Oknayene Ibo 13
13
Lot ya Abram ede pere pere ebrika
1Ana Abram yogo, ebie yogo, Lot yogo, ye dumo Isip kide kodidre, ede ikne pi, dumo makan Negev we dimara eigwa. Ye aglno buglano ya te, bonaganano mudu idre ede eigwa. 2Abram agl bugla mere kide kuglsre, silva ya gol mere kide kan nedre, erukwa. 3Ana ye dumo Negev kide kodidre, bage bage pai ede pi dumo ta okna Betel ya Ai suna kipaimara ikra ede ikne eigwa. 4Dumo i, Abram okna kobuglo bogl ta kuglkwa. Ana dumo igle eigo, Abram aglke kor Yawe agle di prisre, kamage ere togwa.
5Ana Lot ya Abram akie wan miurka, ba Lot ye ama sipsip ya meme ya kau ki mere kide kuglko, ye yobama ya nigl kogonmo yoba ama mere meglkwa. 6Yegl pre Lot ya Abram dumo makan swara kipabrika kuno erekrukwa. Suo akie taragl mere kide kugl nebrika pre akie miurka i, agl bugla kugl kan nenaiglkwa kuno erekrukwa. 7Te, Abram aglmo buglamo sugl meglkwa yoba ye Lot aglmo buglamo sugl meglkwa yoba bogl kigl nonga digwa. Te, igne i Kenan yoba ya Peres yoba ama dumo i kipai meglkwa. 8Yegl paugwa pre Abram ere mogl, Lot yegl di togwa, Nono bormai swara muglka pre kigl nonga ta dikrabuglka. Te, nono aglno buglano sugl meglkwa yoba ama nonga ta dikraiglkwa paugwa. 9Dumo podo yogwa pre nono yegl erabuglka. Ene ede dumo pere ta en, na ama ede dumo pere ta enaglka. Ene ede ogono wo kra ta en, na ede ogono koda kra enaglka. Te, ene ede ogono koda kra ta en, na ede ogono wo kra enagle di, yegl dugwa.
10Abram yegl dugo, Lot kanugwa, nigl Jordan omara ede pi taun ta Soar we dimara i dumo wai wai yedre, dumo mudu kugl togwa yogwa. Dumo i, Yawe dumo wakaile ere yogwa ikra yomere mere yedre, dumo Isip ama yomere mere yogwa. Dumo i, Yawe taun suo Sodom ya Gomora ere kide erekrukwa igne yegl yogwa. 11Yegl yogwa pre Lot ye nigl Jordan omara dumo wai wai yogwa i wakai kandre, Dumo i kipai moragle dugwa. Dumo i ade umara yogwa pre Lot taraglmo ya yobamo idre, ede pi ade umara ogwa. Ogo, Lot ya Abram ede pere pere pi, kipai miurka. 12Abram dumo Kenan we dimara kipai moglko, Lot dumo wai wai yomara ikra wagle taun tau yeimara dumo bina ta kipai moglsre, okuo ede pi taun i swara ta Sodom we dimara bina sel yugumo kipaugwa. 13Ana yoba Sodom kipaigwa i we, ye yoba kide kaima meglkwa. Ye tadaglme podo kide, Yawe mane dumara erikwa.
Abram ede Hebron ogwa
14Ana Lot ye Abram moglmara kide kodidre, ede pi kodugwa igne, Yawe ere mogl, Abram yegl di togwa, Ene we, ene igle mogl, kan ade umara kra ede, beimara kra ede, nigl bre kra ede, nigl beye kra ede, ero! 15Ene dumo makan mudu kanga i we, na ene ya ene gawanma mudu tenaglka. Tebo, ene makano aimadi kamun yenabuka. 16Te, na ama ene gawanma pi kaugl mere yegl, mere kide moraiglmedi ere edenaglka. Ere edibo, meglbi, yoba ene gawanma kerenaiglkwa kuno erekrabuka. Pi kaugl kerenaiglkwa kuno erekrabere yegl mere kuno erekrabuka. 17Ana erme we, na agai dumo koglo koglo yogwa ene tenaglka pre ene ade umara kra ya beimara kra pidre, nigl bre ya nigl beye kra pidre, dumo mudu kano! di, Yawe yegl di togwa.
18Yawe ka yegl di kodugo, Abram ere mogl, sel yugumo terke i ede pi dumo ta Hebron we dimara pidre, kipaugwa. Ye kipamara, ede ok tau paigwa, yagl ta kagie Mamre we digwa edemo paigwa. Abram kipadre, kobuglo bogl ta kugl, Yawe tawa tenagledi ere yogwa.
Attualmente Selezionati:
Oknayene Ibo 13: KB
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Copyright 2015 New Tribes Mission