Matyu 2
2
Yagl kade tau Jisas kanamnedi wigwa
1Ana yagl ta kagie Herot we digwa i king moglkwa igne, Maria ere mogl, distrik Judia suna, dumo kebra Betlehem we dimara i, Jisas kuglkwa. Igne i, Yagl tau ade umara nem bitno podo paugo, kugl kuri kandre, nomane igwa yoba meglkwa i, ede Jerusalem udre, ye yoba tau yegl di prikwa, 2Gak ta mam erme gak kuglkwa Juda yoba kingno moglkwa i aglo moglme? digwa. No ade umara kra munga igne, kugl kuri kor ta plau dugwa kandre, ye moglmedi diu pamedi pre, ye kagie kade tenamnedi umniwe di, yegl digwa. 3Yagl kade wagle i kira yegl pogl pre wan meglko, yoba tau ye ka digwa i prisre, king Herot di teigwa. Di teigo, Herot prisre, nomane podo sugwa. Ye nomane sugo, yoba mudu Jerusalem kipai meglkwa i ama nomane sigwa. 4Ana Herot nomane sidre, ye tawa teigwa yoba bitno meglkwa i ya God lomo beke teigwa yoba di makai sidre, kira yegl poglkwa, God Kere Yugwa Yagle Krais unabe digwa i, mam ye dumo aglo kurabe dime? di, yegl dugwa. 5Yegl dugo, ye di ikne ede te, yegl digwa, Ye mam dumo kebra Betlehem, distrik Judia suna i kurabe digwa. I siragl pre ka kep yoba ta yegl boglkwa,
6Dumo Betlehem we digwa, distrik Judia suna yogwa i, kagie paugwa. Dumo tau Judia suna ama kagno paigwa ba dumo Betlehem kagie kade paugwa. I siragl pre dumo i mina Yagl Kade ta udre, yoba sipsip sugl meglmere mere na yobanama Israel yoba sugl morabiwe#2.6 Maika 5.2-4
di, ka kep yoba yegl dumiwe di, di ikne ede teigwa.
7Di ikne ede Herot di teigo, Herot yagl ade umara kra mogl wigwa ikra yene pere ekrike mogl, ka di pramnedi agle dugo, wigwa. Wigo, Herot ye kugl kuri pre digwa i aunake plau dumedi kira pogl prukwa. 8Kira pogl prisre, yagl wagle i ede dumo Betlehem enaiglmedi dedidre, ye yegl di togwa, Ene ede pi gak kebra i, wakai ere doko kanio! Ene doko kandre, na moglmara u, ye aglo moglkwa i di naraiglkwa. Ene ede ikne u, di naribi, na ama pi, ye kagie kade tenaglka pre diwe di, yegl dugwa.
9-10 Ana yagl kade wagle i king kamo prisre, ede eigwa. Ye pi moglsre, kugl kuri ta ye okna ade umara kra moglsre, kanigwa ikra aglke kor kandre, gun podo kide kaima yeigwa. Gun podo kide kaima yeigo, kugl kuri i ede okna pidre, gak kebra pai moglmara mitna ibo pi pai moglkwa. 11Pai moglko, yagl wagle i ede yugugl pi, yagl gak mam Maria bogl miurko, kanigwa. Kandre, ye yage goglkono bodugl, bitno i pi makan mina yedre, yagl gak Jisas kagie kade teigwa. Kagie kade tedre, ye taragl mige podo boglkwa tau gre yuigwa i, i meda edidre, ye teigwa. Ye taragl tau teigwa i, gol ya ede suo nuglo demene wakai erukwa teigwa. Ede nuglo ta, kagie frankinsens we digwa. Te, ta, kagie myr we digwa. 12Ana ye taragl i Jisas tedre, ye ede ikne Herot moglmara pikre, konbo pere ta mina ede ikne yugunomugl eigwa. God okna ugl kubu mina ye di te, Ede ikne Herot moglmara pikrio! dugwa pre yegl erikwa.
Josep ebie Maria ya Jisas bogl ede kantri Isip eigwa
13Ana yagl wagle ikra ede eigo, Josep ugl pai, ugl kubu ta kanugwa. Ye ugl kubu kanumara, Yagl Kade angelomo ta ye moglmara udre, Josep di te, Ene adiglo! dugwa. Adiglsre, gak kebra i mam bogl idre, teke ede pi kantri Isip pio! dugwa. Ene dumo Isip pi pai meglbi, na okuo ene di tebo, aglke ede ikne unaiglkwa. I siragl pre, king Herot yagl gak Jisas si goragledi dokinabiwe di, angelo yegl dugwa. 14Angelo yegl dugwa pre Josep eduer suna adiglsre, gak kebra Jisas mam bogl ede dumo Isip enamnedi agre i ede ogwa. 15Agre ede ogo, dumo Isip mogl pai meglko, Herot okuo goglkwa. Josep ya Maria ye Jisas bogl ede dumo Isip pi meglkwa i, ka kep yagl ta okna Yagl Kade dra idre, dugwa i, igne i pai yugwa. Yagl Kade yegl dugwa,
Na wana agle digo, ye dumo Isip kide kodidre, umiwe#2.15 Hosea 11.1
dugwa.
Herot yobama dedugo, ye yagl gak mere si geglkwa
16Ana yagl wagle kugl kuri kandre, nomane igwa yoba ikra ye ede ikne Herot moglmara pikrikwa pre Herot pre kan erukwa i, yoba i na bakagl narimedi prisre, ye dem podo kubro, yobamo dedugo, ye dumo Betlehem suna ya bina kipaimara i, pidre, yagl gak bugla yugu suo ne ede atne wigwa i mudu si geglkwa. I siragl pre ye okna kugl kuri aunake plau dume digwa egemo i pre moglsre, Jisas bugla yugu suo mere nomedi pre pogl sugwa. 17Ye yegl erimara i, ka kep yoba okna moglkwa, kagie Jeremaia we digwa i, ye okna God kamo kep ere boglkwa i pai yugwa.
18Ye yegl boglkwa,
Dumo Rama we dimara i, abu kai podo ersre, kai giglage sigo, yoba primiwa. Abu wagle i, Resel gawama meglmiwa. Ye gagroma mitno goglsre, kai eriko, yoba ka tau ye deno muduno aragan erabedi digwa ba gagroma moglkrikwa pre prikrimiwe#2.18 Jeremaia 31.15
di, Jeremaia okna yegl dugo, ye yagl gak si geglmara i plau dugwa.
Josep ebie Maria ya Jisas bogl ede ikne dumo Israel eigwa
19Ana okuo king Herot goglko, Josep dumo Isip mogl, ugl kubu ta kanumara i, Yagl Kade angelomo ugl kubu mina plau didre, Josep yegl di togwa, 20Ene adiglsre, yagl gak ye mam bogl idre, aglke ede ikne dumo Israel enaiglmiwe dugwa. Yoba okna yagl gak Jisas doko, si goramnedi erikwa i mudu geglkwa pre die, dugwa. 21Yegl dugwa pre Josep adiglsre, yagl gak ye mam bogl auro i ede ikne pi dumo Israel ogwa. 22Ogwa ba Herot wam Arkelaus ye nem agaimo idre, distrik Judia sugl moglmiwe digo, Josep prukwa. Prisre, ye ede ikne distrik Judia enabuka i, kudugl goglkwa. Kudugl goglko, God aglke kor ye ugl kubu ta kanumara u distrik Judia pikrabedi ka giglede di togo, ye ede distrik Galili pidre, 23dumo kebra Nasaret we dimara kipai meglkwa. Ka kep yoba ka okna di padiglkwa i, Ye we, dumo Nasaret nem ta moglme dinaiglmiwe digwa i, ka i pai inabedi God nomane togwa.
Attualmente Selezionati:
Matyu 2: KB
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Copyright 2015 New Tribes Mission