Juan 7
7
Jesús lech'inhis ikachuye
1Tä tajyäme täjtso, Jesús ilunche honhat tä Galilea. Tek t'uhläk ihi Judea, häp tä Judío lhayis tä ihi t'uhläk ilän. 2Mat tä tott'aye Judío lhayis lakäjyaj tä lhey N'ohupelis,#Lev 23.34; Deut 16.13 3lech'inhis tahuyej wet yok:
–Mäch'oye täja, hoye Judea, häpkhilek lhamel tä ayen häneka hiw'en m'ak tä lhenlhi. 4Tsi hin'o tä t'uhläk wichi nitäfwelej weskathiyejt'a m'ak tä yenlhi. Wet tä lhenlhi m'ayhay tä lhenlhipej, apäyne nilhokej wichi tä i'pe honhat.
5Lhamel iwoynejetso lhämet tsi tej tä lech'inhis at thayej, t'ekhahiyet'a Jesús. 6Mat lham ifwenho lhamel wet yok:
–Amel lefwetajay lewhäy at chik häpe is t'at. Mat kamaj nichäthiyet'a owhäy. 7Honhat leles ihanhiyejt'a chik n'äyi amhomche. Olham häp tä n'äyi n'oho, tsi on'älitpe m'ak tä lhamel iwoye tä ni'isa. 8Mähen amel, hoyaye t'at n'okäjyaj. Olham ohohiyet'a, tsi kamaj nichäthiyet'a owhäy.
9Tä Jesús ifwenho lhamel täjtso, wet imälhehi Galilea. 10Matkat tä lech'inhis tajyämehen tä yikhen tä ihoye n'okäjyaj, lham häte ihoye t'at, mat tek lhain'ältej wichi, lhimphaj tä lhaiskat. 11Wet niyatey tä Judío lhayis ilunche t'at n'okäjyaj tä lhamel t'ukwe, wet yopejkwe:
–¿Chip ihitso?
12Wet wichi wuj tä yämejwethä Jesús. Iche iyhäj tä yok, “Is hin'otso.” Mat äp iche iyhäj tä yok, “Isit'a, ikanej wichi.”
13Mat lhamel weskatej t'at lhämtestso, tsi nowaye laka niyatey.
Häp Jesús lechufwenyaj tä iwoye tä ihi p'ante n'okäjyaj tä N'ohupelis
14Tä lechowej häp n'okäjyajtso, Jesús tiyäje Dios Lew'et wet iwo lechufwenyaja. 15Tä Judío lhayis iläte lhämtes tä iwoye, wuj tä iseltejen wet yok:
–¿Chipte tä hin'otso ihanej m'ayhay, tä häpe elh tä lhaknichufwena?
16Mat Jesús nichulho lhamel wet yok:
–M'ak tä oyen ochufwenyaja tälhit'a n'oye, tälhe t'at Elh tä lechenekn'o. 17Wet chik iche elh tä t'uhläk iwoye Dios lenech'ethayaj, nitäfwenhichela m'ak tä olham oyen ochufwenyajana, chik tälhe Dios wok tälh n'oye. 18Häp elh tä t'uhläk wichi iwunit, yäme t'at m'ak tä lewuk häp lham. Mat elh tä t'uhläk wichi iwunit elh tä lechenek, häp tä yen lhämeta m'ak tä matche, wet ihichet'a m'ak chik kamatache tä yäme.
19“Wet oyok, Moisés hiw'en p'ante amhohen häp Ley, mat niwohit elh chik häpe amel chik iwoye. ¿Chipte tä let'uyayhläk lelänayn'o?”
20Tä wichi iläte, wet yok:
–¡Ahät tä i'amhi! ¿Atsi tä t'uhläk ailän?
21Jesús yok:
–M'ak tefwajni tä oyenlhi naji häp ifwala tä n'ot'elakw'et,#Juan 5.1-9 wet häp tä nilhokej amel leseltejen. 22Mat lhek tetshanay olhämet. Moisés p'ante ne'tek lewoyayepej n'olhijtsek tä häpe n'otetnek#Lev 12.3 (tej tä nitälhaye lham Moisés, mat amel atetsel p'ante häp tä lakey).#Gén 17.10 Wet amel lewoyaye t'at täjtso. Tej chik häpe ifwala tä n'ot'elakw'et, mat lew'enho t'at han'äfwaj häp n'otetnektso. 23Wet tä amel lenowayhläk lenäk'äsay häp Ley p'ante tälhe Moisés, wet häp tä tej chik häpe thayej ifwala tä n'ot'elakw'et, mat lew'enho t'at n'otetnektso häp han'äfwaj, tä mälhyejtso, oyok, ¿chipte tä lechuwetay n'oye'pe tä ochesat hin'o t'isan imälhewek häp ifwala tä n'ot'elakw'et? 24Lhek yahinya, yej wo akalelhthayajayejpe aelh m'ak tä atelhoy hiw'en, mat äm is alhoho akalelhthayaj tä lewoye, tetshan m'ak tä matche tä häpe.
Jesús yäm lhame tä tälhe Dios
25Elhpej tä lew'et Jerusalén lhamel tay'ätshan lhamehen wet yok:
–¿Hä kahäpeya täjtsi hin'o tä lhaka niyatey t'ukwe yämthilek ilän? 26Lhek yahinya, iyej t'at wichi wet yämhoplhi, mat niwohit elh chik tahuyej. ¿Elat nech'e niyatey ihanej p'iya tä häpe N'ofwayhthi tä Dios Chenek? 27Mat n'amel y'ahanej ihi honhat tä tälhe. Mat häp N'ofwayhthi tä Dios Chenek, chik nämla nehit katsik ihanhiyeja ihi honhat tä tälhe.
28Jesús ihi t'at Dios Lew'et wet iwo lechufwenyaja. Tä iläte täjtso, wet nech'e ifwitsenej lechos wet yok:
–¡Amel lefwetajay letäfwelay n'oyej wet äp lehanayej ihi honhat tä otälho! Oyok, tä onäm olhamhit'ak olhaichen, mat häp Elh tä t'uhawetej chik wichi t'ekhaye, häp tä lechenekn'o, mat amel tek letäfwelayej. 29Olham tä ontäfwelej, tsi otälhe wet lham t'at tä lechenekn'o.
30Tä wichi iläte, t'uhläk itsoklhi, mat ihit'a katsik takwey itiyej, tä kamaj lham nichätaye lewhäy. 31Wet wujpe wichi tä nech'e t'ekhaye, wet lhamel yok:
–Chik näm N'ofwayhthi tä Dios Chenek, ¿hä yenhilhila letetnhay tä inu'pe m'ak tä hin'otsi yenlhi?
Fariseo lhayis fwetaj itsoklhi Jesús
32Tä Fariseo lhayis iläte m'ak tä wichi yen lhämetayej Jesús, lhamel lhäy'e sacerdotes tä len'ohyajay ihiche ichen hin'ol tä t'uye Dios Lew'et yämthilek itsoklhi.
33Jesús yok:
–Pitajit'a lewhäy tä oihla amejen, wet oyäpnhiyela häp Elh tä lechenekn'o. 34Amel let'uhla n'okwe mat tek lew'enlan'o, tsi tek lehanhiyeja lewoyneje yämthilek lechäte lhip chik oihihila.
35Niyatey tä Judío lhayis tay'ätshan lhamehen wet yok:
–¿Chihla tiyäji hin'otsi, tä yäm lhame tä kay'aw'enhila? ¿Elat ihohiyela n'aiyhäj tä ihiche honhates iyhäj wet ichufwenhihena p'iya häp wichi tä w'enha lhamejen tä iyej? 36¿Chip iwoye lhämet tä yok, “Let'uhla n'okwe mat tek lew'enlan'o, tsi tek lehanhiyeja lewoyneje yämthilek lechäte lhip chik oihihila”?
Tewok lhayis tä häpe inät tä n'ow'atshancheyaj
37Häp ifwala tä lepes n'okäjyaj,#Lev 23.36; Núm 29.35 häp ifwala tä lhamya, Jesús takasit wet ifwitsenej lechos tä yok:
–Elh chik häpe tä ichim, is chik iho n'oye wet iyä.#Juan 4.10-14 38Mälhyej Dios lhämet tä ihi Lehi tä yok, “Häp elh tä t'ekha n'oye, tewok lhayis tä häpe inät tä n'ow'atshancheyaj tälhihola lechowej.”#Ezeq 47.1; Zac 14.8
39Tä iwoyetso, Jesús yäme häp Espíritu tä Dios T'amajchet tä elh chik häpe chik t'ekhaye lham, ikathiyeja. Tsi kamaj ayej Espíritu tä T'amajchet ninäma p'ante, tä kamaj nichätaye lewhäy Jesús lewujyaj.
Wichi tek w'awulhejchä m'ak tä yämeje Jesús
40Iche iyhäj wichi tä iläte lhämtestso wet yok:
–Matche tä häp täjtsi Profeta tä toyhlä tä nämla.
41Wet iyhäj yok:
–Häpe N'ofwayhthi tä Dios Chenek.
Mat äp iche iyhäj tä yok:
–Kha, tsi N'ofwayhthi tä Dios Chenek iwohiyet'ak tälho Galilea. 42Tsi Dios lhämet tä ihi Lehi yäme tä Dios Chenektso tälhiyela David leles tä lepes lhele,#2~Sam 7.12-13; Sal 89.3-4 wet äp tälhihola Belén,#Miq 5.2 häp hupuy tä David lew'et p'ante.
43Tä mälhyejtso, wichi tek w'awulhejchä m'ak tä yämeje Jesús. 44Iche iyhäj tä t'uhläk itsoklhi, mat ihit'a katsik takwey itiyej.
Niyatey tä Judío lhayis itiyej lakachuhanyaj Jesús
45Häp hin'ol tä t'uye Dios Lew'et, lhamel yäple sacerdotes tä len'ohyajay ihiche lhäy'e Fariseo lhayis. Wet lhamel tay'ätshane hin'oltso wet yok:
–¿Chipte tä kachäjaya alhoho hin'otso?
46Lhamel yok:
–¡Ihichet'a elh chik lhämtes häte iwoye tä lham yämlhi!
47Tä Fariseo lhayis iläte, wet yok:
–¿Hä nech'e häte amel lematitche t'akanyaj tä iwoye? 48Lhek tetshan olhämet, ¿hä iche elh n'amel lhaka niyatey wok Fariseo lhayis elh chik häpe tä ichaye lham? 49¡Häp wichitso tä nitäfwelayej Ley p'ante tälhe Moisés, lewit'äy ihihila!
50Wet Nicodemo, häp Fariseo tä pajche ihoye Jesús,#Juan 3.1-2 lham tahuyej iyhäj wet yok:
51–Häp Ley p'ante tälhe Moisés yok, “Yej letiyej letes häp elh chik häpe tä kamaj kalätaye lhämtes wet äp kahanayej m'ak tä iwoye.”
52Mat tä iyhäj iläte Nicodemo lhämetna, lhamel nichulho wet yok:
–Mat ¿chiwoye? ¿Hä ahäte ahäpe Galilea lhele? Lhek achufwenej Dios lhämtes tä ihi Lehi. Lew'enla tä ihichet'a profeta chik häpe tä tälhe Galilea.
Atsinha tä iwo lakain'oyaja
[ 53Wet nech'e lhamel elhpej yäple lew'et,
Attualmente Selezionati:
Juan 7: WCHB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Biblia Wichí, Dios Lhämtes tä Matchehen © Sociedad Bíblica Argentina, 2002.