Zefania 3
3
Obwonooni bwa Yerusalemu, nobununulwi bwalio
1Woowe khwitookho elisandinjia,
elieinduli, elikwile obukaali!
2Shilihulilanga amakhuwa kosi kosi,
kata shilifuchiilila obuchesiyii ta;
shilisuubililanga OMWAMI,
kata shilisitanga ahambi khuNyasaye walio ta.
3Abakhulundu balio hakari walio netsitalanyi etsihoola;
abayaasii balio nabo nebisuutse biokhubwile;
shibalekhanga eshindu shikone ta.
4Abanabii balio nabayungubafu,
abandu ababula obwisiikwa;
abakuhani balio boonooninjia ebili ebitakatifu;
basasinjia akamalako.
5OMWAMI ouli hakari walio nomulunjishi;
shiakholanga akobumayaanu ta;
mutsuli buli mutsuli ayininjia obuyaasiibwe,
kata shiakonelanga ta;
ne oubula obwatoto shialola tsisoni ta.
6Ndaakamiye amahanga;
eminaara chiako chiokhukoona chilikuluushe;
ndakwisiye emihanda chialio emikhaya,
kata abulaho ouchendakhwo;
amataala kako kamuluulwe;
abulaho omundu; abulaho oumenyamwo.
7Ndasunjile mbu Bulaano alariitsanga,
nafuchiilila obuchesiyii;
shialeebilila kosi aka ndamurakhwo ta.
Nebutswa barakhwo omwoyo muno okhumayaasia ebikhole biabwe biosi.
8OMWAMI aboola mbu Khulwako munindiilile okhuula khunyanga olwa ndalabuukha okhurumbula akobuloli;
okhuba aka ereelekhwo omwoyo ngakano, mbu okhukhung'aasia amahanga,
nokhubukaasia obwami bwabandu,
nokhubasundulila obusinyishi bwanje,
mbu oburima bwanje obululu bwosi;
okhuba eshialo shiosi pe shilamalilanwa nomulilo kweimbalikha yanje.
9Habwenaho ndalakalula okhuboola khwetsimbia tsiabandu
khube okhuboola okhweleleshe,
mbu bosi bahaabile eliira liOMWAMI,
nibamukhalabanila nomwoyo mulala.
10Okhurula injelekha wemialo chieEtiopia abasabi banje, mbu omukhaana wabasalaasibwa banje,
balaleera eshihaanwa shianje.
11Khunyanga eyo shiolafwimbilwa ebikholebio biosi omurwe,
ebia wakhayila ninabio, ta;
okhuba habwenaho ndalayinia hakariwo abeechinjimisiibo abeinjinia,
kata shioleekhulumamia khandi ta mushikulu shianje eshitakatifu.
12Okhuba ndalalekha hakariwo oluyia lwabandu abasandibwa, abamanani, nabo balanyoola obwilushilo muliira liOMWAMI,
13abo abomusikalo kwaIsiraeli.
Shibalakhola obumayaanu,
kata okhuboola akobubeeyi,
kata olulimi lwobukaatii shilulanyooleshela muminwa chiabwe ta.
Okhuba balaayanga, nibakona,
kata alabulaho oubariisia ta.
14Iwe omukhaana waSayuni, yimba!
Iwe Isiraeli, khupa tsingalakala!
Iwe omukhaana waYerusalemu,
tsatsahala niwikhoya nomwoyokwo kwosi.
15OMWAMI wayiniye khwiwe ebiinabio biosi;
warusiyemwo abasukubo;
omuruchi waIsiraeli, mbu OMWAMI, ali hakari mwiwe;
shiolariitsanga amabii khandi ta.
16Khunyanga eyo Yerusalemu lilasunjilwa mbu Oraria ta, iwe Sayuni;
amakhonoko kaleshe okhutendeya.
17OMWAMI Nyasayewo ali hakariwo,
omululu, oulahula;
alakhusangaalila nokhwikhoya;
alakhukhola omuyia mubuheelibwe;
alakhwikhoyela niyeemba tsinyimbo,
18shinga khunyanga yelisabo.
Ndalakhurusiakhwo amabii,
oleshe okhwituukha amaseyo kako.
19Lola, khunduukho eyo ndalabakholela akakhoyeele bosi abakhusandinjia;
ndalabahonia abatiechela,
nimbakhung'aasia abasalaasiibwe;
ndalabanyoolela obwitsoomibwi neifuma,
abalinji netsisoni mushialo shiosi.
20Khunduukho eyo ndalamwinjisia;
khunduukho eyo ndalamukhung'aasia;
okhuba ndalamukhola mube ifuma nobwitsoomibwi
mumbia tsiosi etsiomushialo olwa ndalakalusia tsikhabi tsieenywe nimulola; nilwo olwa OMWAMI aboola.
Attualmente Selezionati:
Zefania 3: OUV
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Oluluyia Union Version © Bible Society of Kenya 1975