संत.जोहन 1
1
वचन होड़ो बनाव नेना
1पहिल रे सबद ताहिनेना आउर सबद परमेसर लोः ताहिनेना, तेकर सबद परमेसर ताहिनेना। 2होना पहिल रे परमेसर लोः साँघे ताहिनेना। 3जामा जिनीस हिनी तरअः सिरीजाव नेना आउर जे होः सिरजाव ताना होना मेसे जहान जिनीस होः हुनी बेगर का सिरजाव ताना। 4होना रे जिनगी ताहिनेना, आउर होना जीव मनवाकु आला मरसल ताहिनेना। 5होना मरसल अंधार रे चमकाआ आउर अंधार होना के काय जीताव दाड़ी नेना। 6#सं.मत्ती 3:1; सं.मर 1:4; सं.लुका 3:1,2मियांड होड़ परमेसर पखा तरअः हीःग नेनाय, जेकर नुमू जोहन ताही नेना। 7हुनी गोवाही रअः भेस रे हीःग नेनाय जेकर से हुनी मरसल रअः बारे रे गोवाही ऐमे, आउर जामा होड़ हुनी दोवासते बिसवासेकु। 8हुनी आएंग खुदे मरसल काय ताहिनेना, बकिर होना मरसल रेनअः गोवाही एमोअ लःअय हीःग ताही नेनाय। 9बचन सचे मरसल ताहिनेना जे जामे मनवा के मरसल कुआय। होना दुनिया रे हिजोअ केना। 10हुनी दुनिया रे ताही नेनाय, दुनिया हुनी तरअः सिरजाव नेना बकिर दुनिया हुनी के काय चिनहा लिया। 11हुनी अपन होड़कु दुबाःड़े हीःग नेनाय, बकिर हुनी आलकु अपन होड़ हुनी के काकु अपनाव लिदया। 12बकिर जेतना कु हुनी के अपनाव लियाकु आउर जे हुनी आला नुमू रे बिसवासे-आकु हुंकू जामा के परमेसर आलकु होपोन बनाअः लःअय हक एमा लिकुआय। 13हुंकू ना दो मयोम तरअः आउर ना होड़ो रेनअः मरजी तरअः ना मनवा आला मरजी तरअः बकिर परमेसर तरअः सिरजाव तनाकु। 14बचन होड़ो भेस पाड़ी केते दया तेकर सचाई तरअः पेरेःग केते आबु ताला रे डेरा लःअय। तेकर आले हुनी आला नोकान महिमा नेल लआले। जे लकान आपा आली रनगोटा होपोन आला महिमा। 15जोहन हकाव-हकाव हुनी आला बारे रे नोःआँ गोवाही एम लःअय, “नुई हिनी हेके, जेकर बारे ईङ कंहड़ी लाईङ जे ईङ तयोम हिजोअ वाला एदानिया, हुनी ईङ तरअः बाईढ़ केते एदानिया, एता लःअय ची हुनी ईङ तरअः पहिल हाजीर ताही नेनाय।” 16हुनी आला भरपुर तरअः आबु जामा के दया तेंग रे दया भेटाव ताना। 17मुसा आला कनहुन दो मुसा पखा तरअः एम लअः एदनाआ बकिर दया आउर सचाई ईसु ख्रीस्त दोवासते भेटाव ताना। 18ओके होः ओका हिला होः परमेसर के काकु नेल तदिया, आपा आला कोयोङ रे ताहिनोः वाला रनगोटा होपोन, हिनी हुनी के दिसतार तदियाय।
बतिस्मा एमोई जोहन आला गोवाही
(संत.मत्ती 3:1–12; संत.मरकुस 1:1–8; संत.लुकास 3:1–9,15–17)
19जोहन आला गोवाही नोःआँ हेके ची जब जाहुदीकु जिरोसलेम तरअः पुरोहितकु आउर लेवीकु के जोहन दुबाःड़े “आम ओके हेके?” मेन केते कुकुली कुलगोःड लिकुआकु, 20दो हुनी नोःआँ गोवाही एम लःअय तेकर सफा-सफा जबान रे “ईङ ख्रीस्त नलागे” के मनाव नेनाय। 21#मला 4:5; कन 18:15,18तब हुंकू हुनी के कुली लियाकु, “दो फिन आम ओके हेके? एतान आम इलियस हेके?” हुनी “ईङ नलागे” बेता लिकुआय, दो आम हुनी हिजोई वाला आगमजानी हेके एतान? हुनी ईङ नलागे मेन केते उतारा एमा लिकुआय। 22तब हुंकू हुनी के बेता लियाकु “दो आम ओके हेके? जे आले के कुलगोःड तदलेआकु के एतान जबाप एमा कुआले? आम अपन बारे एतान में कंहड़ीःदा?”
23 #
जसा 40:3
हुनी हुंकू के बेता लिकुआय,
“ईङ ‘टुंगरी रे हा-हकावी आला गूल हेके,
जे हकायाय ची परभु आला होरा के सोझेपे।’
नोःआँ बारे रे आगमजानी इसायस कंहड़ी तदाय हिनी हेके।”
24नुकू फरीसीकु पखा तरअः कुलगोःड लिनकु ताही नेनाकु। 25हुंकू हुनी के कुली लियाकु, “जदि आम ना दो ख्रीस्त हेके, ना इलियस हेके आउर ना आगमजानी हेके, दो बतिस्मा एतान लःअय एमा कुआम?” 26जोहन हुंकू के उतारा एमा लिकुआय “ईङ दो दाअः तरअः बतिस्मा एमा कुईंग। आपे ताला रे मियांड एदानिया जेके आपे कापे पाड़ीआ 27ईङ तरअः तयोम हिजोई एदानिया, ईङ हुनी आला खड़पा रेनअः फिता राराड़ा लकान होः कनिङा” 28नोःआँ जामा बात जरदन नाई रअः होना पखी बैथनिया सहर रे हुयाव नेना, जे एड़े जोहन बतिस्मा एमा कु केनाय।
ईसु परमेसर आली भेंड़ा
29दोसरा हिला जोहन ईसु के आएंग पखा हिजोअ नेल केते कंहड़ी लःअय, “नेलीपे नुई परमेसर आली भेंड़ा#1:29 परमेसर आली भेंड़ा पाप तरअः छमा ना-नाम लःअय भेंड़ा एमोअ जाहुदीकु आला दसतुर ताही नेना। जामा तरअः बढ़ियाँ भेंड़ा के पुजा रका:ब कु केनाकु। हेके जे दुनिया रेनअः पाप के उठायाय। 30नुई हिनी हेके, जेकर बारे ईङ कंहड़ी थिलिईंग, ‘ईङ तरअः तयोम मियांड हेरेल हिजोई एदानिया, हुनी ईङ तरअः बाईढ़ केते एदानिया एता लःअय ची हुनी ईङ तरअः पहिल रे गी ताही नेनाय।’ 31ईङ होः हुनी के काईंग पाड़ी केना, बकिर ईङ निआँ लःअय दाअः तरअः बतिस्मा एमोअ हीःग तानिङ ची हुनी इसराइल रे दिसतार जुनोआय।” 32फिन जोहन नोःआँ गोवाही एम लःअय, ची “ईङ पबितर आतमा के पेरवाँ आला भेस रे सिरमा तरअः अड़गुन, तेकर हुनी तेंग रे तिंगुन नेल लियीङ। 33ईङ होः काईंग पाड़ी केना, बकिर जे ईङ के दाअः तरअः बतिस्मा एमोअ लःअय कुलगोःड लिङाय, ‘हिनी ईङ के जेकर तेंग रे पबितर आतमा के अड़गुन तेकर तिंगुन नेलीयाम, हिनी पबितर आतमा तरअः बतिस्मा एमोई हेके’ बेता ताही लिङाय। 34तेकर ईङ नेल लाईङ”, आउर “निई परमेसर आली होपोन हेके” मेन केते गोवाही एम लाईङ।
ईसु आलकिन पहिला चेला
35दोसरा हिला बतिस्मा एमोई जोहन फिन आएंग आलकिन बारहोड़ चेला ताय लोः हिनाःड़े ताही नेनाय। 36हुनी ईसु के सेनोः नेल लियाय तेकर “नेलीपे परमेसर आली भेंड़ा हेके” कंहड़ी लःअय।
37हुंकिन बनार चेला जोहन आला बात के आयुम केते ईसु के ओतोङ लियाकिन। 38ईसु लुड़ीःग चुवेर केते हुंकिन के आएंग तयोम हिजोअ नेल लिकिनाय आउर बेता लिकिनाय, तेकर “आबेन एतान नाम ताना बेन?”
हुंकिन कंहड़ी रूवाड़ोः लियाकिन “हे रबबी चाहे हे गुरू आम ओकाःड़े ताही नोआम?”
39हुनी हुंकिन के बेता लिकनाय “एला तेकर नेलेबेन” आउर हुंकिन सेन नेनाकिन, तेकर हुनी आला ताहिनोअ रअः ठाँव के नेल लआकिन, आउर हेन हिला हुनी लोः ताही नेनाकिन नोःआँ करीब-करीब आयुःब साँझ चाईर बजे लकान ताही नेना। 40जे जोहन आला बात आयुम केते ईसु के ओतोङ थिलयाकिन हुंकिन बनाहोड़ रे मियांड सिमोन पतरस आली बोको अंध्रियस ताही नेनाय। 41हुनी निदवारे अपन बोको सिमोन लोः भेटाव केते हुनी के बेता लियाय “आलांग के ख्रीस्त#1:41 ख्रीस्त ख्रीस्त रअः माने परमेसर आला करार लअः छुटकानी एमोई। माने कि मसी भेटाव नाय।” 42तेकर हुनी के ईसु दुबाःड़े आगु लियाय हुनी के नेल केते बेता लियाय “आम जोहन आली होपोन सिमोन हेके! आम कैफा माने कि पतरस कहलाव कोआम।”
फिलिपुस तेकर नतनएल के रा-राअः
43दोसरा हिला ईसु गलील सेनोः नाम नेनाय, हुनी फिलिप्पी के नाम लियाय, तेकर हुनी के “ईङ के ओतोङिङ में” बेता लियाय। 44फिलिप्पी होः, अंध्रियस आउर पतरस भेड़ा आला सहर बैतसैदा रिनी ताही नेनाय। 45फिलिप्पी नतनएल लोः भेटाव नेनाय तेकर बेता लियाय “मुसा आला कनहुन रे तेकर आगमजानीकु जेकर बारे लिखा तदाकु, हुनी आले के भेटाव नाय, हुनी जोसेफ आली होपोन ईसु नासरत रिनी हेके।” 46नतनएल हुनी के बेता लियाय “नासरत तरअः होः जहान बेस जिनीस हीःग सकाआ एतान?”
फिलिप्पी बेता लियाय “एला तेकर अपन-हारते नेल केमे।”
47ईसु नतनएल के अपन पखा हिजोअ नेल केते हुनी बारे कंहड़ी लःअय “नेलीपे नुई सथेगी इसराइली हेके नुई रे हिसंगा डाह कनोअ गीआ।” 48नतनएल हुनी के बेता लियाय “आम ईङ के एता लकान पाड़ी आम?” तेकर ईसु कंहड़ी रूवाड़ोअ लियाय, “नोःआँ तरअः पहिल ची फिलिप्पुस आम के राअः लेमेआय, जे बेरा आम अंजीर सिंङ लतार रे ताही नेनाम हिमीन रे ईङ आम के नेल थिलमिईंग।” 49नतनएल हुनी के बेता लियाय “हे गुरू आम परमेसर आली होपोन हेके, आम इसराइल रिनी राजा हेके।” 50ईसु हुनी के कंहड़ी रूवाड़ोअ लियाय “ईङ आम के अंजीर सिंङ लतार रे नेल थिलमिईंग बेता लिमीईंग लःअय निआँ चलते आम बिसवासे-आम एतान? आम नोःआँ तरअः सेंड़ा-सेंड़ा काम नेल केआम।” 51#एहेः 28:12फिन ईसु हुनी के बेता लियाय “ईङ आम के सचे-सचे बेताअः दिमीईंग आम सिरमा के उघड़ाव ओना, तेकर परमेसर आलकु सिरमादूत के मनवा होपोन रअः तेंग रे अड़गुनते रकाबोःते नेल किकुआम।”
Attualmente Selezionati:
संत.जोहन 1: ASR
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2023 NLCI CC BY-NC-ND 4.0