Maliko 11
11
Yesu ankwinjila ku Yelusalemu kwa liwungo
Matayo 21:1-11; Lukasi 19:28-40; Yohana 12:12-19
1Yesu hamwe na vadahitswa vake vavaga habehi na muji gwa Yelusalemu, vakafikaje kufijiji fya Besifwage na Betsaniya, habehi na chidunda cha Mitseyituni. Yesu akavatumaje vadahitswa vake vavili valongole, 2Yesu akavalonjelaje, “Mubite ku chijiji cha kulutalo. Homukuva munkwinjila, mukuyifika ntsana ya ntsove yiwopitwe yo ying'ali kukwinwa na munu yoyuve ayijendele. Muyiwopole na kundetela. 3Manyi munu avaputse kuta kwasawuli yachi munguyiwopola? Henye mukumulonjele kuta Mutwa anguyigana, na hambele akuyipilula.” 4Vala vadahitsi vavili vakawukaje, vakayifikaje ntsana ya ntsove yiwopitwe mulubali mwa ng'asi, habehi na lwitsi lwa nyumba. Hovavaga vanguyiwopola yila ntsove, 5vanu vatunga yovavaga hono hala vakavaputsaje, “Henye mun'dita chinu chachi iho? Kwasawuli yachi munguyiwopola ntsana ya ntsove?” 6Vala vadahitswa va Yesu vakavalonjelaje kota hila fyo aka avalonje Yesu. Vanu vala vakavalekaje vategule na kuwuka nayo yila ntsana ya ntsove. 7Vakayisindikaje yila ntsana ya ntsove kwa Yesu, na vakatandikaje migolole jawo muchanya mwa yila ntsana ya ntsove na Yesu akikalaje muchanya mwa mugongo gwake. 8Vanu wolofu vakatandikaje myenda jawo mu ng'asi, na vanji vakatandatsaje miputi jovali vakwanyulansile mumigunda ili kumuhesimila Yesu. 9Vanu vakalongolaje, na vanji vakavaje kumbele, na Yesu akavaje hagati, na vanu veka vakatovaje chiyove kwa kulonga, “Atsumitswe Mulungu! Uyu yo aditilwe wuwuya na Mulungu yo ankutsa kwa Litawa lya Mutwa! 10Mulungu awuditye wuwuya Wuntsajila wowunkutsa wa dada vetu Dawudi. Ntsumitso tsina Mulungu va kilanga ndalahela!” 11Yesu akinjilaje ku Yelusalemu na akabitaje ha Nyumba ya Mulungu, akalavaje chila chinu kwa kuchihima. Lechelelo akawukaje hamwe na vadahitswa vake akawuyaje ku Betsaniya kwasawuli yavaga mumihe.
Yesu angulikotola libichi lya mutini
Matayo 21:18-19
12Hamitondo iyage hamilawu Yesu hamwe na vadahitswa vake hovavaga vanhuma ku Betsaniya kubita ku Yelusalemu, Yesu akavaje na ntsala. 13Yesu hoavaga kulava kwa kutali, akaguwonaje mubichi gwa mutini gutinive mihamba myolofu. Akahejelelaje ili abave libawo lyolive, avaga kufika akawonaje mihamba ng'ani, kwasawuli sichavaga chipindi cha mibawo. 14Yesu akagulonjelaje mubichi gula, “Kuhuma sambi na siku tseka, siukulela mibawo jojive!” Nawo vadahitswa vake vakahulikaje hila fyo agukotolaga.
Yesu anvinga vanu ha luga lwa Nyumba ya Mulungu
Matayo 21:12-17; Lukasi 19:45-48; Yohana 2:13-22
15Yesu hamwe na vadahitswa vake hovavaga kufika ku Yelusalemu, Yesu akinjilalaje ha luga lwa Nyumba ya Mulungu na kwantsa kuvavinga vanu yo vagutsaga na kugula finu hono iho. Akabindulangaje metsa tsa vala yo vafuntsaga magobole, kaha akabindulangaje figoda fya vanu yo vagutsaga ng'unda. 16Yesu akalemetsaje vanu valeche kutegula chinu chochive kuhuma hala ha Nyumba ya Mulungu. 17Kaha akavadahitsaje, “Mbe, Siyandikwe kuta Mulungu alontsile, Nyumba yangu yikuchemwa Nyumba ya Kusalila vanu veka? Lechelelo henye muyidisile kuva malika ya mawumiyani.” 18Vavina va vatawula nambiko na vadahitsi va malajitso ga Musa vavaga kuhulika ndongwa itso, vakantsaje kusaka hila fyo vakumukopola Yesu. Lechelelo vamwogopaga, kwasawuli vanu veka vapomokaga hila Yesu fyo adahitsaga finofu. 19Hoyavaga kufika mumihe, Yesu na vadahitswa vake vakawukaje kuhuma Yelusalemu.
Cho tungidahitsa kuhuma kwa libichi lya mutini go gukatsile
Matayo 21:20-22
20Hamilawu iyage hovavaga vanlutila hala ha mubichi gwa mutini, vakaliwonaje lila libichi lyeka likatsile kwantsila mu ndela. 21Petulo akiwukaje chila cho avaga alontsile Yesu na kumulonjela kuta, “Mudahitsi lave! Gula mubichi gwa mutini go ukagukotwe gukatsile!” 22Yesu akavalonjelaje vadahitswa vake, “Mumutumbilaje Mulungu.” 23Ntsinguvalonjelani wukweli kuta, manyi munu achilonjele chidunda chino, gumbuche na wikitotse mu bahali, na kuno alihela muhwehwe goguve munumbula yake na kaha angitumbila kuta yikuva hihila kota fyo alontsile, akuditilwa lulongwa ulo. 24Ihyo ntsinguvalonjela, hala ho munsala na kusuka chinu chochive kwa Mulungu, mwitumbilaje kuta mwanuchye, nanye mukuva mupasile. 25Nanye chila homukuva munsala, mun'ganika mumuhulumile munu lulongwa loluve lo avakosye, nayo Dada venyu va kilanga avahulumile na henye ndongwa tsenyu ntsibi. 26Lechelelo manyi henye muleche kuvahulumila vanu, na Dada venyu va kilanga siakuvahulumila na henye ndongwa tsenyu ntsibi.#11:26 Bibiliya tsinji tsa katali tsilihela musitali guno
Yesu anwutswa wuvetso wake
Matayo 21:23-27; Lukasi 20:1-8
27Yesu hamwe na vadahitswa vake vakafikaje kaha ku Yelusalemu. Yesu hoavaga an'jenda ha luga lwa Nyuma ya Mulungu, vavina va vatawula nambiko, na vadahitsi va malajitso ga Musa, na vavina va muji vakatsaje, 28na kumuputsa, “Ndongwa tsila tso un'dita chila siku, un'dita kwa wuvetso wachi? Nani yo akupelye wuvetso wa kudita ndongwa itso?” 29Yesu akavajibulaje, “Nguvaputsa lulongwa lumwe manyi munjibule na heni nguvalonjela ntsin'dita ndongwatsino kwa wuvetso wa nani. 30Mundonjele kuta wuvetso wa Yohana kubatitsa vanu wahumye kwa Mulungu awu kwa vanu?” 31Vakantsaje kulongana vene kwa vene, “Manyi tulonje kuta wahumye kwa Mulungu, akutuputsa kuta mbona simwamutumbye Yohana Mubatitsi? 32Lechelelo kaha manyi tulonje kuta, wahumye kwa vanu, vanu vakutuvipila.” Vawogopaga vala vanu, kwasawuli vanu veka vatselaga kuta Yohana avaga muloli va Mulungu. 33Ihyo vakamulonjelaje Yesu kuta, “Hetwe sinamnbe tutsele.” Nayo Yesu akavalonjelaje, “Na heni singuvalonjela kuta ntsin'dita ndongwa tsino kwa wuvetso wa nani.”
Attualmente Selezionati:
Maliko 11: SBV
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
The New Testament in Sagala Language @The Word for The World International and Sagala Language translation. All rights reserved.