shichila shiyalondana nineefwe ta. 39Ne Yesu naboola ari Muramukaaninjia tawe; shichila abulaho oukhola omulimo kwobunyali khulwa eliira lianje, wakhanyala bwangu okhufwola. 40Shichila ourakhufukula ta nowolubeka Iweefwe. 41Okhuba omundu yesi oumuheelesia eshikombe shiamatsi akokhunywa shichila muli baKristo, emusunjila toto mbu shialachweya okhunyoola amatanike nahatuutu ta.
Akokhurechekha abandu bakwe mubwonooni
(Mat. 18.6-9; Lk. 17.1-2)
42Ne omundu yesi owisichirasia khalala khurutuutu runo oru'suubililanga, bwakhabeele bulayi khuye oluchina olukali lwabohwa mwikosilie, wasukunwa munyanza ario. 43Ne omukhonokwo nikuba nikukhwisichirasia, okureme; neshilayi winjile mubulamu noli omulema, okhushila okhutsia muGehena, mumulilo okuranyala okhusimibwa ta, noli nemikhono chibili; [44omwa inyende yabwe yirafwitsanga kata omulilo okhusima tawe.] 45Kata eshilenjeshio nishiba nishikhwisichirasia, oshireme; neshilayi winjile mubulamu noli oweindieku, okhushila okhusukunwa muGehena noli nebilenje bibili; [46omwa inyende yabwe yirafwitsanga kata omulilo okhusima tawe.] 47Kata imoniyo niyiba niyikhwisichirasia, ochitsomole; neshilayi winjile mubwami bwaNyasaye noli oweimoni ndala, okhushila okhusukunwa muGehena noli netsimoni tsibili; 48omwa inyende yabwe yirafwitsanga kata omulilo okhusima tawe. 49Okhuba buli mundu alalungwa nomulilo. 50Omuunyu nomulayi; ne omuunyu nikuba nikutsinziibe, mulakulunga nende shiina? Mube nomuunyu mumioyo chieeny ve, nimuba nomulembe abeene nabeene.
Attualmente Selezionati:
Mariko 9: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975