Abaroma 4
4
Obusuubili bwaAburahamu
1Kho nakhusunje khurie khuAburahamu, omwibuli weefwe mubwibuli bwomubili? 2Okhuba Aburahamu naba niyabasilibwa obulunjishi khulwa ebikhole, aba nali nende eshia yeetsialila; ne imbeli waNyasaye ta. 3Okhuba amahandiiko kaboola karie? Mbu Ne Aburahamu yasuubila Nyasaye, nakhwo nikhumubasilibwa okhuba obulunjishi. 4Ne khumundu oukholanga emilimo, omurungokwe shikumubasilibwa mbu nokwobukoosia ta, habula nokwelikobi. 5Ne khumundu ourakhola emilimo ta, habula amusuubilila oyo oubabasilia obulunjishi abo abaramuria ta, obusuubilibwe bumubasilibwa okhuba obulunjishi. 6Shinga Daudi yesi olwa yarumbula, mbu noweikhabi omundu oyo owa Nyasaye abasilinjia obulunjishi aharali ebikhole ta, 7ari
Nabeikhabi abeenabo aba tsimbii tsiabwe tsialeshelwa,
ebionoono biabwe nabio nibifuunikhwa.
8Noweikhabi omundu oyo owa Omwami aramubasiliakhwo obwonooni tawe.
9Ne ikhabi eyo yili khubeshishebo, nohomba khubasinde bosi? Okhuba khuboolanga mbu Aburahamu yabasilibwa obusuubilibwe okhuba obulunjishi. 10Ne yabasilibwa arie? Olwa yali niyashebwa, nohomba olwa yali nashili omusinde? Shibwali mukhushebwa ta, habula mubusinde; 11naye yaheebwa eshilelo shieshishebo, mbu shitinyie obulunjishi bwobusuubili obwa yali ninabwo olwa yali nali omusinde; mbu abe kuukanyene bosi abasuubilanga, kata olwa bali abasinde, mbu mana obulunjishi bubabasilibwekhwo; 12khandi mbu abe kuukanyene abeshishebo, abarashebwa bushebwa butswa ta, habula abeechendelesia nibalonda munjila yobusuubili bwenobwo obwa kuuka weefwe Aburahamu yali ninabwo nali omusinde.
Akasuubibwa kanyooleshela mubusuubili
13Okhuba likhuwa elia Aburahamu nende abeetsukhulube basuubisibwa, mbu yakhalaamilwa eshibala shiosi, shiyalisuubisibwa munjila yamalako ta, habula munjila yobulunjishi oburula mubusuubili. 14Shichila abali abamalako nibaba nibali abobulaame, obusuubili buba obwabutswa, khandi obusuubisii buba obukhaya. 15Shichila amalako keebula oburima; ne aha ameebaalo kabula, obukhayi nabwo bubulaho.
16Niko akachila nilili eliobusuubili, mbu liitse munjila yobukoosia; mbu obusuubisii buralisibwe khubeetsukhulube bosi; shibali abo bonyene abali abamalako ta, habula nende abo abali bobusuubili bwaAburahamu, ouli kuuka weefwe fwesi, 17(shinga olwa liahandiikwa, mbu Ndakhukhola iwe obe kuukanyene amahanga amanji), imbeli wa oyo owa yasuubililanga, niye Nyasaye oulamusinjia abafu nalanga ebindu ebiralikhwoho ta mbu bibeho. 18Ye mubunaayi yasuubilila kata akaranaayikha ta, mbu mana yeekhole kuukanyene amahanga amanji, shinga olwa kaboolwa, mbu Abeetsukhulubo baliba bario. 19Obusuubilibwe shibwateshelana ta kata olwa yayililisia khumubili kukwe okwali butswa shinga omufu, shichila yali owemiyika shinga eshikhumi, kata nende obufu bwolubeleshelo lwaSara ta. 20Toto mwene, olwa yahenga obusuubisii bwaNyasaye shiyakanakania kata okhuhayahayia khulwa oburasuubila ta, ne yakufuhala khulwa obusuubili, namuheelesia Nyasaye oluyali, 21namanya bulayi mbu aka yasuubisia khandi anyala okhukakhola.
22Niko akachila nibumubasilibwa okhuba obulunjishi. 23Ne shikahandiikwa khululwe yenyene ta, mbu bumubasilibwa burio; 24habula khulweefwe fwesi, aba bulabasilibwakhwo, ifwe abasuubilila oyo owalamusia Yesu Omwami weefwe okhurula mukhufwa, 25omwenoyo owakhobwa khulwa obukhayi bweefwe, nalamusibwa mbu khubasilibwekhwo obuluniishi.
Attualmente Selezionati:
Abaroma 4: OUV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975