Juan 3
3
Nicodemo ihoye Jesús tä honatsi
1Iche p'ante Fariseo lhayis elh tä lhey Nicodemo, lham häpe t'at hin'o tä Judío lhayis wuj tä yen hin'oya tä iyej häp lhamel. 2Lham ihoye Jesús tä honatsi p'ante, wet tahuyej wet yok:
–Maestro, olhamel ohanej tä Dios t'at tä aichen n'oyehen yämlek lewo achufwenyaja. Tsi ihichet'a elh chik häpe chik ihanej iwoyneje chik yenlhi letetnhay mälhyej tä am lhenlhi, tajlhamat chik Dios iyej.
3Jesús nichulho wet yok:
–Matche, matche tä ofwel amho, Ihichet'a elh chik häpe chik ihanej iwoyneje chik hiw'enpe Dios Niyatyaj, tajlhamat chik äp yachajo tä nech'e iche.
4Tä Nicodemo iläte täjtso, wet yok:
–¿Chip iwoye elh tä thaläkw chik äp yachajo yämlek äp nech'e iche? ¿Hä ihanej lhaiwoyneje chik yäpnho lako kachowej häpkhilek nech'e äp iche?
5Jesús nichulho wet yok:
–Matche, matche tä ofwel amho, Ihichet'a elh chik häpe chik ihanej iwoyneje chik tiyäjo Dios Niyatyaj, tajlhamat chik nech'ayekej inät lhäy'e Espíritu tä Dios T'amajchet. 6Häp m'ak tä tälho lako lhäy'e lajcha t'isan, hin'o t'at. Mat häp m'ak tä nech'ayekej Dios laka Espíritu, espíritu t'at. 7Yej seltej tä ofwel amho tä oyok, “Nilhokej wichi iwohiyet'ak lhaknachajaho tä nech'e ichehen.”#1~Ped 1.3,23 8Häp yafwthitaj, honhat chik inukwe, inukwe t'at. Tej tä leläte lepak, mat lehanhiyejt'a lhip tä tälhe wok lhip tä tataye. Wet elh chik häpek nech'ayekej Espíritu tä Dios T'amajchet mälhyej'attso.
9Nicodemo yachajo tä tay'ätshane wet äp yok:
–¿Chip iwoye täjtso?
10Jesús yok:
–Häp am tä ahäpe Israel lhayis lechufwenyaj lewo, ¿hä lehanhiyejt'a m'ayhayna? 11Matche, matche tä ofwel amho, Olhamel oyäme t'at m'ak tä ohanej, wet oyen silätyaja m'ak tä ow'en. Matkat amel tek lematitche olhämtes. 12Tä oyäme m'ayhay tä ihonhatena, wet lekachuyay. Wet chik oyäme m'ayhay tä ipuleye, ¿chip iwoye chik lhoyayhlak, “Matche”?
13“Ihichet'a elh chik tiyäjo pule, tajlhamat elh tä tälho, wok oyok, häp Hin'o Lhäs. 14Mälhyej täjp'ante Moisés ineyhatphä amlhätaj tä Israel lhayis ihi p'ante honhat tä ts'anis,#Núm 21.9 häte mälhhiyejattso Hin'o Lhäs iwohiyet'ak õknineyhtaphä, 15häpkhilek elh chik häpe tä ichaye, ikatej lew'atshancheyaj tä t'un.”
Dios wuj tä ihumnhen wichi tä i'pe honhat
16Tsi Dios wuj tä ihumnhen wichi tä i'pe honhat, wet hiw'enho Lhäs tä weihalha, häpkhilek elh at chik häpe chik t'ekhaye, tatäyhit'ala, mat ikatej lew'atshancheyaj tä t'un. 17Tsi tä Dios ichen honhatena häp Lhäs, t'uhläk ifwayhthen wichi, häpkhit'ak itiyej letes.
18Elh chik häpe chik t'ekhaye Dios Lhäs, tek õ'tiyej letes. Mat elh chik nit'ekhayaye, pajche kalelhäj tä õ'tiyej letes, tsi häp tä nit'ekhayaye Dios Lhäs tä weihalha. 19Wet lhamelna pajche kalelhäj tä letes ihi, tsi iwoye t'at m'ayhay tä ni'isachehen, wet tä isi näm honhatena, lhamel ihuminhit'a mat iwo yiya honataj. 20Elh chik häpe chik iwoyepej m'ak tä ni'isa n'äyiho isi wet tek t'uhläk lhaitott'ayne, tsi nowaype chik n'älpe häp m'ak tä iwoye. 21Mat häp elh tä iwoyepej m'ak tä matche nowayhiyet'a, mat ihoye t'at isi yämthilek n'äl tä iwoye t'at m'ak tä Dios lenech'ethayaj.
Juan Bautista iwujyen Jesús
22Tä tajyäme täjtso, Jesús lhäy'e lechufwenkay lhamel ihoye honhat tä Judea, wet ihi ayej wet lham ibautisaynhen wichi. 23Wet Juan ihi lhip tä lhey Enón tä tott'aho Salim, wet wichi ihoye wet lham ibautisaynhen, tsi häp lhiptso wuj inät tä ihi. 24Ifwalastso häpe t'at lewhäy p'ante tä kamaj õknithataho n'op'onthi häp Juan.#Luc 3.19-20
25Wet iche p'ante Judío lhayis elh lhäy'e elhpej Juan lechufwenkay, lhamel inahutpe häp lakey tä ne'tek Judío lhayis ilej lhamchehen tä letetnek tä lhayen t'amajchetesa. 26Wet lechufwenkay yikhen tä ifwenho Juan wet yok:
–Maestro, häp hin'onaj i'amej kanhi Jordán lhip tä hichämtso, häp hin'onaj lhen ämeta, lhek yahinya, athana lham ibautisaynhen wichi, nilhokej lhamel ihoye.
27Juan nichulho wet yok:
–Elh chik häpe niwohit m'ak chik iyej, tajlhamat chik Dios hiw'enho. 28Amel lelätaynaj n'oye tä oyok, “Ohäpkhit'a N'ofwayhthi tä Dios Chenek.#Juan 1.20 Tajlhamat tä ohäpe Dios chenek tä ichunch'oye häp lham.” 29Wet oyok, lhek tetshan wichi tä tawhayeyhen. Häp elh tä iti lhamej atsinha tä ihiyeja, häpe t'at hin'o tä kalelhäj tä häpkhila lech'efwa. Wet äp häte iche t'at lakalay'i tä iwhäye hin'otso. Tä iläte tä yämlhi, wet lhäy'e lhip tä lakäjyaj ihi. Wet häp tä oyok, athana olham matche tä okäjlhi. 30Wet häp lhamtso nemla koyhyaj tä len'ohyaj t'aylhaphä, mat olham ot'aylhatchä.
Häp Elh tä tälh kaphä
31Häp Elh tä tälh kaphä inu'pe nilhokej wichi. Mat elh tä tälh honhatena häpe t'at honhat lhele wet äp yäme t'at m'ayhay tä ihonhatena. Häp Elh tä tälh puleye inu'pe nilhokej wichi, 32wet äp yen lhämeta m'ak tä lham hiw'en lhäy'e tä iläte, mat nehit katsik imatitche m'ak tä yäme. 33Matkat chik iche elh tä imatitche, häp tä ikalelhät tä matche t'at Dios lhäy'e lhämtes tä iwoye. 34Tsi häp Elh tä Dios Lechenek yäme t'at Dios lhämtes, häp tä Dios imälhetwek tä hiw'enho Espíritu tä T'amajchet. 35Häp Lajcha ihumin t'at häp Lhäs, wet hiw'enho lakhajyhayaj tä inu'pe nilhokej m'ayhay.#Mat 11.27 36Wet elh chik häpe chik t'ekhaye Dios Lhäs, ikatej lew'atshancheyaj tä t'un. Mat elh chik ikachuye Dios Lhäs, ikathiyejt'ala lew'atshancheyaj, mat Dios lewäk iyej t'at häp lham.
Attualmente Selezionati:
Juan 3: WCHB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Biblia Wichí, Dios Lhämtes tä Matchehen © Sociedad Bíblica Argentina, 2002.