1 Korin 12
12
Mudu Murubuglo no God kogonmo eraiglmedi noro pere pere edugwa
1Agrama abarama wagle, God siragl mere nono ye kogonmo pere pere eraiglmedi yobuglo norukwa i, ene di tebo, ene pre pogl sinaiglmedi prika.
2Enene pre kan erikwa, ene okna meda meglkwa igne, yoba ene bakagl tedre, god kibi kagno kade tenaiglmedi obuno di teigo, ene obuno di teimere i erikwa. God kibi i kor ta moglkrikwa. Te, ka ama ta dikrikwa ba yoba ene bakagl teigwa pre ene ye sika sidre, god kibi kagno kade teigwa. 3Ene okna yegl erikwa ba erme na ka dinaglka i ta pre pogl sibi, yoba mabuno tau pre ene bakagl tekraiglmedi prika. Yoba ta ere mogl, God Murubuglo ka ta di naruko, diwe di, yegl dinabuka ba ye Jisas di kide yei tenan, ye ka kibi dugwa. Te, yoba ta ere mogl, Jisas na Yaglna Kade moglmiwe dinabuka i, Mudu Murubuglo ye nomane mina kogon erukwa pre dugwa.
4Ana God Murubuglo nono God kogonmo eraiglmedi yobuglo ya nomane noro pere pere edugwa ba ye swara kaima moglkwa. 5Te, nono God kogonmo ere pere pere edumga ba nono Yaglno Kade swara moglkwa. 6Nono kaima yobuglo ya nomane pere pere idre, kogon ere pere pere edumga ba nono pre pogl sinamga i, God swara nono mudu nomane ya yobuglo norukwa.
7Nono mudu swara swarade God kogonmo eraiglmedi God Murubuglo yobuglo norukwa i, nono swara swarade kogon norabere i erumun, akie wakai moramga pre norukwa. 8God Murubuglo ere mogl, yoba tau ye agroma abaroma nomane wakai tenaiglmedi nomane podo togwa. Te, God Murubuglo swara i ere mogl, yoba tau God kamo pre pogl sidre, di nogugl edinaiglmedi nomane togwa. 9Te, God Murubuglo swara i ere mogl, yoba tau God yobuglomo gigledi pre medraiglmedi ersre, te yoba tau ye yoba kide sinaiglkwa i ere wakai eraiglmedi togwa. 10God Murubuglo yegl ersre, yoba tau kimagl eraiglmedi yobuglo tedre, tau God kamo kep ere dinaiglmedi tedre, erukwa. Te, yoba tau yoba ta God kamo dumne digwa i ye pre yubu sinaiglmedi nomane togwa. Yoba God kamo dumne digwa i, God Murubuglo nomane togo, dimo mo Satan nomane togo, dimo mo i, ye yoba tau pre yubu sinaiglmedi nomane togwa. Tedre, ye yoba tau ka pere pere mina ka dinaiglmedi tedre, tau ye ka digwa i prisre, yake tenaiglmedi togwa. 11Kogon kane kane yegl paugwa ba God Murubuglo swara i, ere mogl, yene prumere yoba swara swarade nomane ya yobuglo togo, ye kogon pere pere yegl erikwa.
12Nono ogono nagino siragl mere paugwa i, ene kanigwa. Nono ogono nagino swara paugwa ba ogono nagino swara i mina gumuglno paugo, gumano drano paugo, ogono kaglno ya ki paugo, pere pere paigwa. Ba ogono nagino u swara pi, swara paimere kuno yegl mere, nono Krais yobama munga i, swara kaima munga. 13I siragl pre God ye Murubuglomo nono mudu noruko, God Murubuglo swara i ere mogl, nono mudu ere i Jisas yugobunomo mina suna edugo, munga. Nono Juda yoba munga mo yugobuno pere pere ta meglkwa i ya te, yoba ta kane padre, yoba pere niglno kogono ere teigwa i mo yoba yoko munga i pra, nono mudu u swara pi yugobuno swara kaima munga.
14Na di kodiga, Yoba ogono nagino swara paugwa ba ogono nagino swara i mina gumuglno paugo, gumano drano paugo, ogono kaglno ya ki paugo, pere pere paime diga. 15Yoba ta kagle ere mogl, Na ogo koglmere yegl ta paikrika pre na yoba i ogo nagie ta paikrie dinabuka i, kuno ta erekrabuka. Siragl pre kagle i, ogo nagie mina suna paugwa. 16Mo, ye kina ta ere mogl, Na gumuglo koglmere yegl ta paikrika pre na yoba i ogo nagie ta paikriwe di, yegl ta dinabuka i ama kuno erekrabuka. Siragl pre kina i ama ogo nagie mina suna paugwa. 17Nono kinano ta paikran, gumuglno swara keme panan, siragl mere ka pramne? Mo, nono gumano ta paikran, kinano keme panan, nono taragl demene erabuka i, siragl mere pramne? 18I ta kuno erekrabuka ba God yene wakai prumere ogono nagino pere pere padre, kogon pere pere eraiglmedi beke padigl norukwa. 19Ogono keme panan, kaglno ta paikran, ogono nagino we dinamga kuno erekrukwa. Te, kaglno keme panan, ogono ta paikran, ogono nagino we dinamga ama kuno erekrukwa. 20Yegl paugwa ba ogono nagino mudu paugo, kogono pai pere pere edumere yegl, nono God yobama munga i, God kogon noro pere pere edugwa ba nono yugobuno swara kaima munga.
21Yoba ogono nagino pre ka ebrie diga i, ta ama yegl dinaglka, Yoba gumuglo ta ere mogl, ogo di te, Ene kogonen wakai ta paikrukwa pre na gumuglo swara paibo, kuno erabiwe dinabuka i, kuno ta erekrukwa. Te, ye bre ere mogl, kagle di te, Ene kogonen wakai ta paikrukwa pre na bre swara paibo, kuno erabiwe dinabuka i, ama kuno erekrukwa. Nono ogono nagino mudu paigwa i, kogono wakai keme paugwa. 22Ogono nagino mina bage ta yobuglomo ta paikrumedi pramga ba bage i ta paikran, wakai ta moglkramga. 23Te, ogono nagino bage ta ama kogonmo wakai ta paikrumedi pramga ba nono bage i ama sugl wakai munga. Te, bage tau si bi dinamga pamara i, ama wakai ere si bi didre, wan munga 24ba ogono nagino bage tau si bi dikramga pamara i, si bi dinamga mo i ta pre yubun dekre, wan munga. God nono ogono nagino beke yogwa i, bage tau kogonmo wakai ta paikrumedi pramga i, nono wakai ere, sugl moraiglmedi beke yogwa. 25Ye nono ogono nagino yegl beke yei norukwa i, ogono nagino i, u pere pere pikre, swara padre, ake ple di ikne ikne edidre, kogon akie eraiglmedi beke yei norukwa. 26Te, nono kamga, ogono nagino bage swara ta giugl pran, ogono nagino mudu akie giugl prabuka. Mo, yoba ta ere mogl, nono gumano drano mo ogono nagino bage swara ta wakai kanibi, nono ogono nagino mudu wakai kanigwa mere yegl paugwa pre gun yenamga.
27Ana na ogono nagino pre diga i, yegl pre diga, yoba ogo nagie mina gumuglo paugo, guma dra paugo, ogo kagle paugo, pere pere paigwa ba ye u swara pi, ogo nagie swara pamere kuno yegl, God ene kogon te pere pere edugwa, ba ene mudu u swara pi, Krais ogo nagie mere yegl meglkwa.
28Ana nono God yugobunomo swara munga i, ye nono kogon yegl mere noro pere pere edugwa, ye komono kana yoba tau ye Jisas dedugwa yoba moraiglmedi tedre, okuo yoba tau ye kamo kep yoba moraiglmedi togwa. Te, mokomugl i ama yoba tau ye kamo yoba beke tenaiglmedi kogon togwa. Ye yegl ersre, yoba tau kimagl eraiglmedi tedre, tau yoba kide sinaiglkwa ere wakai ere tenaiglmedi tedre, tau yoba ake ple di tenaiglmedi togwa. Te, ye yoba tau kogon sugl yoba moraiglmedi tedre, tau ka pere pere mina ka dinaiglmedi togwa. 29God kogon noro pere pere edugwa pre ene mudu ta ere mogl, Jisas dedugwa yoba ta moglkraiglkwa. Mo, ene mudu ta ere mogl, God kamo kep yoba ta moglkraiglkwa. Te, ene ama mudu God kamo beke tenaiglkwa yoba ta moglkraiglkwa. Ene yoba tau kogon yegl eraiglkwa ba ene mudu ta erekraiglkwa. Te, ene mudu kimagl eraiglkwa yoba ta moglkraiglkwa. 30Te, ene mudu yoba kide sinaiglkwa i, ta ere wakai ere tenaiglkwa yoba ta moglkraiglkwa. Kuno yegl mere ene mudu ka pere pere mina ka ta dikraiglkwa, te yoba ka pere pere dinaiglkwa i ene mudu ama ta yake tekraiglkwa. 31Ene kogon tau keme wakai kaima pamedi prisre, God Murubuglo yobuglo bogl noran, kogon i keme ersre, kagno kade inamnedi prikwa i, kuno erekrukwa ba ene mabuno siragl mere eribi wakai kaima panabuka i, erme na ene di tebo, praiglkwa.
Attualmente Selezionati:
1 Korin 12: KB
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Copyright 2015 New Tribes Mission