Ap.Lh 5
5
Ananías lhäy'e Safira fwetaj ifwech'enlhi Dios
1Mat iche elh tä lhey Ananías, lhäy'e lech'efwa tä lhey Safira, hin'otso iwom laka honhat. 2Wet lhamel y'ajwek letichunhayaj tä iwoye tä iskat lhip laha, wet tachuma lhip elh wet yachaje apóstoles yämthilek lhamel itetshan m'ak chik iwoyeje. 3Mat Pedro tahuyej hin'o tä yok:
–Ananías, ¿chipte tä letach'anlhaye Satanás tä tiyäjo ahusek wet leskat lhip chinaj t'äj, wet ne'tek lefwech'enlhi häp Espíritu tä Dios T'amajchet tä lefwetaj nilhok t'at chinaj t'äj tä aka honhat laha tä lew'en n'ohohen? ¿Mat chipte? 4Tsi tä kamaj kawoma honhattso, alewuk t'at, wet tä äp lewom, alewuk t'at chinaj t'äj tä laha. Tä mälhyejtso, ¿chipte tä lefwetaj lewoynejetso m'ak tä lewoye? Oyok, häpkhit'a hin'ol tä lefwech'enwethä, mat lefwetaj lefwech'enlhi häp Dios.
5Tä Ananías iläte, nichät katsi wet y'il. Wet nilhokej wichi tä ihanch'oye wuj tä lenowayhyaj ihi. 6Nämhen mamses wet ikäfwelche lep'itsek, wet yikchufwi tä tajänch'oye.
7Tä paj tä tajyäme tres horas, nech'e näm lech'efwa, mat ihanhiyejt'a m'ak wit'äytso. 8Pedro tay'ätshane tä yok:
–Lhek fwel n'oho, ¿hä matche tä mälhyejn'ajtso laha häp amel aka honhat tä lewomay?
Lham nichulho wet yok:
–Matche, lahanaj t'at täjtso.
9Wet Pedro yok:
–¿Chipte tä am lhäy'e hach'efwa lefwetajay lhelhte häp Lhawuk laka Espíritu? Nech'efwaj tä nämhen lhamel tä yikmatchufwi hach'efwa p'itsek tä tajänch'oye, wet athana häte yikhilachufwi häp am hap'itsek.
10Häpet tä iwoyetso, atsinha nichätwhäye lepach'ol wet y'il. Tä mamses tiyäjchufwi hup, hiw'en lep'itsek, wet äp yikchufwi wet itiwhäye lech'efwa lep'itsek tä tajänch'oye. 11Wet nilhokej Dios leles wuj tä lenowayhyaj ihi, lhäy'e nilhokej wichi iyhäj tä ihanch'oye m'ak wit'äyhyajtso.
N'otetnhay lhäy'e m'ayhay tä iselkat wichi
12Wujpe n'otetnhay tä apóstoles yenlhi, lhäy'e m'ayhay tä wichi t'iseltejen. Lhamel lhaihutpejwek tä ihi Pórtico de Salomón, 13wet wichi lhäy'e lhip tä iwujyen, mat ihichet'a elh chik tektshane yämthilek lhay'aje lhamel. 14Mat iche iyhäj tä itiyej lechayaj Lhawuk, hin'ol lhäy'e atsinhay, wet lhäy'e lhip tä wujpe lhamel tä Dios leles. 15Wet wichi tachumapej häp t'inhayaj länhay, wet iti'pe lemäwetes lhäy'e lehowetes wet itihiche hup kawayhil. Tsi lhamel yok:
–Chik Pedro nekhichela täja, tejlak lepeyak chik i'pe elh chik häpe, ichesla.
16Häte nämhenpej wuj wichi tä tälhe lew'etes tä tott'aye Jerusalén. Lhamel ichäj t'inhayaj länhay lhäy'e iyhäj tä ahät länhay, wet nilhokej lhamel ichesen.
Niyatey itiyej laka'tshayaj apóstoles
17Tä Sacerdote tä Lhamya ihanch'oye tähestso, wet wuj tä t'ischenyaj ihi, lhäy'e Saduceo lhayis tä iyej. 18Tä mälhyejtso, lhamel ne'tek õ'tsokwethä apóstoles wet õ'thatho n'op'onthi. 19Mat tä honatsi näm ángel tä tälhe Lhawuk, wet ifwoyenche n'op'onthi lepelis wet inuhatphä lhamel. Wet ifwenhomche tä yok:
20–Mähen, hoye Dios Lew'et wet kastejphäla chik lefwenhomche wichi m'ak tä häpe häp n'ow'atshancheyaj tä nech'ayek tä tälhe Jesucristo.#Juan 11.25; 14.6; Rom 6.4
21Tä mälhyejtso, tä nech'e fwamlafwaj lhamel ihoye t'at Dios Lew'et wet iwo tesa tä iwo lechufwenyaja.
Wet Sacerdote tä Lhamya lhäy'e lech'otfwas ihutwek nilhokej Concilio tä Lhamya, wok oyok, Judío lhayis tä thänhäy, wet ne'tek sip'äl yike apóstoles tä ihi n'op'onthi. 22Mat tä lhamel nichäte n'op'onthi, hiw'enhit'a. Wet tapile niyatey wet iwo silätayej lhamel tä yok:
23–Iwuhuy, tä olhamel onchäte n'op'onthi, wet ow'en tä t'unhiche t'at lepelis, wet sip'äl tä t'uye iyej t'at. Mat tä ofwoyenche, ow'enhit'a elh chik ilech'oye.
24Tä Sacerdote tä Lhamya iläte, lhäy'e häp hin'o tä niyatej sip'äl tä t'uye Dios Lew'et, lhäy'e sacerdotes tä len'ohyajay ihiche, lhamel tay'ätshan lhamehen tä yok:
–Chik mälhyej'attso, ¿atsihila ifwala chik nofwila m'ayhay tä mälhyejenna?
25Mat nech'e näm häp hin'o elh, wet ifwenho lhamel wet yok:
–Lhek yahinya, häp hin'olnaj amel lene'tek õhp'ohiche, ihi t'at Dios Lew'et wet ichufwenhen wichi.
26Tä mälhyejtso, sip'äl lhäy'e laka niyat lhamel yike apóstoles. Mat tek wo m'ak chik iwoyeje, tsi nowayek wichi ithatejwethä tuntey häp lhamel. 27Wet ichäje Concilio, wet Sacerdote tä Lhamya tahuyejen tä yok:
28–Olhamel on'äyejnaj amhohen tä lewo lheya Jesús tä lechufwenhen wichi. ¿Mat atsi m'ak tä lewoye? Tsi athana achufwenyaj tapoyej Jerusalén, wet äp let'isej tä lhäme tä olhamel t'at tä otes hin'otso t'ilek.
29Mat Pedro lhäy'e iyhäj apóstoles lhamel yok:
–Lhek yahinya, iwohiyet'ak n'am woye Dios lhämtes, mat owohiyet'a hin'ol lhämtes.#Ap.Lh 4.19 30Häpe t'at n'amel lhatetsel laka Dios tä inuhatphä Jesús tä tälho n'op'itseyhay, häp hin'onaj amel lene'tayek õ'län tä õ'fwuhatlhi tä ihi cruz. 31Wet tä inuhatphä, äp ineyhatphä wet itihi lefwomkat, yen häpeya Niyat tä Lhamya wet N'ofwayhthi, yämthilek Israel lhayis iwo lehusey iyhäja wet tatäy lech'isukyajay. 32Olhamel ohanej tähestso wet oyäme t'at. Wet häte Espíritu tä Dios T'amajchet tä lham hiw'enhomche wichi tä iwoye lhämtes, häp tä äp yäme.
Gamaliel lhämet
33Tä Concilio iläte täjtso, wet lewäk ihi lhamel wet t'uhläk ilänhen apóstoles. 34Mat iche häp Fariseo tä lhey Gamaliel tä iyej niyateytso, lham häpe t'at elh hin'ol tä lhayen lewosayej Ley p'ante tälhe Moisés, wet nilhokej wichi wuj tä yen hin'oya. Lham takasit wet yok:
–Hänay ayej alhoye häp hin'oltsi.
35Wet nech'e tahuyej leniyatfwas wet yok:
–Yaiyhäj tä ahäpehen Israel leles, is chik lenowaye häp m'ak tä lefwetaj lewoyeje hin'oltso. 36Tichunche ifwalaste hin'o tä lhey Teudas, lham lhain'älit tä inu'pe iyhäj, wet iche cuatrocientos (400) hin'ol tä ihänlhi. Mat ilepese õ'län, wet nilhokej lhamel ifwtsatpehen honhat wet noj t'at. 37Wet äp ifwalaste õ'wo t'ufwahtesa wichi, n'äl Galilea lhele tä lhey Judas, lham häte ikalhi iyhäj yämthilek ihänlhi. Mat äp õ'län, wet nilhokej lhamel ifwtsatpehen honhat. 38Häp tä tamenej tä ofwen amhohen tä oyok, Leyayej häp hin'oltso, ch'anlhaye t'at. Tsi chik m'ak tä lhamel iwoye tälhe hin'ol, nofwila. 39Mat chik tälhe Dios, tek lekalhihila. Uyayhlä, tsi elat letatayhlä Dios.
Tä iyhäj iläte Gamaliel lhämettso, iwoye t'at. 40Tä mälhyejtso, t'äne häp apóstoles wet ne'tek õ'tasinwethä. Wet äp ifwenhomche tä yok:
–Yej lhachajo tä lewo lheya Jesús tä lhämhoplhi wichi.
Wet ilanche lhamel. 41Wet lhamel yikch'oye niyatey, mat lakäjyaj ihi tä Dios tach'anlhaye tä Jesús lhey tamenej tä õyen w'et m'ayhaya.#Mat 5.11-12; Rom 5.3; 2~Cor 6.10; Sant 1.2; 1~Ped 4.13-16 42Wet nilhokej ifwalas lhamel ilehiyejt'a tä iwo lechufwenyaja tä ihi Dios Lew'et lhäy'e lhamel lew'etes, wet iwopej silätayej wichi tä Jesús häpe t'at N'ofwayhthi tä Dios Chenek.
Attualmente Selezionati:
Ap.Lh 5: WCHB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Biblia Wichí, Dios Lhämtes tä Matchehen © Sociedad Bíblica Argentina, 2002.